IRCTC પર તમારુ એકાઉન્ટ પણ થઇ શકે છે બ્લોક, બચવા માટે આટલું કરો

જો તમે IRCTC થી ઓનલાઈન ટિકિટ બુક કરાવો છો તો આ સમાચાર તમારા માટે ઉપયોગી થઈ શકે છે

પ્રતિકાત્મક તસવીર

જો તમે IRCTC થી ઓનલાઈન ટિકિટ બુક કરાવો છો તો આ સમાચાર તમારા માટે ઉપયોગી થઈ શકે છે. IRCTC એ બે કરોડથી વધુ શંકાસ્પદ એકાઉન્ટ બ્લોક કર્યા છે. આ માટે આર્ટિફિશિયલ ઈન્ટેલિજન્સનો ઉપયોગ કરવામાં આવ્યો છે. IRCTC એ સામાન્ય મુસાફરોને રાહત આપવા માટે આ પગલું ભર્યું છે. બ્લોકિંગ ટાળવા માટે તમારા એકાઉન્ટને આધાર સાથે લિંક કરો.

રેલવેએ ઓનલાઈન માધ્યમથી ઓટોમેટેડ ટૂલ્સનો ઉપયોગ કરીને ટિકિટ બુક કરાવનારા લોકો સામે ઝૂંબેશ શરૂ કરી છે, જેના માટે આર્ટિફિશિયલ ઈન્ટેલિજન્સનો ઉપયોગ કરવામાં આવી રહ્યો છે. છેલ્લા 6 મહિનામાં રેલવે દ્વારા વિકસિત ખાસ સોફ્ટવેરના માધ્યમથી 2.4 કરોડથી વધુ યુઝર્સને ડીએક્ટિવેટ કરી તેમને બ્લોક કરી દીધા છે. લગભગ 20 લાખ અન્ય એકાઉન્ટ પણ શંકાસ્પદ મળી આવ્યા છે, જેમના આધાર અને અન્ય દસ્તાવેજોની તપાસ કરવામાં આવી રહી છે.

13 કરોડથી વધુ એક્ટિવ સબ્સ્ક્રાઇબર્સ

IRCTC વેબસાઇટ પર 13 કરોડથી વધુ એક્ટિવ સબ્સ્ક્રાઇબર્સ છે, જેમાંથી 1.2 કરોડ આધાર પ્રમાણિત એકાઉન્ટ છે. IRCTC એ એવા બધા એકાઉન્ટ્સની ખાસ તપાસ કરવાનો નિર્ણય લીધો છે જે આધાર સાથે પ્રમાણિત નથી. જો શંકાસ્પદ જણાશે તો અનઅધિકૃત એકાઉન્ટ્સ બંધ કરવાનો નિર્ણય લેવામાં આવશે. રેલવે એ સુનિશ્ચિત કરવાનો પ્રયાસ કરી રહી છે કે તત્કાલ અને પ્રીમિયમ તત્કાલ સેવા હેઠળ ફક્ત વાસ્તવિક મુસાફરોને જ ટિકિટ મળે. જે ખાતાધારકો પોતાના ખાતાને આધાર સાથે લિંક કરે છે તેમને તત્કાલ બુકિંગની પહેલી 10 મિનિટમાં પ્રાથમિકતા મળશે. IRCTCના અધિકૃત એજન્ટોને પણ તત્કાલ વિન્ડો ખુલ્યાના પહેલી 10 મિનિટમાં સિસ્ટમ પર ટિકિટ બુક કરવાની મંજૂરી નથી. આવી સ્થિતિમાં IRCTC એકાઉન્ટને આધાર સાથે વેરિફાઇ કરવું જરૂરી બની ગયું છે.

રેલ મંત્રી અશ્વિની વૈષ્ણવે જણાવ્યું હતું કે "ભારતીય રેલવે ટૂંક સમયમાં તત્કાલ ટિકિટ બુકિંગ માટે ઈ-આધાર ચકાસણી શરૂ કરશે. આનાથી વાસ્તવિક મુસાફરોને જરૂર પડે ત્યારે કન્ફર્મ ટિકિટ મળી શકશે."

દરરોજ લગભગ 225,000 મુસાફરો ભારતીય રેલવેના ઓનલાઈન પ્લેટફોર્મ દ્વારા તત્કાલ ટિકિટ બુક કરે છે. 24 મે થી 2 જૂન સુધીના ઓનલાઈન તત્કાલ ટિકિટ બુકિંગ પેટર્નના વિશ્લેષણમાં દર્શાવવામાં આવ્યું છે કે વિન્ડો ઓપન થયાના પ્રથમ મિનિટમાં સરેરાશ 108,000 એસી ક્લાસ ટિકિટમાંથી ફક્ત 5,615 ટિકિટ બુક થઈ હતી. જોકે, બીજી મિનિટમાં 22,827 ટિકિટ બુક થઈ હતી. એસી ક્લાસમાં વિન્ડો ઓપન થયા પછી પ્રથમ 10 મિનિટમાં સરેરાશ 67,159 ટિકિટ ઓનલાઈન બુક થઈ હતી, જે ઓનલાઈન બુક કરાયેલી બધી ટિકિટોના 62.5 ટકા હિસ્સો ધરાવે છે. બાકીની 37.5 ટકા  ટિકિટ ચાર્ટ તૈયાર થયાના 10 મિનિટમાં બુક થઈ હતી, જેમાં 3.01 ટકા તત્કાલ ટિકિટ વિન્ડો ઓપન થયાના 10 કલાક પછી બુક થઈ હતી.