1 એપ્રિલથી બદલાયા પ્રોવિડન્ટ ફંડ પર ટેક્સ નિયમો, જાણો તમારી વ્યાજની આવક પર ટેક્સ કેવી રીતે ગણવામાં આવશે

પ્રતિકાત્મક તસવીર

નવું નાણાકીય વર્ષ શરૂ થઈ ગયું છે. નવા નાણાકીય વર્ષમાં આવકવેરાને લગતા ઘણા નિયમો બદલાયા છે, જે જાણવું જરૂરી છે. બજેટ 2021 માં પ્રોવિડન્ટ ફંડ નિયમો પરના ટેક્સમાં પણ ફેરફારોની જાહેરાત કરવામાં આવી હતી, જે 1 એપ્રિલ, 2022 થી અમલમાં આવી છે. હવે પ્રોવિડન્ટ ફંડમાં 2.5 લાખથી વધુ રકમ જમા કરાવવાના કિસ્સામાં વધારાની રકમ પરની વ્યાજની આવક સંપૂર્ણપણે કરપાત્ર હશે. આ માટે સેન્ટ્રલ બોર્ડ ઓફ ડાયરેક્ટ ટેક્સે ઈન્કમ ટેક્સ એક્ટ 1962માં નિયમ નંબર 9Dનો સમાવેશ કર્યો છે. આ અંતર્ગત આવા પીએફ સબસ્ક્રાઈબર્સના બે પીએફ/ઈપીએફ એકાઉન્ટ બનાવવામાં આવશે. 2.5 લાખથી વધુની રકમ બીજા ખાતામાં જમા કરવામાં આવશે.

બજેટ 2021માં નાણા મંત્રી નિર્મલા સીતારમણે પ્રોવિડન્ટ ફંડ પર ટેક્સની જાહેરાત કરી હતી. તેની મર્યાદા 2.5 લાખ રૂપિયા નક્કી કરવામાં આવી છે. ટેક્સની ગણતરીમાં કોઈ સમસ્યા ન થાય તે માટે આવકવેરા વિભાગે નિયમ 9Dનો સમાવેશ કર્યો છે.

નવા નિયમ હેઠળ, પ્રોવિડન્ટ ફંડ સબ્સ્ક્રાઇબર્સના બે ખાતા બનાવવામાં આવશે. 2.5 લાખથી વધુ જમા થયેલી રકમ અન્ય ખાતામાં જમા કરવામાં આવશે. આ સિસ્ટમની શરૂઆત પછી, પ્રોવિડન્ટ ફંડ એકાઉન્ટ-1 સંપૂર્ણપણે કરમુક્ત થઈ જશે. પ્રોવિડન્ટ ફંડ એકાઉન્ટ-2 સંપૂર્ણપણે કરપાત્ર રહેશે. કરપાત્ર અને બિન-કરપાત્ર ખાતાઓનું વર્ગીકરણ 1લી એપ્રિલ 2021થી શરૂ થયું છે.

નવા નિયમ અનુસાર, જો એમ્પ્લોયરનું યોગદાન સામેલ નથી, તો આ મર્યાદા 5 લાખ રૂપિયા હશે. આનો અર્થ એ છે કે, જો એમ્પ્લોયરનું યોગદાન જમા ન થયું હોય, તો પીએફ એકાઉન્ટ-1માં 5 લાખ સુધીની રકમ જમા કરાવી શકાય છે અને વ્યાજની આવક સંપૂર્ણપણે કરમુક્ત રહેશે. તેનાથી વધુ રકમ જમા કરાવવા પર તે પીએફ એકાઉન્ટ-2માં જમા કરવામાં આવશે જેના પર વ્યાજની આવક કરપાત્ર રહેશે.

ઉદાહરણ તરીકે, જો કોઈ કર્મચારી પ્રોવિડન્ટ ફંડમાં 1.5 લાખ રૂપિયા અને સ્વૈચ્છિક ભવિષ્ય નિધિમાં 1.5 લાખ રૂપિયા જમા કરે છે, તો 2.5 લાખ રૂપિયા એકાઉન્ટ-1માં જમા કરવામાં આવશે, જ્યારે બાકીના 50 હજાર પીએફ એકાઉન્ટ-2માં જમા કરવામાં આવશે. પીએફ એકાઉન્ટ-1માંથી વ્યાજની આવક સંપૂર્ણપણે કરમુક્ત હશે, જ્યારે પીએફ એકાઉન્ટ-2માંથી વ્યાજની આવક એટલે કે 50 હજાર પરની વ્યાજની આવક કરપાત્ર હશે.