રાજકોટમાં અરેરાટી: કોટડા સાંગાણીની ગૌશાળામાં ફૂડ પોઈઝનિંગથી 80 ગાયોના ટપોટપ મોત, કલેક્ટર ઘટનાસ્થળે દોડી ગયા
Rajkot cows death: છેલ્લા બે દિવસમાં મોતનું તાંડવ સર્જાતા માલધારી સમાજમાં પ્રચંડ રોષ, સરકાર પાસે તટસ્થ તપાસની માંગ સાથે વેટરનરી ટીમો કામે લાગી.
Rajkot cows death: ગૌપાલન માટે જાણીતા રાજકોટ જિલ્લાના કોટડા સાંગાણી તાલુકાના સાંઢવાયા ગામે એક હચમચાવી નાખનારી ઘટના બની છે. અહીં આવેલી એક ગૌશાળામાં કથિત રીતે ફૂડ પોઈઝનિંગ (ખોરાકી ઝેર) ની અસર થતાં છેલ્લા બે દિવસમાં 80 જેટલી ગાયોના કરુણ મોત નિપજ્યા છે. આ ઘટનાની ગંભીરતાને જોઈને રાજકોટ જિલ્લા કલેક્ટર તાત્કાલિક સ્થળ પર પહોંચ્યા હતા. બીજી તરફ, માલધારી અગ્રણીઓએ આ મામલે આક્રોશ વ્યક્ત કરતા તટસ્થ તપાસની માંગ કરી છે. તંત્ર દ્વારા નિષ્ણાત તબીબોની ટીમને સારવાર માટે ખડકી દેવામાં આવી છે.
શુક્રવારનો દિવસ ગોઝારો સાબિત થયો
રાજકોટ જિલ્લો હંમેશા પશુસંરક્ષણ અને જીવદયા પ્રવૃત્તિઓમાં અગ્રેસર રહ્યો છે. પરંતુ કોટડા સાંગાણી પંથકના સાંઢવાયા ગામમાં આવેલી ગૌશાળા માટે શુક્રવારનો દિવસ કાળ બનીને આવ્યો હતો. આ ગૌશાળામાં અંદાજે 400 જેટલી ગાયોનો નિભાવ કરવામાં આવે છે. પરંતુ છેલ્લા બે દિવસથી અચાનક ગાયોની તબિયત લથડવાની શરૂઆત થઈ હતી અને જોતજોતામાં એક પછી એક એમ કુલ 80 જેટલી ગાયોના મોત થતા સમગ્ર પંથકમાં અરેરાટી વ્યાપી ગઈ છે. ગૌવંશના આવા અકાળે મોતથી જીવદયા પ્રેમીઓમાં ભારે શોક જોવા મળી રહ્યો છે.
દૂષિત ખોરાક બન્યો કાળ?
પ્રાથમિક તપાસ અને વેટરનરી ડોક્ટરોને નિરીક્ષણ પરથી આશંકા છે કે આ દુર્ઘટના પાછળનું મુખ્ય કારણ 'ફૂડ પોઈઝનિંગ' છે. ગાયોને આપવામાં આવેલા ઘાસચારા અથવા ખોરાકમાં કોઈ ઝેરી પદાર્થ ભળી ગયો હોવાને કારણે અથવા ખોરાક બગડી ગયો હોવાને કારણે આ ગંભીર અસર થઈ હોવાનું મનાય છે. ડોક્ટરોએ લોકોને અને પશુપાલકોને ચેતવણી આપી છે કે પશુઓના ખોરાકની ગુણવત્તા બાબતે વિશેષ તકેદારી રાખવી જરૂરી છે.
કલેક્ટરની મુલાકાત અને વહીવટી તંત્રની દોડધામ
એકસાથે આટલી મોટી સંખ્યામાં પશુઓના મોત થતા જિલ્લા વહીવટી તંત્ર હરકતમાં આવ્યું હતું. રાજકોટ જિલ્લા કલેક્ટરે આજે સાંઢવાયા ગામની રૂબરૂ મુલાકાત લીધી હતી અને સ્થિતિનું નિરીક્ષણ કર્યું હતું. તેમણે ગૌશાળાના સંચાલકો સાથે વાતચીત કરી હતી અને ઘટનાની તટસ્થ તપાસના આદેશ આપ્યા છે. બીજી તરફ, બચી ગયેલી અન્ય ગાયોને બચાવવા માટે રાજકોટ, ગોંડલ અને કોટડા સાંગાણીથી પશુ તબીબોની (Veterinary Doctors) નિષ્ણાત ટીમોને તાત્કાલિક બોલાવવામાં આવી છે અને સઘન સારવાર શરૂ કરી દેવામાં આવી છે.
માલધારી સમાજમાં રોષ અને ન્યાયની માંગ
આ ગોઝારી ઘટનાને પગલે માલધારી સમાજના અગ્રણીઓમાં ભારે રોષ જોવા મળી રહ્યો છે. અબોલ જીવોના મોત માટે જવાબદાર કોણ? તે પ્રશ્ન સાથે આગેવાનોએ સરકાર સમક્ષ ઉગ્ર રજૂઆત કરી છે. તેમની માંગ છે કે આ પ્રકરણની નિષ્પક્ષ તપાસ થવી જોઈએ અને જો કોઈની બેદરકારી સામે આવે તો કડક કાર્યવાહી થવી જોઈએ. હાલ તો મૃત ગાયોના સેમ્પલ લઈને લેબોરેટરીમાં મોકલવાની તજવીજ હાથ ધરવામાં આવી છે, જેથી મોતનું ચોક્કસ કારણ જાણી શકાય.
ટોપ સ્ટોરી
ટ્રેન્ડિંગ સમાચાર
