કાલે રાજ્યના 13 જિલ્લામાં ગાજવીજ સાથે ધોધમાર વરસાદ ખાબકશે, હવામાન વિભાગે ઓરેન્જ-યલો એલર્ટ કર્યું જાહેર

Gujarat Rain Alert June 28: હવામાન વિભાગની આગાહી અનુસાર બનાસકાંઠા, જામનગર, દેવભૂમિ દ્વારકામાં ભારેથી અતિભારે વરસાદની સંભાવના; સૌરાષ્ટ્ર-દક્ષિણ ગુજરાત પણ ધોવાશે.

Gujarat Monsoon 2025: ગુજરાતમાં મેઘરાજાએ ધમાકેદાર એન્ટ્રી કરી છે અને હવામાન વિભાગે આવતીકાલ, જૂન 28, 2025 માટે રાજ્યના વિવિધ જિલ્લાઓમાં ભારે વરસાદની આગાહી સાથે એલર્ટ જાહેર કર્યું છે. આ આગાહી અનુસાર, રાજ્યના 4 જિલ્લામાં 'ઓરેન્જ એલર્ટ' અને 9 જિલ્લામાં 'યલો એલર્ટ' જાહેર કરવામાં આવ્યું છે, જે સૂચવે છે કે આવતીકાલે અનેક વિસ્તારોમાં ભારેથી અતિભારે વરસાદ પડી શકે છે.

'ઓરેન્જ એલર્ટ' જાહેર કરાયેલા જિલ્લાઓ - હવામાન વિભાગ દ્વારા કચ્છ, બનાસકાંઠા, જામનગર અને દેવભૂમિ દ્વારકા જિલ્લાઓ માટે 'ઓરેન્જ એલર્ટ' જાહેર કરવામાં આવ્યું છે. આ જિલ્લાઓમાં ભારેથી અતિભારે વરસાદ પડવાની સંભાવના છે, જેના કારણે નીચાણવાળા વિસ્તારોમાં પાણી ભરાવા, રસ્તાઓ બ્લોક થવા અને સામાન્ય જનજીવન પ્રભાવિત થવાની શક્યતા છે. સ્થાનિક વહીવટી તંત્રને સાબદું રહેવા અને જરૂરી પગલાં લેવા માટે સૂચના આપવામાં આવી છે.

'યલો એલર્ટ' જાહેર કરાયેલા જિલ્લાઓ - આ ઉપરાંત, રાજ્યના અન્ય 9 જિલ્લાઓ – રાજકોટ, મોરબી, પાટણ, સાબરકાંઠા, નવસારી, વલસાડ, પોરબંદર, જૂનાગઢ અને ગીર સોમનાથ – માટે 'યલો એલર્ટ' જાહેર કરવામાં આવ્યું છે. આ જિલ્લાઓમાં પણ ભારે વરસાદ પડવાની સંભાવના છે. ખાસ કરીને સૌરાષ્ટ્ર અને દક્ષિણ ગુજરાતના કેટલાક વિસ્તારોમાં ગાજવીજ સાથે વરસાદ પડી શકે છે.

જૂન 29-30 ની આગાહી: જૂન 29 અને 30 ના રોજ કચ્છ, અમરેલી, ગીર સોમનાથ, તાપી, ડાંગ, નવસારી, વલસાડ, છોટા ઉદેપુર, નર્મદા, જૂનાગઢ અને પોરબંદર જિલ્લામાં ગાજવીજ સાથે ભારેથી અતિભારે વરસાદનું એલર્ટ જાહેર કરવામાં આવ્યું છે. આ વિસ્તારોમાં જનજીવન પ્રભાવિત થવાની શક્યતા છે, જેથી સ્થાનિકોને સાવચેત રહેવા સૂચના અપાઈ છે.

જુલાઈ 1 ની આગાહી: જુલાઈ 1 ના રોજ નવસારી અને વલસાડમાં ઓરેન્જ એલર્ટ જાહેર કરાયું છે, જે દર્શાવે છે કે આ જિલ્લાઓમાં અતિભારે વરસાદ પડી શકે છે. આ ઉપરાંત, અમરેલી, ગીર સોમનાથ, ભાવનગર, નર્મદા, સુરત, તાપી અને ડાંગ જિલ્લામાં યલો એલર્ટ જાહેર કરાયું છે, જ્યાં ભારે વરસાદની સંભાવના છે.

જુલાઈ 2 ની આગાહી: જુલાઈ 2 થી રાજ્યભરમાં વરસાદનું જોર વધતું જોવા મળશે, જેમાં કુલ 20 જિલ્લામાં ભારેથી અતિભારે વરસાદની આગાહી છે. અરવલ્લી, મહીસાગર, દાહોદ અને છોટા ઉદેપુર જિલ્લામાં અતિભારે વરસાદ માટે ઓરેન્જ એલર્ટ જાહેર કરાયું છે. જ્યારે કચ્છ, પાટણ, મહેસાણા, બનાસકાંઠા, સાબરકાંઠા, ગાંધીનગર, ખેડા, પંચમહાલ, નર્મદા, સુરત, તાપી, નવસારી, ડાંગ, વલસાડ, અમરેલી અને ભાવનગર જિલ્લામાં ભારે વરસાદનું હવામાન વિભાગે યલો એલર્ટ જાહેર કર્યું છે.

જુલાઈ 3 ની આગાહી: જુલાઈ 3 ના રોજ ઉત્તર ગુજરાતમાં અતિભારે વરસાદની આગાહી છે. જેમાં બનાસકાંઠા, સાબરકાંઠા, અરવલ્લી, મહીસાગર, મહેસાણા અને પાટણ જિલ્લામાં ઓરેન્જ એલર્ટ જાહેર કરવામાં આવ્યું છે. આ ઉપરાંત, કચ્છ, સુરેન્દ્રનગર, અમદાવાદ, ગાંધીનગર, ખેડા, આણંદ, વડોદરા, પંચમહાલ, દાહોદ, છોટા ઉદેપુર, ભરૂચ, નર્મદા, સુરત, તાપી, ડાંગ, નવસારી, વલસાડ, બોટાદ અને ભાવનગર જિલ્લામાં ભારે વરસાદને પગલે યલો એલર્ટ જાહેર કરવામાં આવ્યું છે.