સિંધુ જળ સંધિ પર પાકિસ્તાન ફરી UNમાં રોદણા રોવા લાગ્યું, કહ્યું – પાણી આપો નહીં તો અમારા 24 કરોડ લોકોના જીવ...
Pakistan UN appeal against India: પહેલગામ હુમલા બાદ ભારતે સંધિ સ્થગિત કરી, પાકિસ્તાને 'પાણીને હથિયાર' ન બનાવવા અપીલ કરી; PM મોદીએ કહ્યું - 'ભારતનું પાણી ભારતમાં જ વહેશે'.
Indus Water Treaty dispute: જમ્મુ અને કાશ્મીરના પહેલગામમાં થયેલા આતંકવાદી હુમલા બાદ ભારતે સિંધુ જળ સંધિ પર કડક વલણ અપનાવ્યું છે. ભારતે પાકિસ્તાન સાથે સિંધુ નદીના પાણીનો પ્રવાહ બંધ કરી દીધા બાદ પાકિસ્તાને આંતરરાષ્ટ્રીય સ્તરે આ મુદ્દો ઉઠાવ્યો છે. સંયુક્ત રાષ્ટ્રમાં પાકિસ્તાને રડતા કહ્યું કે ભારતનું આ પગલું આંતરરાષ્ટ્રીય નિયમોનું ઉલ્લંઘન છે અને તેના કારણે પાકિસ્તાનના ૨૪ કરોડ લોકોના જીવ જોખમમાં છે. જોકે, ભારતે સ્પષ્ટ શબ્દોમાં જવાબ આપ્યો છે કે જ્યાં સુધી આતંકવાદને પ્રોત્સાહન બંધ નહીં થાય ત્યાં સુધી કોઈ ચર્ચા થશે નહીં.
જમ્મુ અને કાશ્મીરના પહેલગામમાં ૨૨ એપ્રિલે થયેલા આતંકવાદી હુમલા બાદ ભારતે પાકિસ્તાન સાથેની સિંધુ જળ સંધિ પર કડક નિર્ણય લીધો હતો, જેના પગલે પાકિસ્તાને આંતરરાષ્ટ્રીય મંચો પર સતત આ મુદ્દો ઉઠાવવાનું શરૂ કર્યું છે. હવે પાકિસ્તાને સંયુક્ત રાષ્ટ્રમાં કહ્યું છે કે ભારતનો આ નિર્ણય ખૂબ જ ખતરનાક છે, જે આંતરરાષ્ટ્રીય નિયમોની વિરુદ્ધ છે અને પાકિસ્તાનના ૨૪ કરોડ લોકોના જીવનને જોખમમાં મૂકી શકે છે.
પાકિસ્તાનની UN માં રજૂઆત
સંયુક્ત રાષ્ટ્રની એક બેઠકમાં પાકિસ્તાનના પ્રતિનિધિ ઉસ્માન જાદૂને કહ્યું કે, "ભારતનો આ નિર્ણય આંતરરાષ્ટ્રીય નિયમો અને માનવાધિકારોનું ઉલ્લંઘન છે. અમે આની સખત નિંદા કરીએ છીએ." પાકિસ્તાની રાજદૂતે ભારતને નદીના પાણીને રોકવા કે વાળવા જેવા કાર્યો ન કરવા અપીલ કરી, કારણ કે આ નદીઓ લાખો પાકિસ્તાની લોકો માટે જીવનરેખા છે. પાકિસ્તાને વિશ્વને પાણીનો હથિયાર તરીકે ઉપયોગ કરવાના પ્રયાસો બંધ કરવા પણ વિનંતી કરી. પાકિસ્તાની પ્રતિનિધિએ સંયુક્ત રાષ્ટ્ર સુરક્ષા પરિષદને પણ અપીલ કરી કે તેઓ આ બાબત પર નજર રાખે અને સમયસર પગલાં લે જેથી કોઈ મોટી કટોકટી ઊભી ન થાય.
પાકિસ્તાનની ધમકીઓ અને ભારતનો વળતો જવાબ
સિંધુ નદીનું પાણી બંધ થયા પછી, પાકિસ્તાન સતત ધમકીઓ આપી રહ્યું છે. પાકિસ્તાનના ભૂતપૂર્વ વિદેશ મંત્રી બિલાવલ ભુટ્ટોએ તેમના એક નિવેદનમાં કહ્યું હતું કે, "સિંધુ આપણું છે. કાં તો આપણું પાણી અથવા તેમનું લોહી સિંધુમાં વહેશે."
બીજી તરફ, ભારતના વડાપ્રધાન નરેન્દ્ર મોદીએ સ્પષ્ટપણે કહ્યું હતું કે, "ભારતનું પાણી ભારતના લોકો માટે અને ફક્ત ભારતમાં જ વહેશે." આ નિવેદન બાદ, ભારતે વળતો જવાબ આપ્યો અને 'ઓપરેશન સિંદૂર' હાથ ધર્યું, જેમાં પાકિસ્તાન અધિકૃત કાશ્મીર (PoK) માં ૯ આતંકવાદી ઠેકાણાઓનો નાશ કરવામાં આવ્યો. ૭ થી ૧૦ મે દરમિયાન, પાકિસ્તાને ડ્રોન અને મિસાઇલોનો ઉપયોગ કરીને હુમલો કર્યો, પરંતુ ભારતે યોગ્ય જવાબ આપ્યો.
યુદ્ધવિરામ અને ભારતનું મક્કમ વલણ
૧૦ મેના રોજ, બંને દેશોએ યુદ્ધવિરામ કરાર પર હસ્તાક્ષર કર્યા હતા, પરંતુ ભારતે સિંધુ જળ સંધિ પુનઃસ્થાપિત કરવાની પાકિસ્તાનની અપીલને સ્પષ્ટપણે ફગાવી દીધી. ભારત સરકારે ભારપૂર્વક જણાવ્યું છે કે, જ્યાં સુધી પાકિસ્તાન આતંકવાદને પ્રોત્સાહન આપવાનું બંધ નહીં કરે, ત્યાં સુધી અન્ય કોઈ મુદ્દા પર ચર્ચા થશે નહીં. આ વલણ દર્શાવે છે કે આતંકવાદ સામે ભારતનું વલણ મક્કમ છે અને તે દેશના હિતો સાથે કોઈ સમાધાન કરવા તૈયાર નથી.
ટોપ સ્ટોરી
ટ્રેન્ડિંગ સમાચાર
