રાજકોટમાં વરસાદે ધબધબાટી બોલાવીઃ રીબડાથી મવડી સુધી મેઘરાજા મહેરબાન, ગ્રામ્યમાં પાક નુકસાન, શહેરમાં શેરીઓમાં પાણી ભરાયા!

Rajkot Rain Alert: રાજકોટમાં અચાનક વાતાવરણ પલટાયું: ગ્રામ્યમાં પાક નુકસાનીનો ભય, શહેરમાં અડધા ઇંચ વરસાદથી પાણી ભરાયા.

Rajkot Rain: ગોંડલના રીબડા, વાડધરી સહિતના ગામડાઓમાં વરસાદ, ખેતરોમાં પાણી ભરાયા; ઉનાળુ પાકને નુકસાનીની ભીતિ; રાજકોટ શહેરના મવડી, ગંજીવાડા, સામાકાંઠા સહિતના વિસ્તારોમાં વરસાદી ઝાપટાં, બાળકોથી મોટા સૌ કોઈ વરસાદમાં ભીંજાયા

Rajkot weather today: રાજકોટ જિલ્લાના વાતાવરણમાં ગુરુવારે બપોર બાદ અચાનક પલટો આવ્યો હતો. સવારથી અસહ્ય ઉકળાટ અને ગરમી બાદ, જિલ્લાના ગ્રામ્ય વિસ્તારો અને રાજકોટ શહેરમાં કમોસમી વરસાદનું આગમન થયું હતું.

આ અણધાર્યા વરસાદથી એક તરફ ખેડૂતોમાં ચિંતા જોવા મળી રહી છે, તો બીજી તરફ શહેરમાં કેટલાક લોકોએ વરસાદનો આનંદ પણ માણ્યો હતો.

રાજકોટ જિલ્લાના ગોંડલ તાલુકાના રીબડા, રીબ દાળિયા, વાડધરી, મેંગણી સહિતના ગ્રામ્ય વિસ્તારોમાં ગુરુવારે બપોર બાદ કમોસમી વરસાદ વરસ્યો હતો. વાડધરી અને મેંગણી ગામમાં ખેતરોમાં પાણી ભરાયા હોવાના અહેવાલ છે.

આ કમોસમી વરસાદથી ઉનાળુ પાક લેવાઈ રહ્યા હોવાથી ખેડૂતોમાં ભારે ચિંતા છવાઈ છે, તેમને ઉભા પાકને નુકસાન થવાનો ડર સતાવી રહ્યો છે.

રાજકોટ શહેરમાં પણ ગુરુવારે બપોર બાદ વાતાવરણમાં પલટો આવતા વરસાદી ઝાપટાં શરૂ થયા હતા. શહેરના મવડી અને તેની આસપાસના વિસ્તારોમાં જોરદાર વરસાદી ઝાપટું પડ્યું હતું. આ ઉપરાંત, ન્યુ સાગર સોસાયટી સહિતના વિસ્તારોમાં શેરીઓમાં પાણી ભરાયા હતા.

ગંજીવાડા, ભાવનગર રોડ, અને સામાકાંઠા વિસ્તારમાં પણ વરસાદ નોંધાયો હતો. શહેરમાં અડધાથી પોણો ઇંચ જેટલો વરસાદ પડ્યો હોવાનો અંદાજ છે.

અચાનક આવેલા વરસાદથી વાતાવરણમાં ઠંડક પ્રસરી હતી, જેનાથી લોકોને ગરમીમાંથી રાહત મળી હતી. શહેરમાં વરસાદ પડતાં જ નાના બાળકોથી લઈ મોટા સૌ કોઈ વરસાદમાં નાહવા માટે બહાર નીકળી પડ્યા હતા અને વરસાદનો આનંદ માણ્યો હતો.

જોકે, આ કમોસમી વરસાદ ખેડૂતો માટે ચિંતાનો વિષય બન્યો છે, ત્યારે શહેરીજનો માટે તે ગરમીમાં રાહત અને ખુશી લઈને આવ્યો હતો.