‘કોણ જાણે, કાલે સિંધ ભારતમાં પાછું આવી જાય...’ રાજનાથ સિંહના નિવેદનથી પાકિસ્તાનમાં ફફડાટ
સંરક્ષણ મંત્રીએ મોરોક્કોમાં લાલકૃષ્ણ અડવાણીને યાદ કર્યા, કહ્યું- સીમાઓ કાયમી નથી હોતી; POK આપોઆપ ભારતનો હિસ્સો બની જશે.
Rajnath Singh viral video: ભારતના સંરક્ષણ મંત્રી રાજનાથ સિંહે સિંધ પ્રાંતને લઈને એક એવું નિવેદન આપ્યું છે જેનાથી પાડોશી દેશ પાકિસ્તાનની ચિંતા વધી ગઈ છે. મોરોક્કોમાં ભારતીય સમુદાયને સંબોધતા તેમણે સૂચક રીતે કહ્યું હતું કે, "ભલે આજે સિંધ ભારતનો ભાગ નથી, પરંતુ કોણ જાણે છે, ભવિષ્યમાં તે ફરી ભારતમાં ભળી શકે છે." તેમણે ભારપૂર્વક જણાવ્યું હતું કે સીમાઓ બદલાતી રહે છે. આ નિવેદનને પાકિસ્તાન માટે સીધી ચેતવણી માનવામાં આવી રહી છે. આ ઉપરાંત, તેમણે POK (પાકિસ્તાન અધિકૃત કાશ્મીર) વિશે પણ ભારતનું વલણ સ્પષ્ટ કરતા કહ્યું હતું કે ભારતને તેને મેળવવા માટે યુદ્ધ કરવાની પણ જરૂર નહીં પડે.
"સીમાઓ બદલાઈ શકે છે": વાયરલ વીડિયોમાં મોટો દાવો
સંરક્ષણ મંત્રી રાજનાથ સિંહનો એક વીડિયો સોશિયલ મીડિયા પર ખૂબ વાયરલ થઈ રહ્યો છે, જેમાં તેઓ મોરોક્કો ખાતે ભારતીય સમુદાય સાથે વાતચીત કરી રહ્યા છે. આ દરમિયાન તેમણે ઐતિહાસિક અને સાંસ્કૃતિક વારસાને યાદ કરતા કહ્યું હતું કે, 1947 ના ભાગલા પછી સિંધ પ્રાંત પાકિસ્તાનમાં જતો રહ્યો અને ત્યાંના સિંધી ભાઈ-બહેનો ભારતમાં આવ્યા. પરંતુ સીમાઓ કોઈ પથ્થરની લકીર નથી, તે સમય જતાં બદલાઈ પણ શકે છે.
અડવાણીના વિચારો અને સિંધુ નદીનું મહત્વ
પોતાના સંબોધનમાં રાજનાથ સિંહે ભાજપના વરિષ્ઠ નેતા લાલકૃષ્ણ અડવાણીના વિચારોને ટાંક્યા હતા. તેમણે કહ્યું કે, અડવાણીજી માનતા હતા કે સિંધુ નદી માત્ર ભારતીય હિન્દુઓ માટે જ પવિત્ર નથી, પરંતુ સિંધમાં વસતા ઘણા મુસ્લિમો પણ સિંધુના પાણીને મક્કાના 'ઝમઝમ' જેટલું જ પવિત્ર ગણે છે. આ સાંસ્કૃતિક જોડાણ જ ભારત અને સિંધને એકબીજા સાથે બાંધી રાખે છે.
"Who knows, Sindh might become part of India one day," says Indian Defence Minister Rajnath Singh pic.twitter.com/tF9zx2ypIO
— Sidhant Sibal (@sidhant) November 23, 2025
"સિંધના લોકો હંમેશા આપણા રહેશે"
સંરક્ષણ મંત્રીએ આગળ અત્યંત મહત્વપૂર્ણ વાત કરતા કહ્યું, "આજે ભૌગોલિક રીતે સિંધ ભારતનો હિસ્સો ન હોઈ શકે, પરંતુ સાંસ્કૃતિક અને સભ્યતાની દ્રષ્ટિએ તે હંમેશા ભારતનો જ એક ભાગ રહેશે." તેમણે ભવિષ્ય તરફ ઈશારો કરતા કહ્યું કે, "કોણ જાણે છે, કાલે કદાચ સિંધ ફરીથી ભારતમાં પાછું આવી શકે છે." તેમણે ખાતરી આપી હતી કે સિંધુ નદીને પૂજનારા લોકો ભલે ગમે ત્યાં વસતા હોય, તેઓ હંમેશા ભારતના પોતાના જ રહેશે.
POK પર ભારતનું આક્રમક નહીં પણ વ્યૂહાત્મક વલણ
સિંધ ઉપરાંત, રાજનાથ સિંહે પાકિસ્તાન અધિકૃત કાશ્મીર (POK) અંગે પણ ભારતનું સ્પષ્ટ વલણ રજૂ કર્યું હતું. તેમણે દાવો કર્યો હતો કે ભારતને POK પાછું મેળવવા માટે કોઈ સૈન્ય કાર્યવાહી કે આક્રમક પગલાં લેવાની જરૂર નહીં પડે. ત્યાંની પ્રજા જ હવે સ્વતંત્રતાની માંગ કરી રહી છે અને પાકિસ્તાનના જુલમોથી કંટાળી ગઈ છે. આ બદલાતા સંજોગોને જોતા POK આપોઆપ ભારતનો હિસ્સો બની જશે. ઉલ્લેખનીય છે કે, 1947 ના ભાગલા બાદ પાકિસ્તાની સેના અને કબાયલીઓએ ગેરકાયદેસર રીતે આ વિસ્તાર પર કબજો જમાવ્યો હતો, જેને ભારત હંમેશા પોતાનો અભિન્ન અંગ માને છે.
ટોપ સ્ટોરી
ટ્રેન્ડિંગ સમાચાર
