દારૂ પીવાની આ રીત સૌથી જોખમી! 41 વર્ષની ઉંમરે લીવર ફેઈલ થવાનું મોટું કારણ આવ્યું સામે; અત્યારે જ બદલો આ આદત

બિન્જ ડ્રિંકિંગનો ખતરનાક ટ્રેન્ડ વધ્યો છે. અઠવાડિયાના 5 દિવસ પરેજી અને વિકેન્ડમાં પાર્ટી કરવાની આદત લીવર માટે ધીમા ઝેર સમાન છે. આનાથી ફેટી લીવર અને સિરોસિસ જેવી ગંભીર બીમારીઓ થઈ શકે છે.

આજકાલ યુવાનો અને નોકરિયાત વર્ગમાં એક નવો અને જોખમી ટ્રેન્ડ જોવા મળી રહ્યો છે, જેને 'વિકેન્ડ ડ્રિંકિંગ' (Weekend Drinking) તરીકે ઓળખવામાં આવે છે. લોકોમાં એવી ગેરમાન્યતા છે કે જો તેઓ આખા અઠવાડિયા દરમિયાન દારૂથી દૂર રહે અને માત્ર શનિવાર કે રવિવારે જ પાર્ટી કરે, તો તેમના સ્વાસ્થ્યને કોઈ નુકસાન થતું નથી. પરંતુ, આરોગ્ય નિષ્ણાતો (Health Experts) ના મતે આ ધારણા બિલકુલ ખોટી છે. હકીકતમાં, આ પદ્ધતિ તમારા લીવર માટે ધીમા ઝેર સમાન સાબિત થઈ શકે છે.

તમારે સમજવું પડશે કે તમારું લીવર એ કોઈ સ્માર્ટફોન નથી જે 'વિકેન્ડ મોડ' પર ચાલે. લીવરનું મુખ્ય કામ શરીરમાંથી ઝેરી તત્વો (Toxins) બહાર કાઢવાનું છે. જ્યારે તમે અઠવાડિયાના 5 દિવસ પરેજી પાળો છો અને બાકીના 2 દિવસમાં વધુ પડતો દારૂ પીવો છો, ત્યારે તેને મેડિકલ ભાષામાં 'બિન્જ ડ્રિંકિંગ' (Binge Drinking) કહેવાય છે, જે લીવર પર અચાનક મોટો બોજ નાખે છે.

એકસાથે મોટી માત્રામાં આલ્કોહોલ શરીરમાં જવાથી લીવર તેને પ્રોસેસ કરી શકતું નથી, જેના કારણે લીવરના કોષોને ગંભીર નુકસાન થાય છે. નિષ્ણાતો સ્પષ્ટ ચેતવણી આપે છે કે તમે કેટલા દિવસ દારૂ નથી પીતા તેના કરતા મહત્વનું એ છે કે તમે જ્યારે પીવો છો ત્યારે કેટલું અને કેટલી ઝડપથી પીવો છો.

આજના કોર્પોરેટ કલ્ચરમાં શુક્રવારની રાતથી રવિવાર સુધી દારૂ પીવો એ 'સ્ટેટસ સિમ્બોલ' અને લાઈફ બેલેન્સ માનવામાં આવે છે. ઘણા લોકો એમ વિચારે છે કે સોમવારથી શુક્રવાર સુધી ડિટોક્સ (Detox) કરવાથી લીવર રિપેર થઈ જશે. પરંતુ ડોક્ટરો કહે છે કે વિકેન્ડમાં થયેલું નુકસાન 5 દિવસમાં સંપૂર્ણપણે ભરપાઈ થતું નથી.

આ આદત ધીમે ધીમે લીવરને અંદરથી ખતમ કરી નાખે છે. વારંવાર આવું કરવાથી ફેટી લીવર (Fatty Liver), ફાઈબ્રોસિસ અને અંતે લીવર સિરોસિસ (Liver Cirrhosis) જેવી જીવલેણ બીમારી થઈ શકે છે. ખાસ કરીને જેઓ મેદસ્વી (Obesity) છે અથવા જેમને ડાયાબિટીસ છે, તેમના માટે આ ટેવ આગમાં ઘી હોમવા જેવું કામ કરે છે.

લીવરની બીમારીને 'સાયલન્ટ કિલર' માનવામાં આવે છે કારણ કે લીવર ડેમેજની શરૂઆત ખૂબ જ શાંતિથી થાય છે. શરૂઆતના તબક્કામાં કોઈ મોટા લક્ષણો દેખાતા નથી. ઘણીવાર બ્લડ રિપોર્ટ અને અલ્ટ્રાસાઉન્ડ પણ સામાન્ય આવે છે, જેના કારણે વ્યક્તિ ગાફેલ રહે છે. જ્યારે ખબર પડે છે ત્યાં સુધીમાં લીવરનો મોટો ભાગ ડેમેજ થઈ ચૂક્યો હોય છે.

(ડિસ્ક્લેમર: આ લેખ સામાન્ય માહિતી અને સંશોધનો પર આધારિત છે. દારૂનું સેવન સ્વાસ્થ્ય માટે હાનિકારક છે. સ્વાસ્થ્ય સંબંધિત કોઈપણ સમસ્યા માટે ડોક્ટરની સલાહ લેવી અનિવાર્ય છે.)