જનતા કર્ફ્યૂ: 22 માર્ચે 2400 પેસેન્જર ટ્રેન અને 1300 મેલ-એક્સપ્રેસ ટ્રેનો નહીં દોડે

જનતા કર્ફ્યૂના પગલે દેશમાં શનિવારે રાત્રે 12 વાગ્યાથી રવિવારે રાત્રે 10 વાગ્યા સુધી કોઈ જ પેસેન્જર ટ્રેન નહીં દોડે. મેલ અને એક્સપ્રેસ ટ્રેનો પણ સવારે રોકી દેવામાં આવશે. આ દરમિયાન કોઈ પણ સ્ટેશન પરથી ટ્રેન યાત્ર શરૂ નહીં કરે.

નવી દિલ્હી: વડાપ્રધાન નરેન્દ્ર મોદીએ 22 માર્ચના રોજ જનતા કર્ફ્યૂ લગાવવાની જાહેરાત કરી છે. જેના પગલે દેશમાં શનિવારે રાત્રે 12 વાગ્યાથી રવિવારે રાત્રે 10 વાગ્યા સુધી કોઈ જ પેસેન્જર ટ્રેન નહીં દોડે. મેલ અને એક્સપ્રેસ ટ્રેનો પણ સવારે રોકી દેવામાં આવશે. આ દરમિયાન કોઈ પણ સ્ટેશન પરથી ટ્રેન યાત્ર શરૂ નહીં કરે. આ સાથે જ ઉપનગરીય (લોકલ) ટ્રેન સેવાઓને ઘટાડીને લઘુત્તમ સ્તર પર લાવવામાં આવશે. ઉલ્લેખનીય છે કે, દિલ્લી મેટ્રો પણ 22 માર્ચે દિવસભર બંધ રહેશે. રેલવે અધિકારીઓના જણાવ્યા મુજબ, જનતા કર્ફ્યૂ સમયે કુલ 2400 પેસેન્જર ટ્રેન નહીં દોડે. જ્યારે 1300 મેલ એક્સપ્રેસ ટ્રેન રદ્દ કરવામાં આવી છે. કોરોના વાઈરસની સ્થિતિને ધ્યાનમાં રાખી રેલવે બિનજરૂરી યાત્રા અટકાવવા માટે અગાઉથી 245 યાત્રી ટ્રેન રદ્દ કરી ચુક્યું છે.

IRCTCએ કોરોના વાયરસને લઈ સાવચેતીના પગલે મેલ કે એક્સપ્રેસ ટ્રેનોમાં યાત્રા દરમિયાન ખાવા-પીવાની સુવિધા આગામી નોટિસ મળે ત્યાં સુધી બંધ રાખવા આદેશ આપ્યો છે. ફૂટ પ્લાઝા, રેસ્ટરૂમ, જન આહાર કેન્દ્ર અને નાના રસોઈઘરો આગાની નોટિસ સુધી બંધ રાખવા આદેશ આપી દીધો છે.

દેશમાં કોરોના વાઈરસો વધી રહેલા પ્રકોપને ધ્યાનમાં રાખી વડાપ્રધાન મોદીએ ગુરુવારે દેશને સંબોધન કરતા લોકોને અપીલ કરી હતી કે, રવિવારે (22 માર્ચ) સવારે 7 વાગ્યાથી રાત્રીના 9 વાગ્યા સુધી જનતા કર્ફ્યૂનું પાલન કરે. આ દરમિયાન કોઈ પણ વ્યક્તિ પોતાના ઘરની બહાર નહીં નિકળે. સાંજે 5 વાગે પોતાના ઘરોમાં જ તાળી પાડી, થાળી વગાડી, ઘંટી વગાડી એકબીજાનો આભાર વ્યક્ત કરશે અને વાઈરસ સામે લડવામાં એકતા દર્શાવશે. ભારતમાં કોરોના વાયરસનો પ્રકોપ સતત વધી રહ્યો છે. કોરોના વાયરસથી સંક્રમિત દર્દીઓની સંખ્યા વધીને 225 થઈ ગઈ છે. દેશમાં અત્યાર સુધી ચાર લોકોના મોત થઈ ચૂક્યા છે.