IND vs SA ODI: ટીમ ઈન્ડિયામાં મોટો ભૂકંપ! કેપ્ટન સહિત 4 સુપરસ્ટાર ખેલાડીઓ ટીમમાંથી બહાર, જાણો કોનું પત્તું કપાયું?

IND vs SA ODI squad: ઓસ્ટ્રેલિયા સિરીઝ બાદ ટીમનું ચિત્ર બદલાયું: કેએલ રાહુલ સંભાળશે કમાન, ઐયર અને સિરાજની જગ્યાએ કોને મળી તક?

ટીમ ઇન્ડિયા (ફાઈલ ફોટો)

Source : PTI

IND vs SA ODI squad: દક્ષિણ આફ્રિકા સામે રમાનારી આગામી ODI શ્રેણી માટે ભારતીય ટીમની જાહેરાત કરી દેવામાં આવી છે. ઓસ્ટ્રેલિયા સામેની ગત શ્રેણીની સરખામણીએ આ વખતે ટીમ ઈન્ડિયામાં ધરખમ ફેરફારો કરવામાં આવ્યા છે. સૌથી મોટા સમાચાર એ છે કે નિયમિત કેપ્ટન શુભમન ગિલ સહિત કુલ 4 મુખ્ય ખેલાડીઓને આ શ્રેણીમાંથી બહાર રાખવામાં આવ્યા છે. ગિલની ગેરહાજરીમાં સુકાની પદનો તાજ અનુભવી વિકેટકીપર-બેટ્સમેન કેએલ રાહુલના શિરે મૂકવામાં આવ્યો છે. આવો જાણીએ ટીમમાં થયેલા આ મોટા બદલાવો વિશે વિગતવાર.

ઓસ્ટ્રેલિયા સિરીઝના 4 સ્ટાર ખેલાડીઓ બહાર

છેલ્લે જ્યારે ભારતીય ટીમ ઓસ્ટ્રેલિયા સામે મેદાનમાં ઉતરી હતી, ત્યારે ટીમનું સંયોજન અલગ હતું. આ વખતે પસંદગીકારોએ કડક નિર્ણયો લીધા છે. ઓસ્ટ્રેલિયા શ્રેણીનો ભાગ રહેલા ચાર મહત્વના ખેલાડીઓ - શુભમન ગિલ, શ્રેયસ ઐયર, અક્ષર પટેલ અને મોહમ્મદ સિરાજ - દક્ષિણ આફ્રિકા સામેની ટીમમાં પસંદગી પામ્યા નથી. આ ફેરફારો પાછળ ઈજા અને રણનીતિક કારણો જવાબદાર છે.

ઈજાના કારણે કેપ્ટન ગિલ આઉટ

નિયમિત કેપ્ટન શુભમન ગિલ ગરદનની ઈજા (Neck Spasm) થી પીડાઈ રહ્યા છે. પ્રથમ ટેસ્ટ મેચ દરમિયાન તેમને ગરદનમાં દુખાવો ઉપડ્યો હતો, જેના કારણે તેમને હોસ્પિટલમાં દાખલ કરવા પડ્યા હતા અને તેઓ બીજી ટેસ્ટ પણ રમી શક્યા ન હતા. મેડિકલ ટીમે તેમને આરામની સલાહ આપી હોવાથી, તેઓ આ ODI શ્રેણી ગુમાવશે. તેમની ગેરહાજરીમાં કેએલ રાહુલ ટીમનું નેતૃત્વ કરશે.

શ્રેયસ ઐયરના સ્થાને તિલક વર્માને તક

ઓસ્ટ્રેલિયા સામેની શ્રેણીમાં ઉપ-કપ્તાનની ભૂમિકા ભજવનાર શ્રેયસ ઐયર પણ ઈજાના કારણે હાલ અનફિટ છે. મિડલ ઓર્ડરમાં તેમની ખોટ પૂરવા માટે પસંદગીકારોએ યુવા ડાબોડી બેટ્સમેન તિલક વર્મા પર વિશ્વાસ મૂક્યો છે. તિલક વર્માએ તાજેતરમાં જ દક્ષિણ આફ્રિકા 'A' સામેની મેચોમાં શાનદાર પ્રદર્શન કર્યું હતું, જેનું ઈનામ તેમને સિનિયર ટીમમાં સ્થાન આપીને આપવામાં આવ્યું છે.

બોલિંગમાં નવા ચહેરાઓ પર ભરોસો

સ્પિનર અક્ષર પટેલ અને ફાસ્ટ બોલર મોહમ્મદ સિરાજને પણ આ પ્રવાસ માટે આરામ આપવામાં આવ્યો છે. તેમના સ્થાને પેસ એટેકને ધારદાર બનાવવા માટે પ્રસિદ્ધ કૃષ્ણા, અર્શદીપ સિંહ અને હર્ષિત રાણા જેવા બોલરોને ટીમમાં સામેલ કરવામાં આવ્યા છે.

દક્ષિણ આફ્રિકા સામેની ભારતની નવી ટીમ:

રોહિત શર્મા, યશસ્વી જયસ્વાલ, વિરાટ કોહલી, તિલક વર્મા, કેએલ રાહુલ (કેપ્ટન/વિકેટકીપર), ઋષભ પંત (વિકેટકીપર), વોશિંગ્ટન સુંદર, રવિન્દ્ર જાડેજા, કુલદીપ યાદવ, નીતિશ કુમાર રેડ્ડી, હર્ષિત રાણા, ઋતુરાજ ગાયકવાડ, પ્રસિદ્ધ કૃષ્ણા, અર્શદીપ સિંહ અને ધ્રુવ જુરેલ.

આ પણ વાંચો

Women's Blind T20 World Cup: ભારતીય દીકરીઓનો વિશ્વમાં ડંકો! નેપાળને હરાવી 19 દિવસમાં બીજીવાર જીત્યો વર્લ્ડ કપ