Ajit Pawar Plane Crash: પહેલા વિમાનમાં આગ લાગી, પછી એક બાદ એક બ્લાસ્ટ થયા, પ્રત્યક્ષદર્શીએ ભયાનક દ્રશ્યનું કર્યું વર્ણન  

નાયબ મુખ્યમંત્રી અજિત પવાર સાથે થયેલા વિમાન અકસ્માતે સમગ્ર મહારાષ્ટ્રને હચમચાવી નાખ્યું છે. તેમનું વિમાન પુણે જિલ્લાના બારામતી નજીક ક્રેશ થયું હતું.

પહેલા વિમાનમાં આગ લાગી, પછી એક બાદ એક બ્લાસ્ટ થયા

Source : તસવીર સોશિયલ મીડિયા

મહારાષ્ટ્રના નાયબ મુખ્યમંત્રી અજિત પવાર સાથે થયેલા વિમાન અકસ્માતે સમગ્ર મહારાષ્ટ્રને હચમચાવી નાખ્યું છે. તેમનું વિમાન પુણે જિલ્લાના બારામતી નજીક ક્રેશ થયું હતું, જેમાં પવાર સહિત પાંચ લોકોના મોત થયા હતા. પ્રત્યક્ષદર્શીઓના જણાવ્યા અનુસાર, વિમાન હવામાં અસ્થિર દેખાતું હતું અને જમીન સાથે ટકરાતાજ તેમાં આગ લાગી ગઈ હતી, ત્યારબાદ અનેક વિસ્ફોટ થયા હતા. આ અકસ્માતથી રાજકીય અને વહીવટી પ્રશાસનમાં શોકની લહેર ફેલાઈ ગઈ છે.

અકસ્માત કેવી રીતે થયો ?

એક મહિલા પ્રત્યક્ષદર્શીના જણાવ્યા અનુસાર, સવારે વિમાન બારામતી હવાઈ પટ્ટી પર ચક્કર લગાવતું જોવા મળ્યું હતું. તેણીએ જણાવ્યું હતું કે લેન્ડિંગ દરમિયાન, વિમાન સંતુલન ગુમાવી બેઠું હતું અને ખૂબ જ જોરથી જમીન પર અથડાયું હતું. વિમાન જમીન પર  અથડાતાં જ એક જોરદાર વિસ્ફોટ થયો હતો, જેનો અવાજ આસપાસના વિસ્તારમાં સંભળાયો હતો. વિમાન ક્રેશ થયા પછી વિમાનના ટુકડા હવામાં ઉડ્યા અને નજીકના ઘરોમાં પડ્યા, જેનાથી સ્થાનિક લોકો ભયભીત થઈ ગયા.

છેલ્લી ક્ષણોમાં શું જોયું?

• અન્ય એક પ્રત્યક્ષદર્શીએ જણાવ્યું હતું કે વિમાન લગભગ 100 ફૂટની ઊંચાઈ પર હતું જ્યારે તે નિયંત્રણ ગુમાવતું જોવા મળ્યું  હતું.
• વિમાન નીચે ઉતરતી વખતે નમી ગયું હતું.
• જમીન પર  અથડાતાં જ આગની જ્વાળાઓ ફાટી નીકળી હતી.
• આ પછી ચાર થી પાંચ જોરદાર વિસ્ફોટ થયા હતા.
• આગ અને વિસ્ફોટોને કારણે લોકો વિમાનની નજીક પહોંચી શક્યા નહીં.
• પ્રત્યક્ષદર્શીઓ કહે છે કે આ દ્રશ્ય ભયાનક હતું અને કોઈને પણ જીવ બચાવવાની તક મળી નહીં.

વિમાનમાં કેટલા લોકો હતા અને અકસ્માત ક્યારે થયો ?

અધિકારીઓના જણાવ્યા અનુસાર, વિમાનમાં કુલ પાંચ લોકો સવાર હતા. આ અકસ્માત સવારે 8:45 વાગ્યે થયો હતો. ફ્લાઇટ રડાર ડેટા અનુસાર, વિમાને સવારે 8:10 વાગ્યે મુંબઈથી ઉડાન ભરી હતી અને લગભગ 8:45 વાગ્યે રડાર સાથેનો સંપર્ક તૂટી ગયો હતો. થોડીવાર પછી, વિમાન બારામતી નજીક ક્રેશ થયું.

પ્રવાસનો હેતુ શું હતો?

અહેવાલ છે કે અજિત પવાર મુંબઈથી બારામતી જઈ રહ્યા હતા. તેઓ 5 ફેબ્રુઆરીએ યોજાનારી જિલ્લા પરિષદની ચૂંટણીના સંદર્ભમાં જાહેર સભાઓને સંબોધવાના હતા. અકસ્માતના સમાચાર મળતાં જ વહીવટીતંત્ર, પોલીસ અને રાહત ટીમો ઘટનાસ્થળે પહોંચી ગઈ હતી અને વિસ્તારને ઘેરી લેવામાં આવ્યો હતો.