Kutch University: કચ્છ યુનિ.નું ભોપાળું, MA સેમ.1ની પરીક્ષામાં 2022નું બેઠું પેપર પૂછી લેવાયું!

કચ્છ યુનિવર્સિટી ફરી એકવાર વિવાદમાં આવી છે. પરીક્ષાનો છબર઼ડો સામે આવ્યો છે. કચ્છ યુનિવર્સિટીમાં હાલ સ્નાતક અને અનુસ્નાતક સેમેસ્ટર 1ની પરીક્ષાઓ ચાલી રહી છે. આ પરીક્ષામાં MA સેમેસ્ટર 1માં 2022નું બેઠું પેપર જ પૂછાતા યુનિર્સિટીમાં ચાલતી લાલિયાવાડી સામે આવી છે. આ સમગ્ર છબરડાને લઇને અખિલ ભારતીય વિદ્યાર્થી પરિષદ દ્વારા યુનિવર્સિટીમાં પરીક્ષા નિયામકને રજૂઆત કરવામાં આવી હતી. ઉલ્લેખનિય છે કે, 25 નવેમ્બરથી કચ્છ યુનિવર્સિટીમાં બીજા તબક્કાની પરીક્ષા થી શરૂ થઈ છે, જેમાં તારીખ 25ના એમએ અર્થશાસ્ત્ર સેમેસ્ટર-1નું પેપર CCEC 101 એકમલક્ષી-1 અર્થશાસ્ત્રનું પેપર અને તા.26ના અર્થશાસ્ત્ર એમ.એ સેમેસ્ટર - 1નું પેપર CCEC 102 સમગ્રલક્ષી-2 નું પેપર વર્ષ 2022નું મૂકી દેતા કચ્છ યુનિવર્સિટીની કામગારી કેવી છે, તેનો જીવતો જાગતો પુરાવો મળ્યો છે. ત્યારે આ છબરડો પ્રકાશમાં આવતા અખિલ ભારતીય વિદ્યાર્થી પરિષદે આ છબરડા માટે જવાબદાર સામે કાર્યવાહી કરવા માંગણી કરી છે. અખિલ ભારતીય વિદ્યાર્થી પરિષદ પેપર સેટ કરનાર સામે કાર્યવાહી કરવાની માંગણી કરી છે. જ્યારે આ મામલે રજૂઆત કરવા વિદ્યાર્થી પરિષદના લોકો પહોંચ્યા તો ત્યાં કોઇ હાજર ન હોવાથી રામધૂન બોલાવીને વિરોધ વ્યક્ત કર્યો હતો.