ટ્રમ્પે કહ્યું- 'દુનિયાભરના દેશો મારી સામે નાક રગડે છે', ટેરિફ પર ભારતે આપ્યો આ જવાબ
India response to Trump: અમેરિકા દ્વારા ભારતીય ઉત્પાદનો પર ૨૬ ટકા ડ્યુટી લાદવા છતાં ભારત દ્વિપક્ષીય વેપાર કરારને અંતિમ સ્વરૂપ આપવા માટે વાટાઘાટો કરી રહ્યું છે, વિદેશ મંત્રાલયે મજબૂત સંબંધો પર ભાર મૂક્યો.
Donald Trump tariff remark: અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં દાવો કર્યો હતો કે વિશ્વભરના નેતાઓ યુએસ સાથે વેપાર સોદા કરવા માટે આતુર છે અને ટેરિફ અંગે સમાધાન કરવા કંઈપણ કરવા તૈયાર છે. તેમણે એમ પણ કહ્યું હતું કે ઘણા દેશો તેમની સામે નાક રગડી રહ્યા છે. આ નિવેદનની વચ્ચે, ભારતે અમેરિકા દ્વારા તેના ઉત્પાદનો પર વધારાની કસ્ટમ ડ્યુટી લાદવાના પગલાં પર પોતાનો પ્રતિભાવ આપ્યો છે.
યુએસ દ્વારા ભારતીય ઉત્પાદનો પર વધારાની ૨૬ ટકા ડ્યુટી લાદવામાં આવી છે. આ પગલાં અંગે ભારતે બુધવારે જણાવ્યું હતું કે તે પરસ્પર ફાયદાકારક દ્વિપક્ષીય વેપાર કરાર (BTA) ને ટૂંક સમયમાં અંતિમ સ્વરૂપ આપવા માટે અમેરિકા સાથે વાટાઘાટો કરી રહ્યું છે. વિદેશ મંત્રાલયના પ્રવક્તા રણધીર જયસ્વાલે યુએસ ટેરિફ પગલાંના અમલીકરણ પર આ ટિપ્પણી કરી હતી. તેમણે બંને દેશો વચ્ચે મજબૂત વેપાર અને આર્થિક સંબંધો પર ભાર મૂક્યો હતો અને આશા વ્યક્ત કરી હતી કે BTA પરની વાટાઘાટો સફળ થશે. તેમણે એમ પણ જણાવ્યું હતું કે સરકાર યુએસના આ પ્રતિશોધાત્મક ટેરિફની અસરનું મૂલ્યાંકન કરી રહી છે અને આ અંગે સંબંધિત હિતધારકો સાથે વાતચીત કરી રહી છે.
ઉલ્લેખનીય છે કે અમેરિકાએ ભારત સહિત અનેક દેશો પર વળતી કસ્ટમ ડ્યુટી લાદવાની જાહેરાત કરી છે. જો કે, આ બધાની વચ્ચે ફેબ્રુઆરી મહિનામાં વડા પ્રધાન નરેન્દ્ર મોદી અને યુએસ પ્રમુખ ડોનાલ્ડ ટ્રમ્પ આ વર્ષે સપ્ટેમ્બર-ઓક્ટોબર સુધીમાં વેપાર સોદાના પ્રથમ તબક્કાની વાટાઘાટો કરવા માટે સહમત થયા હતા.
ડોનાલ્ડ ટ્રમ્પે પોતાના દાવાને વધુ મજબૂત બનાવતા કહ્યું હતું કે વિશ્વભરના દેશો તેમની સાથે વેપાર સોદા સુધી પહોંચવા માટે ખૂબ જ ઉત્સુક છે. તેમણે કહ્યું, "હું તમને કહું છું, આ દેશો અમારો સંપર્ક કરી રહ્યા છે." તેમણે વધુમાં ઉમેર્યું હતું કે, "તેઓ મારી સામે નાક ઘસતા હોય છે." ટ્રમ્પે છેલ્લા કેટલાક દિવસોમાં વિવિધ દેશો પર અનેક પ્રકારના ટેરિફ લગાવ્યા છે, જેના કારણે વૈશ્વિક વેપાર યુદ્ધની સ્થિતિ સર્જાઈ છે. તેમણે કહ્યું કે, "તેઓ સમાધાન કરવા માટે આતુર છે. તેઓ કહી રહ્યા છે કે, 'કૃપા કરીને સર, અમારી સાથે સોદો કરો, હું આ સર માટે કંઈ પણ કરીશ." ટ્રમ્પ દ્વારા જાહેર કરાયેલા ઘણા નવા ટેરિફ બુધવારે સવારથી અમલમાં પણ આવી ગયા હતા.
આ ઉપરાંત, અમેરિકી રાષ્ટ્રપતિએ દવાઓની આયાત પર પણ વધારાની ડ્યુટી લાદવાની વાત કરી છે. ફોક્સ ન્યૂઝ દ્વારા ટાંકવામાં આવેલા એક નિવેદનમાં ટ્રમ્પે કહ્યું હતું કે, "અમે દવાઓ પર ટેરિફ લગાવવા જઈ રહ્યા છીએ, અને એકવાર અમે તે કરીશું, તો તે આપણા દેશમાં પાછી આવશે કારણ કે અમારી પાસે મોટું બજાર છે." તેમણે વધુમાં કહ્યું હતું કે, "અમે બહુ જલ્દી દવાઓ પર મોટી ડ્યુટીની જાહેરાત કરવા જઈ રહ્યા છીએ. જ્યારે તેઓ આ વિશે સાંભળશે, ત્યારે તેઓ ચીનથી દૂર જશે. તેઓ અન્ય સ્થાનો છોડી દેશે કારણ કે તેમને વેચાણ કરવું પડશે. તેમની મોટાભાગની પ્રોડક્ટ્સ અહીં વેચાય છે.”
ભારત અને અમેરિકા વચ્ચે વેપાર સંબંધો ઘણા મજબૂત રહ્યા છે અને બંને દેશો પરસ્પર લાભ માટે વેપાર કરારને આગળ વધારવા માટે પ્રતિબદ્ધ છે. જો કે, અમેરિકાના આ નવા ટેરિફ પગલાં ચોક્કસપણે બંને દેશો વચ્ચેની વાટાઘાટોને વધુ જટિલ બનાવી શકે છે. હવે જોવાનું એ રહે છે કે ભારત અને અમેરિકા વચ્ચે આ વેપાર કરાર ક્યારે પૂર્ણ થાય છે અને તેનાથી બંને દેશોના વેપાર પર કેવી અસર પડે છે.
ટોપ સ્ટોરી
ટ્રેન્ડિંગ સમાચાર
