IND vs SA: "શ્રેણી હારવાથી અમને કોઈ ફરક નહીં પડે", રવિન્દ્ર જાડેજાના આ નિવેદને ક્રિકેટ જગતમાં મચાવી ખલબલી
Ravindra Jadeja statement on series loss: ગુવાહાટી ટેસ્ટમાં ભારત પર વ્હાઇટવોશનું સંકટ, 549 રનનો ટાર્ગેટ; જાડેજાએ કહ્યું- 'મેચ ડ્રો જશે તો પણ અમારા માટે જીત બરાબર'.
Ravindra Jadeja statement on series loss: ગુવાહાટીમાં રમાઈ રહેલી બીજી ટેસ્ટ મેચમાં ભારતીય ટીમ અત્યંત મુશ્કેલ પરિસ્થિતિમાં મુકાઈ ગઈ છે. દક્ષિણ આફ્રિકાએ ભારત સામે જીતવા માટે 549 રનનો પહાડ જેવો લક્ષ્યાંક મૂક્યો છે, જેનો પીછો કરવો લગભગ અશક્ય જણાય છે. ભારત પર ઘરઆંગણે 2-0 થી 'ક્લીન સ્વીપ' થવાનો ખતરો તોળાઈ રહ્યો છે. આ નાજુક સમયમાં ટીમના સિનિયર ઓલરાઉન્ડર રવિન્દ્ર જાડેજાએ એક એવું નિવેદન આપ્યું છે જેણે સૌને ચોંકાવી દીધા છે. જાડેજાએ કહ્યું છે કે શ્રેણી હારવાથી ટીમને ખાસ કોઈ અસર થશે નહીં અને જો આ મેચ ડ્રો પણ રહે છે, તો તે યુવા ટીમ માટે જીત સમાન ગણાશે.
ભારત માટે 'મિશન ઇમ્પોસિબલ' જેવી સ્થિતિ
મેચના ચોથા દિવસના અંતે ભારતીય ટીમની હાલત કફોડી બની ગઈ હતી. 549 રનના વિશાળ લક્ષ્યાંકનો પીછો કરતા ભારતે માત્ર 27 રનમાં પોતાની 2 મહત્વની વિકેટો ગુમાવી દીધી હતી. હાલમાં ક્રિઝ પર સાઈ સુદર્શન અને કુલદીપ યાદવ અણનમ છે. અંતિમ દિવસે જીતવા માટે ભારતને હજુ 522 રનની જરૂર છે, જે એક ચમત્કાર સિવાય શક્ય નથી લાગતું. બીજી તરફ, દક્ષિણ આફ્રિકાને જીતવા માટે માત્ર 8 વિકેટની જરૂર છે. કોલકાતા ટેસ્ટમાં મળેલી હાર બાદ ભારત શ્રેણીમાં પહેલેથી જ 0-1 થી પાછળ છે.
"મેચ ડ્રો કરવી એ પણ જીત હશે" - રવિન્દ્ર જાડેજા
ચોથા દિવસની રમત પૂર્ણ થયા બાદ મીડિયા સાથે વાત કરતા રવિન્દ્ર જાડેજાએ ટીમની રણનીતિ અને માનસિકતા સ્પષ્ટ કરી હતી. તેમણે કહ્યું, "અમે ટેસ્ટ મેચને બચાવવાનો પૂરો પ્રયાસ કરીશું. ભલે અમે શ્રેણી જીતી શકીએ તેમ નથી, પરંતુ જો અમે આ મેચને ડ્રો કરવામાં સફળ રહીએ, તો તે અમારા માટે 'જીત-જીત' (Win-Win) ની પરિસ્થિતિ હશે." જાડેજાના મતે, હાર નિશ્ચિત દેખાતી હોવા છતાં ટીમ છેલ્લા બોલ સુધી લડત આપવાનો પ્રયાસ કરશે.
હારની અસર અને યુવા ખેલાડીઓનું ભવિષ્ય
જ્યારે જાડેજાને પૂછવામાં આવ્યું કે શું આ હારની અસર ભવિષ્ય પર પડશે? ત્યારે તેમણે કહ્યું, "મને નથી લાગતું કે આ હારની અસર આગામી શ્રેણી પર પડશે. જોકે, એક ક્રિકેટર તરીકે કોઈ પણ ઘરઆંગણે હારવા માંગતું નથી." જાડેજાએ ભારપૂર્વક જણાવ્યું કે આ શ્રેણી યશસ્વી જયસ્વાલ, સાઈ સુદર્શન, નીતિશ કુમાર રેડ્ડી, ધ્રુવ જુરેલ અને વોશિંગ્ટન સુંદર જેવા યુવા ખેલાડીઓ માટે શીખવાનો એક મોટો અનુભવ સાબિત થશે. આંતરરાષ્ટ્રીય ક્રિકેટ સરળ નથી અને આ પડકારો તેમને ભવિષ્ય માટે તૈયાર કરશે.
"ભારતમાં હારવું મોટી વાત બની જાય છે"
જાડેજાએ ભારતીય ક્રિકેટ ચાહકોની માનસિકતા પર પણ ટિપ્પણી કરી હતી. તેમણે સમજાવ્યું કે જ્યારે ભારત ઘરઆંગણે જીતે છે, ત્યારે લોકો તેને સામાન્ય ગણે છે અને કોઈ મોટી વાત માનતા નથી. પરંતુ જ્યારે હાર મળે છે, ત્યારે તે બહુ મોટો મુદ્દો બની જાય છે. ખાસ કરીને જ્યારે ટીમમાં 3-4 બિનઅનુભવી યુવા ખેલાડીઓ રમી રહ્યા હોય, ત્યારે હારનું ધ્યાન તેમના અનુભવના અભાવ પર કેન્દ્રિત થાય છે. હાલમાં ટીમ ટ્રાન્ઝિશન (પરિવર્તન) ના તબક્કામાંથી પસાર થઈ રહી છે, તેથી આવા પરિણામો સ્વીકારવા પડે છે.
ટોપ સ્ટોરી
ટ્રેન્ડિંગ સમાચાર
