પોલીસના ડ્રેસમાં આવ્યા અને નામ પૂછી ગોળી મારી, આતંકીઓએ પર્યટકોને આ રીતે નિશાન બનાવ્યા

પોલીસના ડ્રેસમાં આવ્યા અને નામ પૂછી ગોળી મારી, આતંકીઓએ પર્યટકોને આ રીતે નિશાન બનાવ્યા

પહેલગામમાં પર્યટકો પર આતંકી હુમલો

આતંકવાદીઓએ તે જગ્યાને નિશાન બનાવી હતી જ્યાંથી કાશ્મીરીઓની આજીવિકા નિર્ભર છે. પહેલગામનો વિસ્તાર પ્રવાસન સ્થળ છે અને અહીં મોટી સંખ્યામાં પ્રવાસીઓ આવે છે. આ વખતે આતંકીઓએ તેને નિશાન બનાવ્યો હતો.

પોલીસ અધિકારીઓએ જણાવ્યું હતું કે હુમલો બૈસરન ખીણમાં થયો હતો, જ્યાં પગપાળા અથવા ખચ્ચર દ્વારા જ પહોંચી શકાય છે. આજે સવારે પ્રવાસીઓનું ટોળું ત્યાં મુલાકાત માટે ગયું હતું. એક પ્રત્યક્ષદર્શીના જણાવ્યા મુજબ, અજાણ્યા હુમલાખોરોએ નજીકથી પ્રવાસીઓ પર ગોળીબાર કર્યો હતો અને 2 થી 3 આતંકવાદીઓ પોલીસના યુનિફોર્મમાં આવ્યા હતા.

હુમલા સમયે સ્થળ પર હાજર એક મહિલાએ પીટીઆઈને ફોન પર જણાવ્યું હતું કે, "મારા પતિને માથામાં ગોળી વાગી હતી, જ્યારે અન્ય સાત લોકો પણ હુમલામાં ઘાયલ થયા હતા." મહિલાએ પોતાની ઓળખ જાહેર કરી ન હતી પરંતુ ઘાયલોને હોસ્પિટલ લઈ જવા માટે મદદ માંગી હતી.

અધિકારીઓએ જણાવ્યું કે ઘાયલોને બહાર કાઢવા માટે હેલિકોપ્ટર તૈનાત કરવામાં આવ્યું છે. તેમણે કહ્યું કે કેટલાક ઘાયલોને સ્થાનિક લોકો તેમના ખચ્ચર પર નીચે લાવ્યા હતા. પહેલગામ હોસ્પિટલના ડૉક્ટરે જણાવ્યું કે ઘાયલ પ્રવાસીઓને ત્યાં દાખલ કરવામાં આવ્યા છે.

એક વરિષ્ઠ પોલીસ અધિકારીએ જણાવ્યું કે ગોળીબારનો અવાજ સાંભળ્યા બાદ સુરક્ષા દળો પહેલગામ પર્યટન સ્થળની બૈસરન ખીણ તરફ ગયા.

એક સ્થાનિક વ્યક્તિ ઉમરે કહ્યું, "અમે આ સમયે ખૂબ જ પરેશાન છીએ. આ હુમલાને કારણે અમને ઘણું નુકસાન થયું છે. આ દરેક માટે નુકસાન છે. અમે આ હુમલામાં જીવ ગુમાવનારા લોકો માટે પણ ખૂબ જ દુઃખી છીએ. આ ઘટના પછી, અમે પોતે પણ પરેશાન છીએ અને અમારા સ્થાને આવેલા મહેમાનો પણ પરેશાન છે. આવું ન થવું જોઈએ."

એક લાચાર મહિલા રડી રહી હતી અને પોતાના પતિને બચાવવા આજીજી કરી રહી હતી. પીડિતાએ પહલગામમાં આતંકવાદીઓને પ્રવાસીઓ પર ગોળીબાર કરતા જોયા હતા. વીડિયોમાં મહિલા કહેતી જોવા મળી રહી છે કે, કૃપા કરીને મારા પતિને બચાવો. તેને વારંવાર આજીજી કરતા સાંભળી શકાય છે.