'ઓપરેશન સિંદૂર'ના ૩૦ દિવસ પૂર્ણ: ભારત-પાકિસ્તાન સંબંધોમાં આવ્યો ધરખમ બદલાવ, જાણો કઈ-કઈ વસ્તુઓ બદલાઈ ગઈ?
પહેલગામ હુમલાનો બદલો લેવા ભારતે પાકિસ્તાનના ૯ આતંકવાદી ઠેકાણા ધ્વસ્ત કર્યા, ૧૦૦થી વધુ આતંકીઓ ઠાર; વેપાર બંધ અને વૈશ્વિક વિશ્વસનીયતાને ઝાટકો
Operation Sindoor 30 days update: જમ્મુ-કાશ્મીરના પહેલગામમાં થયેલા આતંકવાદી હુમલાનો બદલો લેવા માટે ભારતે ૭ મેના રોજ પાકિસ્તાનમાં 'ઓપરેશન સિંદૂર' શરૂ કર્યું હતું, જેને આજે ૩૦ દિવસ પૂર્ણ થયા છે. આ ઓપરેશન પછી ભારત અને પાકિસ્તાન વચ્ચેના સંબંધોમાં અને બંને દેશોની સ્થિતિમાં ઘણા મોટા બદલાવો આવ્યા છે. ભારતે પાકિસ્તાનના આતંકવાદી ઠેકાણાઓ પર સચોટ પ્રહાર કરીને પોતાની સૈન્ય તાકાતનો પરચો આપ્યો હતો.
'ઓપરેશન સિંદૂર' અને તેના પરિણામો
૬-૭ મેની રાત્રે કરવામાં આવેલા આ ઓપરેશન દરમિયાન, ભારતે પાકિસ્તાનના ૯ આતંકવાદી ઠેકાણાઓને નિશાન બનાવ્યા હતા, જેમાં પીઓકેમાં કાર્યરત લશ્કર-એ-તૈયબા અને જૈશ-એ-મોહમ્મદ જેવા ભયાનક આતંકવાદી સંગઠનોના મુખ્યાલયોનો સમાવેશ થાય છે. આ હુમલાઓમાં ૧૦૦ થી વધુ આતંકવાદીઓ માર્યા ગયા હતા. ભારત દ્વારા શરૂ કરાયેલા આ ઓપરેશન પછી, પાકિસ્તાને ભારત પર અનેક મિસાઇલ અને ડ્રોન હુમલા કર્યા, જેનો ભારતે યોગ્ય જવાબ આપ્યો અને પાકિસ્તાનને ઘણું નુકસાન પહોંચાડ્યું.
૩૦ દિવસમાં આવેલા મુખ્ય બદલાવો
૧. સિંધુ જળ સંધિ સ્થગિત: પહેલગામ આતંકવાદી હુમલાના એક દિવસ પછી, ૨૩ એપ્રિલના રોજ, ભારતે પાકિસ્તાન સાથેની સિંધુ જળ સંધિ તોડી નાખી. આ સંધિ હેઠળ પાકિસ્તાન જે ત્રણ નદીઓ (સિંધુ, ઝેલમ, ચિનાબ) ના પાણીનો ઉપયોગ કરતું હતું, તેનું પાણી બંધ થઈ જશે. આ નિર્ણયથી પાકિસ્તાનના સિંધ અને પંજાબ પ્રાંતની ખેતીને મોટું નુકસાન થવાની શક્યતા છે.
૨. હવાઈ ક્ષેત્ર સંપૂર્ણપણે બંધ: સિંધુ જળ સંધિ તોડ્યા પછી, પાકિસ્તાને પણ ભારતીય એરલાઇન્સ માટે તેના હવાઈ ક્ષેત્રને સંપૂર્ણપણે બંધ કરી દીધું હતું. તેના જવાબમાં ભારતે પણ પોતાનું હવાઈ ક્ષેત્ર બંધ કરી દીધું. આ નિર્ણયથી પાકિસ્તાનને ભારત કરતાં વધુ આર્થિક નુકસાન થયું, કારણ કે પાકિસ્તાનના હવાઈ ક્ષેત્રનો ઉપયોગ કરતી એરલાઇન્સ તેને મોટી રકમ ચૂકવતી હતી.
૩. ભારત સાથે વેપાર સંબંધોનો અંત: ૨૦૧૯ માં પુલવામા આતંકવાદી હુમલા પછી, ભારત અને પાકિસ્તાન વચ્ચે વેપાર ખૂબ જ મર્યાદિત હતો, પરંતુ પહેલગામ ઘટના પછી, ભારતે પાકિસ્તાન સાથેના તમામ વેપાર સંબંધોનો સંપૂર્ણપણે અંત લાવી દીધો છે, જેમાં ત્રીજા પક્ષકારો સાથેનો વેપાર પણ શામેલ છે. આ નિર્ણય પછી, પાકિસ્તાનને આવશ્યક વસ્તુઓની નિકાસ સંપૂર્ણપણે બંધ થઈ ગઈ છે, જેના કારણે ત્યાં ફુગાવો વધવાની ધારણા છે.
૪. પાકિસ્તાનની વૈશ્વિક વિશ્વસનીયતાને ઝાટકો: પહલગામ આતંકવાદી હુમલા પછી, પાકિસ્તાનની વૈશ્વિક વિશ્વસનીયતાને પણ મોટો ઝાટકો લાગ્યો છે. આ હુમલા પછી, ભારતે ઘણા દેશોમાં પોતાનું પ્રતિનિધિમંડળ મોકલીને પાકિસ્તાન દ્વારા સમર્થિત આતંકવાદનો પર્દાફાશ કર્યો. ભારત અને પાકિસ્તાન વચ્ચેના સંઘર્ષ દરમિયાન તટસ્થ રહેલા દેશો પણ ભારતના પક્ષમાં આવતા જોવા મળ્યા અને પાકિસ્તાનની ખુલ્લેઆમ નિંદા કરી.
૫. પાકિસ્તાનને IMF પાસેથી લોન મળી: 'ઓપરેશન સિંદૂર' પછી, પાકિસ્તાનને આંતરરાષ્ટ્રીય નાણાકીય ભંડોળ (IMF) પાસેથી $૨.૪ બિલિયનની લોન મેળવવાનો માર્ગ મોકળો થયો છે. IMF એ આ માટે મંજૂરી આપી દીધી છે. ભારતના દૃષ્ટિકોણથી, આ એક રાજદ્વારી ભૂલ પણ માનવામાં આવી શકે છે, કારણ કે ભારતે આનો સખત વિરોધ નોંધાવ્યો હતો, તેમ છતાં પાકિસ્તાન IMF પાસેથી લોન લેવામાં સફળ રહ્યું.
Before You Go
Bhavnagar Liquor Scam : ભાવનગર લઠ્ઠાકાંડના આરોપીઓના 10 દિવસના રિમાન્ડ મંજૂર
ટોપ સ્ટોરી
ટ્રેન્ડિંગ સમાચાર
