જો સ્થિતિ નહીં સુધરે તો બધું જ ખતમ થઈ જશે! ઉર્જા સંકટ પર પીએમ મોદીએ આપી ચેતવણી

પીએમ મોદીએ હેગમાં ભારતીય સમુદાયને સંબોધતા દુનિયાને ઉર્જા સંકટ અને યુદ્ધોની ભયાનક અસરો વિશે ચેતવી, સાથે જ ભારતના ડિજિટલ અને સ્ટાર્ટઅપ સેક્ટરની ઐતિહાસિક સિદ્ધિઓના પણ કર્યા વખાણ.

pm modi netherlands visit energy crisis global innovation startup growth

Source : twitter

Show Quick Read

Key points generated by AI, verified by newsroom

• વૈશ્વિક યુદ્ધો અને ઉર્જા સંકટ વિકાસ ધોઈ શકે છે.
• ભારત મોબાઈલ ઉત્પાદનમાં બીજા ક્રમે, ડિજિટલ ઇન્ફ્રાસ્ટ્રક્ચર ચર્ચામાં.
• ભારતીય યુવાનો આકાશને સ્પર્શવા, નવીનતા અને ઝડપી પરિણામ ઇચ્છે.
• સ્ટાર્ટઅપ, સેમિકન્ડક્ટર ક્ષેત્રોમાં ભારતે મોટી હરણફાળ ભરી છે.

PM Modi Netherlands visit: વડાપ્રધાન નરેન્દ્ર મોદીએ નેધરલેન્ડ્સના હેગ શહેરમાં ભારતીય સમુદાયને સંબોધિત કરતા દુનિયામાં ચાલી રહેલા યુદ્ધો અને ઉર્જા સંકટને લઈને એક મોટી ચેતવણી આપી છે. પીએમ મોદીએ સ્પષ્ટ શબ્દોમાં કહ્યું છે કે જો દુનિયામાં અત્યારે જે અસ્થિરતા ચાલી રહી છે તે જલ્દી દૂર નહીં થાય, તો છેલ્લા ઘણા દાયકાઓનો વિકાસ સાવ ધોવાઈ જશે અને દુનિયાની એક મોટી વસ્તી ફરીથી ગરીબીના ખપ્પરમાં હોમાઈ જશે. આ ગંભીર ચેતવણીની સાથે જ તેમણે વૈશ્વિક મંચ પર ભારતના વિકાસ, ડિજિટલ ક્રાંતિ, સેમિકન્ડક્ટર અને સ્ટાર્ટઅપ સેક્ટરની જબરદસ્ત સિદ્ધિઓનો ગર્વભેર ઉલ્લેખ કર્યો હતો.

જો પરિસ્થિતિ નહીં સુધરે, તો બધું જ ખોવાઈ શકે છે

પીએમ મોદીએ પોતાની વાત મૂકતા જણાવ્યું કે, "આજે આખી માનવજાત બહુ મોટા પડકારોનો સામનો કરી રહી છે. પહેલા આપણે કોરોના મહામારી વેઠી, પછી એક પછી એક યુદ્ધો શરૂ થઈ ગયા અને હવે આપણે ભયંકર ઉર્જા સંકટનો સામનો કરી રહ્યા છીએ. એવું લાગે છે કે આ દાયકો દુનિયા માટે આફતોનો દાયકો બની ગયો છે." તેમણે ચિંતા વ્યક્ત કરતા કહ્યું કે જો પરિસ્થિતિમાં ટૂંક સમયમાં સુધારો નહીં આવે, તો અત્યાર સુધી દુનિયાએ જે પણ પ્રગતિ કરી છે તે બધી જ માટીમાં મળી જશે અને લોકો ફરી ગરીબીમાં ફસાઈ જશે.

