Surat: સુરત પોલીસે 111 કરોડની મોટી સાયબર ફ્રૉડ ગેંગનો કર્યો પર્દાફાશ, 4 સભ્યો પકડાયા

Surat Cyber Fraud News: આ ગેન્ગે 111 કરોડથી વધુની છેતરપિંડી કરવા માટે રાષ્ટ્રીય અને આંતરરાષ્ટ્રીય સાયબર ગુનેગારોને 623 બેન્ક એકાઉન્ટ્સ આપ્યા હતા

(તસવીર- એબીપી લાઇવ)

Source : Freepik

Surat Cyber Fraud News: ગુજરાત પોલીસને એક મોટી સફળતા મળી છે. દેશ અને દુનિયામાં સાયબર છેતરપિંડીનું નાણું રાખવામાં મદદગારી કરનારી ગેંગના ચાર સભ્યોની ગુજરાતની સુરત પોલીસે ધરપકડ કરી છે. આ ગેન્ગે 111 કરોડથી વધુની છેતરપિંડી કરવા માટે રાષ્ટ્રીય અને આંતરરાષ્ટ્રીય સાયબર ગુનેગારોને 623 બેન્ક એકાઉન્ટ્સ આપ્યા હતા. 

પ્રાથમિક તપાસમાં જાણવા મળ્યું છે કે, મંગળવારે ધરપકડ કરાયેલા ચાર આરોપીઓ સાયબર છેતરપિંડી કરનારાઓ સાથે કામ કરતી ગેંગનો ભાગ હતા, નેશનલ સાયબર ક્રાઈમ રિપૉર્ટિંગ પૉર્ટલ (NCRP)ને અત્યાર સુધીમાં તેમની વિરુદ્ધ 866 ફરિયાદો મળી છે. તેમણે કહ્યું કે, દેશભરમાં આ ગુનેગારો વિરુદ્ધ 200 FIR નોંધવામાં આવી છે.

જૂનમાં, સુરત પોલીસે કમિશન લીધા બાદ છેતરપિંડીના નાણાં પાર્ક કરવા માટે સાયબર ગુનેગારોને બેંક એકાઉન્ટ્સ (જેને 'મ્યૂલ' એકાઉન્ટ્સ કહેવાય છે) પ્રદાન કરવામાં સંડોવાયેલા આઠ લોકોની ધરપકડ કરી હતી. પોલીસના એક નિવેદનમાં જણાવવામાં આવ્યું છે કે, તેમની પૂછપરછમાં વધુ આઠ લોકોનો ખુલાસો થયો હતો, જેમાંથી બે દુબઈમાં રહેતા હતા. તેઓ એવા ખાતાઓ પૂરા પાડવામાં સામેલ હતા જેનો ઉપયોગ સામાન્ય રીતે સાયબર ગુનાઓની આવકને લોન્ડર કરવા માટે થતો હતો.

તેમની પાસેથી મળેલી માહિતીના આધારે પોલીસે મંગળવારે સુરત શહેરના મોટા વરાછા વિસ્તારમાં આવેલી ઓફિસમાં દરોડો પાડી અજય ઈટાલિયા, જલ્પેશ નડિયાદરા અને વિશાલ ઠુમર નામના ત્રણ લોકોની ધરપકડ કરી હતી. અન્ય એક આરોપી હિરેન બરવાલિયાની મુંબઈ ઈન્ટરનેશનલ એરપોર્ટ પરથી ધરપકડ કરવામાં આવી હતી જ્યારે તે દુબઈની ફ્લાઈટમાં ચઢવાનો પ્રયાસ કરી રહ્યો હતો.

અન્ય ચાર - મિલન વાઘેલા, કેતન વેકરિયા, દશરથ ધાંધલિયા અને જગદીશ અજુડિયા - હજુ પણ ફરાર છે. જેમાંથી વાઘેલા અને અજુડીયા હાલ દુબઈમાં છે. જ્યારે પોલીસે મોટા વરાછા ખાતેની ઓફિસ પર દરોડો પાડ્યો ત્યારે ત્રણેય સાયબર છેતરપિંડીનો ભોગ બનેલા લોકો દ્વારા એક બેંક ખાતામાંથી બીજા ખાતામાં જમા કરાવવામાં વ્યસ્ત હતા. ગેંગની મોડસ ઓપરેન્ડીનું વર્ણન કરતાં પોલીસે જણાવ્યું હતું કે ફંડ ટ્રાન્સફર પૂર્ણ કર્યા બાદ તેમના સહયોગીઓ ડેબિટ કાર્ડનો ઉપયોગ કરીને દુબઈમાં રોકડ ઉપાડતા હતા.

આ આરોપીઓ દ્વારા પૂરા પાડવામાં આવેલા બેંક ખાતાઓનો ઉપયોગ ભારતમાં તેમજ દુબઈ અને ચીન સ્થિત સાયબર ગુનેગારો દ્વારા ડિજિટલ ધરપકડ, નોકરી, કામ અને રોકાણની છેતરપિંડી દ્વારા લોકોને છેતરવા માટે કરવામાં આવ્યો હતો.

તેમાં કહેવામાં આવ્યું છે કે, આરોપીઓ પોતાના બેંક ખાતામાં પ્રવેશ આપવા માટે ચોક્કસ કમિશન વસૂલતા હતા. સુરતમાં ઓફિસ અને અન્ય બે સ્થળોએ દરોડા દરમિયાન પોલીસે 28 મોબાઈલ ફોન, 198 બેંક પાસબુક, 100 ડેબિટ કાર્ડ, 35 ચેકબુક, 258 સિમ કાર્ડ અને ત્રણ કૉમ્પ્યુટર જપ્ત કર્યા છે. એકંદરે, પોલીસને જાણવા મળ્યું કે આ ટોળકી 623 બેંક ખાતાઓનું સંચાલન કરતી હતી, જેમાં રૂ. 111 કરોડના વ્યવહારો જાહેર થયા હતા, એમ રિલીઝમાં જણાવાયું હતું.

આ પણ વાંચો