Rain Alert: દક્ષિણ ગુજરાતમાં ગાજવીજ સાથે ભારે વરસાદની આગાહી, જાણો લેટેસ્ટ અપડેટ

રાજ્યના હવામાન વિભાગ દ્વારા ભારે વરસાદને લઈ ફરી એક વખત આગાહી કરવામાં આવી છે.

પ્રતિકાત્મક તસવીર

અમદાવાદ: રાજ્યના હવામાન વિભાગ દ્વારા આજે પણ વરસાદને લઈ આગાહી કરવામાં આવી છે. હવામાન વિભાગની આગાહી મુજબ આગામી 7 દિવસ રાજ્યમાં વરસાદની શકયતા છે. આગામી 48 કલાક બાદ દક્ષિણ ગુજરાતમાં ગાજવીજ સાથે ભારે વરસાદની આગાહી છે.

હવામાન વિભાગની આગાહી મુજબ રાજ્યમાં હાલમાં 2 સિસ્ટમ સક્રિય હોવાથી વરસાદની શક્યતા છે. કચ્છ અને આસપાસના વિસ્તારમાં અપર એર સાયક્લોનિક સર્ક્યુલેશન હોવાના કારણે રાજ્યમાં વરસાદ વરસી શકે છે.

બંગાળની ખાડીમાં પણ એક લો પ્રેશર સક્રિય થઈ છે. જે આગામી 12 કલાકમાં ડિપ્રેશન થઈ શકે છે. આ કારણે રાજ્યના અનેક જિલ્લાઓમાં વરસાદ ભૂક્કા બોલાવશે. દક્ષિણ ગુજરાતના જિલ્લાઓમાં આગામી બે દિવસ સુધી વરસાદની શક્યતા છે.

હવામાન વિભાગે ચોમાસા અંગે માહિતી આપતા જણાવ્યું કે, રાજ્યના મોટાભાગના જિલ્લામાંથી ચોમાસાએ વિદાય લીધી છે. અમદાવાદ સહિત વલ્લભ વિદ્યાનગર અને સૌરાષ્ટ્ર કચ્છના વિવિધ જિલ્લાઓમાંથી પણ દક્ષિણ પશ્ચિમ ચોમાસાએ વિદાય લીધી છે.

ચોમાસાની વિદાય સાથે પણ રાજ્યના ઘણા બધા જિલ્લાઓમાં વરસાદની શક્યતા છે. ક્યાંક ધીમીધારે તો ક્યાંક ભારે વરસાદ વરસી શકે છે.

રાજ્યમાં આ વર્ષે પણ ચોમાસું સારુ રહ્યું છે. સ્ટેટ ઇમરજન્સી ઓપરેશન સેન્ટર-SEOC ગાંધીનગર દ્વારા જણાવાયું છે કે, રાજ્યમાં ચાલુ ચોમાસું સિઝનમાં સાર્વત્રિક વરસાદના પરિણામે 18 સપ્ટેમ્બર 2025ની સ્થિતિએ સરેરાશ 108 ટકાથી વધુ વરસાદ નોંધાયો છે.