Surat: કોરોનાના નવો સ્ટ્રેઈન ખતરનાક, જાણો કેવી થાય છે તકલીફ ? કેવાં લક્ષણો હોય તો આવે છે પોઝિટિવ ?

સુરત મહાનગરપાલિકાના કમિશ્નર બંછાનિધિ પાનીએ માહિતી આપી કે, કોવિડના નવા સ્ટ્રેઈનમાં અલગ પ્રકારના લક્ષણ સામે આવ્યા છે. તેમણે કહ્યું કે, માથાનો દુખાવો, ચામડીના રોગ, ઝાડા જેવા લક્ષણ ધરાવતા લોકોમાં કોરોના પોઝિટિવ જોવા મળ્યા છે.

તસવીરનો ઉપયોગ પ્રસ્તુતીકરણ માટે કરવામાં આવ્યો છે.

સુરતઃ સુરતમાં કોરોનાના નવા સ્ટ્રેઈનના કારણે ભારે ગભરાટ છે ત્યારે આ સ્ટ્રેઈન અંગે મહત્વની માહિતી મળી છે. આ નવા સ્ટ્રેઈનમાં કોરોનાનાં અગાઉ જોવા મળેલાં લક્ષણોથી નવાં લક્ષણ જોવા મળ્યા છે. સુરત મહાનગરપાલિકાના કમિશ્નર બંછાનિધિ પાનીએ માહિતી આપી કે, કોવિડના નવા સ્ટ્રેઈનમાં  અલગ પ્રકારના લક્ષણ સામે આવ્યા છે. તેમણે કહ્યું કે, માથાનો દુખાવો, ચામડીના રોગ, ઝાડા જેવા લક્ષણ ધરાવતા લોકોમાં કોરોના પોઝિટિવ જોવા મળ્યા છે. સુરતમાં એવા લોકો પણ પોઝિટિવ છે જેમાં કોવિડના કોઈ લક્ષણ પણ જોવા મળતા નથી એ લોકો માટે ચેતવણી છે.

શનિવારે સિટીમાં નોંધાયેલા રેકોર્ડબ્રેક 381 કેસ પૈકી સૌથી વધુ અઠવામાં 99, રાંદેરમાં 59 અને લિંબાયતમાં 54 કેસ છે. સિટીમાં કુલ કેસ 44,348 અને મૃત્યુઆંક 858 છે. ગ્રામ્યમાં નવા 103 કેસ સાથે કુલ કેસ 13,722, મૃત્યુઆંક 287 છે. સિટી-ગ્રામ્ય મળીને કુલ કેસનો આંક 58,070 અને મૃત્યુઆંક 1145 છે. નવી સિવિલ ખાતે કોવિડ વોર્ડમાં આજે કોરોના પોઝિટિવ 98 દર્દી પૈકી 60 દર્દીની હાલત ગંભીર છે. જેમાં 2 વેન્ટીલેટર, 13 બાઈપેપ અને 45 ઓક્સિજન પર છે. જ્યારે સ્મીમેર હોસ્પિટલમાં 24 દર્દી પૈકી 17 દર્દી ગંભીર છે. જેમાં 1 વેન્ટિલેટર, 9 બાઈપેપ અને 17ઓક્સિજન પર છે

સુરતમાં અઠવાડિયામાં કેટલા નોંધાયા કેસ

સુરત સિટીમાં છેલ્લા ચાર દિવસમાં જ 1369 કેસ નોંધાયા છે.

શનિવાર, 20 માર્ચે 381

શુક્રવાર,  19 માર્ચે 349

ગુરુવાર, 18 માર્ચે 324

બુધવાર, 17 માર્ચે 315

મંગળવાર, 16 માર્ચે 263

સોમવાર, 15 માર્ચે 240 કેસ નોંધાયા હતા.

ગુજરાતમાં કોરોનાનું શું છે ચિત્ર

રાજ્યમાં કોરોના  બેકાબૂ થયો છે. સંક્રમણમાં  સતત વધારો થઈ રહ્યો છે. શનિવારે રાજ્યમાં 1565  નવા કેસ નોંધાયા હતા. જ્યારે વધુ 6  લોકોના કોરોના સંક્રમણથી  મૃત્યુ થયા છે. શનિવારે રાજ્યમાં 969  દર્દીઓએ કોરોનાને મ્હાત આપી હતી. રાજ્યમાં અત્યાર સુધી 2,74,249 લોકો કોરોનાને મ્હાત આપી ચુક્યા  છે. રાજ્યમાં કોરોનાથી રિકવરી રેટ 96.08  ટકા પર પહોંચ્યો છે. હાલ 6737  એક્ટિવ કેસ છે, જેમાંથી 69   લોકો વેન્ટિલેટર પર અને 6668 લોકો સ્ટેબલ છે.