Yogi Government 2.0: જાણો યોગી સરકાર 2.0ના એક માત્ર મુસ્લિમ મંત્રી દાનિશ આઝાદ અંસારી વિશે

વર્ષ 2021માં તેમને ભાજપ સંગઠનમાં લઘુમતી મોરચાના મહાસચિવ તરીકે જવાબદારી સોંપવામાં આવી હતી, જોકે આ વખતે તેમનું કદ વધ્યું છે.

danish_azad_ansari

Uttar Pradesh : યોગી આદિત્યનાથે આજે ઉત્તર પ્રદેશના મુખ્યમંત્રી તરીકે શપથ લીધા. તેમની સાથે 52 મંત્રીઓને પણ રાજ્યપાલ આનંદીબેન પટેલે ભવ્ય સમારોહમાં શપથ લેવડાવ્યા હતા. 52 મંત્રીઓમાંથી 18 કેબિનેટ અને 14 રાજ્ય મંત્રી છે. આ 52 મંત્રીઓમાંથી એકમાત્ર મુસ્લિમ મંત્રી દાનિશ આઝાદ અંસારી બલિયાના છે. યોગી કેબિનેટમાં રાજ્યકક્ષાના મંત્રી બનેલા દાનિશ લાંબા સમયથી રાજકારણમાં છે, તેઓ સીએમ યોગીની નજીકના માનવામાં આવે છે. દાનિશ બલિયા પાસેના બસંતપુરના  રહેવાસી છે અને એબીવીપી કાર્યકર રહી ચુક્યા  છે.

દાનિશ  મુસ્લિમોના અન્સારી સમુદાયમાંથી આવે છે. યુપીમાં અન્સારી મુસ્લિમોની સંખ્યા ઘણી વધારે છે. મુસ્લિમોમાં આ એક પ્રકારની પછાત વર્ગની જાતિ છે. યુપીના રાજકારણમાં તેમની ભૂમિકા ઘણી ઓછી છે. તેનાથી વિપરીત, ઉચ્ચ જાતિઓ જેમાં શેખ, પઠાણ, સૈયદ, મુસ્લિમ રાજપૂત અને મુસ્લિમ ત્યાગી યુપીના રાજકારણમાં પ્રભુત્વ ધરાવે છે. આવી સ્થિતિમાં દાનિશને મંત્રી બનાવવા એ ભાજપનો મોટો  રાજકીય દાવ માનવામાં આવી રહ્યો  છે. ભાજપ પછાત મુસ્લિમોને પોતાની સાથે લાવવા માંગે છે. ટ્રિપલ તલાકના મોટાભાગના કેસો આ શ્રેણીમાંથી આવે છે. આનો ફાયદો ભાજપને પણ મળી શકે છે.

દાનિશ આઝાદે પોતાનો પ્રારંભિક અભ્યાસ બલિયાથી કર્યો હતો, તેમણે લખનૌથી ગ્રેજ્યુએશન કર્યું હતું. આ વખતે મોહસીન રઝાને કેબિનેટમાં સ્થાન આપવામાં આવ્યું નથી. ગત ટર્મમાં પણ તેઓ યોગી સરકારમાં એકમાત્ર મુસ્લિમ મંત્રી બન્યા હતા.

દાનિશને તેની મહેનતનું ફળ 2017માં મળ્યું અને તેમને ઉર્દૂ ભાષાની સમિતિના  સભ્ય બનાવવામાં આવ્યાં. વર્ષ 2021માં તેમને સંગઠનમાં લઘુમતી મોરચાના મહાસચિવ તરીકે જવાબદારી સોંપવામાં આવી હતી, જોકે આ વખતે તેમનું કદ વધારીને મંત્રીપદની જવાબદારી આપવામાં આવી છે. 32 વર્ષની ઉંમરે મંત્રી બન્યા, તેઓ યોગી સરકારના કેબિનેટનો યુવા ચહેરો છે. તેમણે લખનૌ યુનિવર્સિટીમાંથી B.Com કર્યું છે. તેમણે ક્વોલિટી મેનેજમેન્ટમાં માસ્ટર અને પબ્લિક એડમિનિસ્ટ્રેશનમાં માસ્ટર કર્યું છે.

10 માર્ચે દાનિશ આઝાદ અન્સારીએ યુપીમાં ભાજપની મોટી જીત થવા પર લખ્યું હતું કે ઉત્તરપ્રદેશ વિધાનસભા ચૂંટણીએ સાબિત કરી દીધું છે કે આપણા રાજ્યના લોકો હવે જાતિ-ધર્મ-ધર્મથી ઉપર ઉઠીને વિકાસ અને રાષ્ટ્રવાદને સર્વોપરી માને છે.