ફડણવીસ સાથે ઘમાસાણની વચ્ચે એકનાથ શિંદેની ચેતવણી, કહ્યું - મને હલકામાં ન લેતા, સમજવાવાળા સમજી લે...
Maharashtra politics update: ડેપ્યુટી સીએમ શિંદેનો સંકેત: ૨૦૨૨માં સરકાર બદલી, હવે ૨૩૨ બેઠકો જીતી બતાવી.
Eknath Shinde news: મહારાષ્ટ્રના રાજકારણમાં ફરી ગરમાવો આવ્યો છે. ડેપ્યુટી મુખ્યમંત્રી અને શિવસેના પ્રમુખ એકનાથ શિંદેએ વિરોધીઓ પર આકરા પ્રહારો કર્યા છે. તેમણે નામ લીધા વગર ટીકાકારોને સ્પષ્ટ શબ્દોમાં કહ્યું કે તેમને હળવાશથી લેવાની ભૂલ ન કરવી જોઈએ. શિંદેએ વર્ષ ૨૦૨૨માં થયેલી રાજકીય ઉથલપાથલ અને સરકાર બદલવાની ઘટનાને ટાંકીને પોતાનો મજબૂત સંદેશ આપ્યો છે. આ સાથે જ, શરદ પવાર દ્વારા 'મહાદજી શિંદે રાષ્ટ્રીય ગૌરવ' પુરસ્કાર અર્પણ કરવા પર થયેલી ટીકાઓનો પણ તેમણે જડબાતોડ જવાબ આપ્યો હતો.
‘જ્યારે મને હળવાશથી લીધો ત્યારે...’
એકનાથ શિંદેએ પોતાની રાજકીય કારકિર્દીની શરૂઆત એક સામાન્ય કાર્યકર તરીકે થઈ હોવાનું યાદ અપાવ્યું હતું, પરંતુ સાથે જ તેમણે પોતાની ક્ષમતાનો પરચો પણ આપ્યો હતો. તેમણે કહ્યું, “હું એક સામાન્ય કાર્યકર છું, પરંતુ મને બાળાસાહેબ અને દિઘે સાહેબના સિદ્ધાંતો પર ચાલનારો કાર્યકર સમજવો જોઈએ. જ્યારે લોકોએ મને હળવાશથી લીધો, ત્યારે મેં ૨૦૨૨માં રાજકીય ચિત્ર બદલી નાખ્યું અને સરકાર પણ બદલી નાખી. અમે સામાન્ય લોકોની સરકાર સ્થાપી. લોકોને જે જોઈતું હતું, તે ડબલ એન્જિનવાળી સરકાર ઝડપથી આગળ વધી રહી છે.”
‘સંકેત સમજવાવાળા સમજી લે’
શિવસેના પ્રમુખે વધુમાં ઉમેર્યું હતું કે, “મેં વિધાનસભાના ભાષણમાં કહ્યું હતું કે દેવેન્દ્ર ફડણવીસજી અને મને ૨૦૦થી વધુ બેઠકો મળશે. પરંતુ અમે તો ૨૩૨ બેઠકો મેળવી છે, એટલે મને હળવાશથી લેવાની ભૂલ ન કરવી. જે કોઈ મારા સંકેતને સમજવા માગતા હોય, તેઓ સમજી લે. હું મારું કામ કરતો રહીશ. વિરોધીઓ રોજ આક્ષેપો કરતા રહે છે.” શિંદેના આ નિવેદનથી મહારાષ્ટ્રના રાજકીય વર્તુળોમાં ફરીથી ચર્ચા જાગી છે.
Nagpur, Maharashtra: Deputy CM Eknath Shinde says, "I am a worker, a simple worker, but I should be seen as a worker of Balasaheb and Dighe Saheb. When I was taken lightly, I changed the government in 2022 and brought a government that reflects the people's will..." pic.twitter.com/4qTp1xnsOZ
— IANS (@ians_india) February 21, 2025
‘શરદ પવારનું પણ અપમાન થયું’
શરદ પવાર દ્વારા એવોર્ડ મળવા પર થયેલી ટીકાઓનો જવાબ આપતા શિંદેએ કહ્યું, “શરદ પવાર સાહેબે મને એવોર્ડ આપ્યો, એમાં ખોટું શું છે? એક મરાઠી વ્યક્તિએ બીજા મરાઠીને ‘મહાદજી શિંદે રાષ્ટ્રીય ગૌરવ’ એવોર્ડ આપ્યો. મહાન મહાદજી શિંદે એક યોદ્ધા હતા. મને તો નવાઈ લાગી કે મારા જેવા સામાન્ય કાર્યકરને તેમના નામે એવોર્ડ મળ્યો. લોકો ગમે તેટલું બળે, પણ સત્ય તો બદલાતું નથી. એ સમયે શરદ પવાર સાહેબનું પણ અપમાન થયું હતું, જેમણે મને મુખ્યમંત્રી બનાવ્યો હતો.” તેમણે વિરોધીઓને આડે હાથ લેતા કહ્યું કે ટીકાકારોએ તમામ મર્યાદાઓ ઓળંગી છે.
‘મહાદજી શિંદેના વંશજોનું પણ અપમાન’
ડેપ્યુટી સીએમએ વધુમાં જણાવ્યું કે, “સાહિત્યકારોને દલાલ કહીને તેમનું અપમાન કરાયું, અને મહાદજી શિંદેના વંશજોને પણ છોડવામાં ન આવ્યા. મારું અપમાન કરવું હોય તો કરો, પણ આ લોકોએ તો અમિત શાહનું નામ પણ તેમાં જોડી દીધું. આ બધું શું ચાલી રહ્યું છે? શું આ લોકો ક્યારેય સુધરશે? હું ફરીથી કહું છું કે તમે મારા પર ગમે તેટલા આરોપ લગાવો, ગમે તેટલો દુર્વ્યવહાર કરો, જ્યાં સુધી મહારાષ્ટ્રની જનતા મારી સાથે છે, ત્યાં સુધી મને કોઈ ચિંતા નથી.” શિંદેના આ નિવેદને મહારાષ્ટ્રના રાજકારણમાં નવી દિશા આપી છે અને આગામી સમયમાં રાજકીય ગરમાવો વધવાની સંભાવના છે.
આ પણ વાંચો....
ટ્રેન્ડિંગ સમાચાર
ટોપ સ્ટોરી