મોબાઈલ આયાત કરતો દેશ આજે 'ઈનોવેશન પાવરહાઉસ' બન્યો

દુનિયાની આ કપરી સ્થિતિ વચ્ચે પીએમ મોદીએ પોતાના દેશની પ્રગતિના વખાણ કરતા કહ્યું કે, "છેલ્લા થોડા વર્ષોમાં ભારતે એટલું ઓપ્ટિકલ ફાઈબર પાથર્યું છે કે જે પૃથ્વી અને ચંદ્ર વચ્ચેના અંતર કરતા 11 ગણું વધારે છે! એક દાયકા પહેલા આપણે મોબાઈલ ફોન બીજા દેશોમાંથી મંગાવવા પડતા હતા, પણ આજે ભારત દુનિયાનું બીજા નંબરનું સૌથી મોટું મોબાઈલ ઉત્પાદક બની ગયું છે." તેમણે ઉમેર્યું કે આજે ભારતની ઓળખ એક 'ઈનોવેશન પાવરહાઉસ' તરીકેની છે અને આપણા ડિજિટલ પબ્લિક ઈન્ફ્રાસ્ટ્રક્ચરની ચર્ચા આખી દુનિયામાં થઈ રહી છે.

ભારતના યુવાનો હવે આકાશને આંબવા માંગે છે

ભારતના યુવાનોની આકાંક્ષાઓ વિશે વાત કરતા પીએમ મોદીએ કહ્યું કે, "આજનું ભારત મોટા સપના જુએ છે. દેશ હવે માત્ર બદલાવ નથી ઈચ્છતો, પણ સૌથી બેસ્ટ અને સૌથી ફાસ્ટ રિઝલ્ટ ઈચ્છે છે. ભારતના યુવાનો આજે આકાશને સ્પર્શવા માંગે છે." તેમણે યાદ અપાવ્યું કે ભારતે તાજેતરમાં જ દુનિયાની સૌથી મોટી અને સફળ AI (આર્ટિફિશિયલ ઈન્ટેલિજન્સ) સમિટનું આયોજન કર્યું હતું અને તે પહેલા G-20 સમિટ પણ શાનદાર રીતે યોજી હતી.

આ પણ વાંચોઃ શું તમે જાણો છો ભારત કયા દેશોને લોન આપે છે? આ રહ્યો સૌથી વધુ દેવું ધરાવતા દેશોનો રિપોર્ટ

સ્ટાર્ટઅપ અને સેમિકન્ડક્ટરમાં ભારતની હરણફાળ

સ્ટાર્ટઅપ સેક્ટરના ચોંકાવનારા આંકડા આપતા વડાપ્રધાને કહ્યું કે:

12 વર્ષ પહેલા દેશમાં 500 થી પણ ઓછા સ્ટાર્ટઅપ્સ હતા, જ્યારે આજે આ આંકડો 200,000 ને પાર કરી ગયો છે.

વર્ષ 2014 માં આપણી પાસે માત્ર 4 યુનિકોર્ન હતા, જે આજે વધીને લગભગ 125 થઈ ગયા છે.

માત્ર 2025 ના વર્ષમાં જ બીજા 44,000 નવા સ્ટાર્ટઅપ્સ રજીસ્ટર થશે.

આજે આપણા યુવાનો AI, ડિફેન્સ અને સ્પેસ સેક્ટરમાં કમાલનું કામ કરી રહ્યા છે. સંશોધન ક્ષેત્રે પણ દેશે મોટી પ્રગતિ કરી છે અને ગયા વર્ષે જ ભારતમાં 10 લાખથી વધુ પેટન્ટ ફાઈલ થયા હતા.

સેમિકન્ડક્ટર (ચિપ મેકિંગ) વિશે માહિતી આપતા તેમણે જણાવ્યું કે, હાલમાં ભારતમાં 12 સેમિકન્ડક્ટર પ્લાન્ટ કાર્યરત છે, જેમાંથી 2 પ્લાન્ટમાં તો ઉત્પાદન પણ શરૂ થઈ ગયું છે. હવે ચિપ્સ પણ ભારતમાં જ ડિઝાઈન થશે અને બનશે જે આત્મનિર્ભર ભારતનો એક મોટો પુરાવો છે.

આ પણ વાંચોઃ પીએમ મોદીએ કેમ પેટ્રોલ-ડીઝલનો વપરાશ ઘટાડવા કરી અપીલ, સરકારે જણાવ્યું કારણ, કહ્યું - રોજ ₹1000 કરોડ....