India vs South Africa: ઋષભ પંતની આ એક ભૂલ ભારે પડી, બીજી ટેસ્ટમાં આફ્રિકા સામે 5 વિકેટે ભારતની હાર
India A vs South Africa A: કેપ્ટનનો ડિક્લેરેશનનો નિર્ણય 'ટીમ ઇન્ડિયા' માટે મોંઘો સાબિત, દક્ષિણ આફ્રિકા 'A' એ 417 રનનો લક્ષ્યાંક પાર કર્યો.
India A vs South Africa A: બેંગલુરુમાં રમાયેલી બીજી અનધિકૃત ટેસ્ટ મેચમાં ભારત 'A' એ દક્ષિણ આફ્રિકા 'A' સામે 5 વિકેટથી હારનો સામનો કરવો પડ્યો છે. ભારત 'A' એ દક્ષિણ આફ્રિકા 'A' ને જીતવા માટે 417 રનનો વિશાળ લક્ષ્યાંક આપ્યો હતો, પરંતુ દક્ષિણ આફ્રિકાની ટીમે માત્ર 5 વિકેટ ગુમાવીને આ લક્ષ્ય સરળતાથી હાંસલ કરી લીધો. ભારતીય ટીમ માટે આ હારનું મુખ્ય કારણ કેપ્ટન ઋષભ પંતનો વહેલી ઇનિંગ્સ ડિક્લેર કરવાનો નિર્ણય માનવામાં આવે છે, જે ટીમ માટે આત્મઘાતી સાબિત થયો. ધ્રુવ જુરેલે બંને ઇનિંગ્સમાં સદી ફટકારી (પ્રથમમાં 132 અને બીજીમાં અણનમ 127) હોવા છતાં, ટીમ ઇન્ડિયાને પરાજય મળ્યો હતો. બીજી ઇનિંગ્સમાં દક્ષિણ આફ્રિકા તરફથી જોર્ડન હાર્મને 91 રનની શાનદાર ઇનિંગ્સ રમી હતી, જ્યારે અંતમાં કોનોર એસ્ટરહુઇઝેને અણનમ 52 રન બનાવી ટીમને જીત અપાવી હતી.
કેપ્ટનના નિર્ણયે પરાજયની ભૂમિકા તૈયાર કરી
બેંગલુરુના મેદાન પર રમાયેલી ભારત 'A' અને દક્ષિણ આફ્રિકા 'A' વચ્ચેની બીજી અનધિકૃત ટેસ્ટ મેચમાં ભારતને નિરાશાજનક હાર મળી છે. ટીમ ઇન્ડિયાને આ પરાજય એટલા માટે વધુ ખૂંચશે કારણ કે બેટ્સમેનોએ પ્રથમ ઇનિંગ્સમાં 34 રનની લીડ અને બીજી ઇનિંગ્સમાં 417 રનનો વિશાળ લક્ષ્યાંક આપવા છતાં બોલરો જીત અપાવી શક્યા નહીં. જોકે, નિષ્ણાતો માને છે કે આ હાર પાછળનું સૌથી મોટું પરિબળ કેપ્ટન ઋષભ પંતનો વહેલી ડિક્લેરેશન કરવાનો નિર્ણય હતો.
જ્યારે ભારત 'A' બીજી ઇનિંગ્સમાં ધ્રુવ જુરેલના અણનમ 127 રન, ઋષભ પંતના 65 રન અને હર્ષ દુબેના 84 રનના યોગદાનથી 382 રન પર મજબૂત સ્થિતિમાં હતી, ત્યારે ત્રીજા દિવસના અંત પહેલા જ ઇનિંગ્સ ડિક્લેર કરવામાં આવી. આ નિર્ણયે દક્ષિણ આફ્રિકાની ટીમને પૂરતો સમય અને બેટિંગ કરવા માટે સરળ લક્ષ્યાંક આપી દીધો, જે કેપ્ટન અને ટીમ મેનેજમેન્ટનો વધુ પડતો આત્મવિશ્વાસ સાબિત થયો. જો ભારતીય ટીમ 450 થી 500 રનનો લક્ષ્યાંક રાખ્યો હોત, તો ભારતીય પિચો પર ચોથી ઇનિંગ્સમાં તે લક્ષ્ય પાર કરવો લગભગ અશક્ય બની જાત.
ધ્રુવ જુરેલનો શાનદાર દેખાવ છતાં હાર
ભારતીય ટીમ માટે આ મેચમાં જો કોઈ સકારાત્મક બાબત રહી હોય તો તે યુવા બેટ્સમેન ધ્રુવ જુરેલનો અલગ જ સ્તરનો દેખાવ હતો. જુરેલે મેચની બંને ઇનિંગ્સમાં સદી ફટકારીને પોતાની પ્રતિભા સાબિત કરી. તેણે પ્રથમ ઇનિંગ્સમાં 132 રન અને બીજી ઇનિંગ્સમાં અણનમ 127 રન બનાવ્યા, જેના કારણે તેણે સિરીઝમાં કુલ 259 રન બનાવીને 'પ્લેયર ઓફ ધ સિરીઝ'નો એવોર્ડ પણ જીત્યો. જોકે, તેનો આ વ્યક્તિગત શાનદાર પ્રદર્શન ટીમની હારને ટાળી શક્યો નહીં. અગાઉ, ભારત 'A' એ પ્રથમ બિનસત્તાવાર ટેસ્ટ મેચ માત્ર 3 વિકેટના નાના અંતરથી જીતી હતી.
દક્ષિણ આફ્રિકાના બેટ્સમેનોની લડાયક બેટિંગ
ભારતીય પરિસ્થિતિઓમાં અંતિમ ઇનિંગ્સમાં 417 રનનો લક્ષ્યાંક પાર કરવો અત્યંત મુશ્કેલ માનવામાં આવે છે, પરંતુ દક્ષિણ આફ્રિકા 'A' ના બેટ્સમેનોએ આ પડકારને ઝીલી લીધો. જોર્ડન હાર્મને 91 રન અને લેસેગો સેનોકવાને 77 રનની ઉપયોગી ઇનિંગ્સ રમીને ટીમને મજબૂત શરૂઆત આપી હતી. ત્યારબાદ ઝુબેર હમઝાએ 77 રન અને અનુભવી બેટ્સમેન ટેમ્બા બાવુમાએ 59 રન બનાવીને ટીમને જીતની નજીક પહોંચાડી દીધી. છેલ્લે, કોનોર એસ્ટરહુઇઝેને અણનમ 52 રનની મહત્ત્વપૂર્ણ ઇનિંગ્સ રમીને ટીમને 5 વિકેટથી ભવ્ય વિજય અપાવ્યો હતો.
ભારતીય બોલરોની વાત કરીએ તો, 417 રનના વિશાળ લક્ષ્યાંકનો બચાવ કરવામાં તેઓ નિષ્ફળ રહ્યા. મોહમ્મદ સિરાજ અને આકાશ દીપ માત્ર એક-એક વિકેટ જ મેળવી શક્યા, જ્યારે કુલદીપ યાદવ કોઈ વિકેટ લઈ શક્યા નહીં. પ્રખ્યાત કૃષ્ણ માત્ર બે વિકેટ ઝડપી શક્યા હતા, જેના પરિણામે ભારતને હારનો સ્વાદ ચાખવો પડ્યો હતો.
ટોપ સ્ટોરી
ટ્રેન્ડિંગ સમાચાર
