સુરતમાં કાળઝાળ ગરમી: બાળકોને હીટવેવથી બચાવવા શિક્ષણ વિભાગ એક્શનમાં, જાણો 5 નવી ગાઈડલાઈન

શાળાઓમાં મેદાનની રમતો પર સંપૂર્ણ પ્રતિબંધ, કડક ડ્રેસ કોડમાં રાહત અને બાળકોને અપાશે લીંબુ શરબત-છાશ; જાણો DEO ની નવી ગાઇડલાઇન.

Surat Heatwave, 5 New School Guidelines To Protect Children

Source : ai

Show Quick Read

Key points generated by AI, verified by newsroom

• સુરતમાં આકરી ગરમી, શાળાઓમાં મેદાનની પ્રવૃત્તિઓ પર પ્રતિબંધ.
• બાળકોને લીંબુ શરબત/છાશ આપવા, આરામદાયક કપડાં પહેરવાની છૂટ.
• વર્ગખંડમાં પંખા ફરજિયાત, જરૂર પડ્યે નવા પંખા લગાવવા સૂચના.
• હીટસ્ટ્રોક જેવી સ્થિતિ માટે શાળામાં નોડલ ઓફિસરની નિમણૂક કરાઈ.

સુરત શહેરમાં ઉનાળાની શરૂઆતે જ આકરી ગરમી અને હીટવેવનો પ્રકોપ જોવા મળી રહ્યો છે. આ કાળઝાળ ગરમીમાં બાળકો બીમાર ન પડે અને તેમના સ્વાસ્થ્યને નુકસાન ન થાય તે માટે સુરત જિલ્લા શિક્ષણ અધિકારી (DEO) ભગીરથસિંહ પરમારે તમામ શાળાઓ માટે તાત્કાલિક અસરથી એક કડક માર્ગદર્શિકા જાહેર કરી છે. આ નવા આદેશ મુજબ, શાળાઓમાં હવેથી મેદાનમાં થતી પ્રવૃત્તિઓ પર સંપૂર્ણ પ્રતિબંધ મૂકી દેવાયો છે. આ ઉપરાંત, બાળકોને ડીહાઇડ્રેશનથી બચાવવા માટે શાળાઓમાં જ લીંબુ શરબત કે છાશ આપવા સહિતની 5 મહત્વની સૂચનાઓ અપાઈ છે. સુરત મહાનગરપાલિકા અને શિક્ષણ વિભાગ હીટવેવની સ્થિતિ પર સતત નજર રાખી રહ્યા છે.

શાળાઓ માટે જાહેર કરાયેલી 5 નવી ગાઈડલાઈન:

આઉટડોર એક્ટિવિટી પર પ્રતિબંધ: ગરમીના પ્રકોપ વચ્ચે બાળકોને સીધા તડકાથી બચાવવા માટે મેદાનમાં થતી તમામ પ્રવૃત્તિઓ બંધ કરાવવામાં આવી છે. પીટીનો પિરિયડ હોય કે બીજી કોઈ રમતગમત, હવે બધું જ ફરજિયાતપણે ઇન્ડોર એટલે કે વર્ગખંડની અંદર જ કરાવવાનું રહેશે.

લીંબુ શરબત અને છાશની વ્યવસ્થા: શરીરમાં પાણીનું સ્તર જળવાઈ રહે તે માટે શાળાઓને રિસેસ કે નાસ્તાના સમયે બાળકોને લીંબુ શરબત અથવા છાશ જેવા કુદરતી પીણાં પૂરા પાડવા પ્રોત્સાહિત કરાયા છે. સાથે જ ડીહાઈડ્રેશનથી બચવા બાળકોને વારંવાર પાણી પીવા માટે પણ પ્રોત્સાહિત કરવામાં આવશે.

ડ્રેસ કોડમાં મોટી રાહત: ગરમીમાં પરસેવા અને અકળામણને કારણે બાળકો બીમાર ન પડે તે માટે કડક યુનિફોર્મમાંથી રાહત આપવામાં આવી છે. તેના બદલે વિદ્યાર્થીઓ આરામદાયક રહી શકે તેવા કપડાં પહેરીને આવે તો તેને પ્રાધાન્ય આપવા શાળાઓને સૂચના અપાઈ છે.

વર્ગખંડમાં પંખા અને કૂલિંગ ફરજિયાત: વર્ગખંડનું વાતાવરણ ઠંડુ અને હવાની અવરજવરવાળું રહે તે જોવાની જવાબદારી શાળા સંચાલકોની રહેશે. દરેક વર્ગમાં પંખાઓ ચાલુ હાલતમાં હોવા જ જોઈએ. જો કોઈ પંખો બગડેલો હોય તો તેને યુદ્ધના ધોરણે રિપેર કરાવવાનો રહેશે અને જરૂર પડે ત્યાં નવા પંખા નાખવાના રહેશે.

ઈમરજન્સી માટે 'નોડલ ઓફિસર': જો કોઈ બાળકને ગરમીના કારણે અચાનક ચક્કર આવે, ઉલટી થાય કે હીટસ્ટ્રોકના લક્ષણો દેખાય, તો તેના તાત્કાલિક નિવારણ માટે દરેક શાળામાં એક 'નોડલ ઓફિસર' ની નિમણૂક કરાઈ છે. આ ઓફિસર બાળકને તુરંત પ્રાથમિક સારવાર આપશે, વાલીઓને જાણ કરશે અને સ્થિતિ ગંભીર હોય તો 108 એમ્બ્યુલન્સ બોલાવીને નજીકના આરોગ્ય કેન્દ્ર કે હોસ્પિટલ ખસેડવાની વ્યવસ્થા કરશે.

વાલીઓમાં એવી ચર્ચા હતી કે ગરમીના કારણે છેલ્લા પિરિયડમાં બાળકોને વહેલા ઘરે જવા દેવામાં આવશે. પરંતુ, DEO એ આ વાતનો સ્પષ્ટ ઇનકાર કર્યો છે. તેમની દલીલ છે કે જો બાળકોને વહેલા છોડી દેવામાં આવે તો તેઓ બપોરના આકરા તડકામાં રસ્તા પર ફરશે, જે તેમના સ્વાસ્થ્ય માટે વધુ નુકસાનકારક છે. તેના બદલે બાળકો શાળાના સુરક્ષિત અને છાંયડાવાળા વાતાવરણમાં રહીને ઇન્ડોર એક્ટિવિટી કરે તે જ તેમના માટે વધુ હિતાવહ છે.

આ પણ વાંચો

દક્ષિણ ગુજરાતના અનેક જિલ્લાઓના રસ્તા થશે ચકાચક, મુખ્યમંત્રીએ ₹1185 કરોડ મંજૂર કર્યા