IND vs BAN: કિંગ કોહલીએ બનાવ્યો 'વિરાટ' રેકોર્ડ, વર્લ્ડકપમાં ત્રણ હજાર રન બનાવનાર પ્રથમ બેટ્સમેન બન્યો 

બાંગ્લાદેશ વિરૂદ્ધ આ ઇનિંગ સાથે કોહલીએ T20 વર્લ્ડ કપમાં 1200 રનના આંકડાને સ્પર્શ કર્યો હતો. કોહલી T20 વર્લ્ડ કપમાં સૌથી વધુ રન બનાવનાર બેટ્સમેન છે.

વિરાટ કોહલી

Virat Kohli 3,000 Runs In World Cup: વિરાટ કોહલી(virat kohli)એ વર્લ્ડ કપ (world cup 2024)સ્ટેજ પર ઈતિહાસ રચી દીધો. આ દિવસોમાં રમાઈ રહેલા T20 વર્લ્ડ કપ 2024માં કોહલીએ બાંગ્લાદેશ સામે રમતી વખતે વર્લ્ડ કપ (ODI અને T20 વર્લ્ડ કપ સહિત)માં 3,000 રનના આંકડાને સ્પર્શ કર્યો હતો. કોહલી આ આંકડાને સ્પર્શનાર પ્રથમ બેટ્સમેન બન્યો છે. બાંગ્લાદેશ સામેની મેચમાં કોહલીએ 28 બોલમાં 1 ફોર અને 3 સિક્સરની મદદથી 37 રન બનાવ્યા હતા.

બાંગ્લાદેશ વિરૂદ્ધ આ ઇનિંગ સાથે કોહલીએ T20 વર્લ્ડ કપમાં 1200 રનના આંકડાને સ્પર્શ કર્યો હતો. કોહલી T20 વર્લ્ડ કપમાં સૌથી વધુ રન બનાવનાર બેટ્સમેન છે. અત્યાર સુધી 32 મેચોની 30 ઇનિંગ્સમાં બેટિંગ કરીને તેણે 63.52ની એવરેજ અને 129.78ની સ્ટ્રાઇક રેટથી 1207 રન બનાવ્યા છે. આ સમયગાળા દરમિયાન, તેણે 14 અડધી સદી ફટકારી છે, જેમાં હાઈ સ્કોર 89* રન હતો.

આ સિવાય કોહલીએ વનડે વર્લ્ડ કપની 37 મેચોની 37 ઇનિંગ્સમાં 59.83ની એવરેજથી 1795 રન બનાવ્યા છે. આ સમયગાળા દરમિયાન, તેણે 5 સદી અને 12 અડધી સદી ફટકારી છે, જેમાં તેનો હાઈ સ્કોર 117 રન છે. 2023માં રમાયેલા ODI વર્લ્ડ કપમાં કોહલી સૌથી વધુ રન બનાવનાર બેટ્સમેન હતો. કોહલીએ 11 મેચની 11 ઇનિંગ્સમાં બેટિંગ કરી અને 95.62ની એવરેજથી 765 રન બનાવ્યા હતા.  આ દરમિયાન તેણે 3 સદી અને 6 અડધી સદી ફટકારી હતી.

T20 વર્લ્ડ કપ 2024માં અત્યાર સુધી બેટ શાંત હતું

તમને જણાવી દઈએ કે 2024 T20 વર્લ્ડ કપમાં બાંગ્લાદેશ સામેની મેચ પહેલા વિરાટ કોહલીનું બેટ શાંત દેખાતું હતું. પ્રથમ ત્રણ મેચમાં તે ડબલ ફિગર પણ પાર કરી શક્યો નહોતો. ટૂર્નામેન્ટની પ્રથમ ત્રણ મેચમાં કોહલીએ આયર્લેન્ડ સામે માત્ર 01 રન અને પાકિસ્તાન સામે 04 રન બનાવ્યા હતા, જ્યારે અમેરિકા સામેની મેચમાં કોહલી ખાતું ખોલાવ્યા વિના જ આઉટ થયો હતો.

ત્યારબાદ અફઘાનિસ્તાન સામેની સુપર-8 મેચમાં તેણે પોતાની લય પાછી મેળવી હતી અને 24 બોલમાં 1 છગ્ગાની મદદથી 24 રન બનાવ્યા હતા. ત્યારબાદ બાંગ્લાદેશ સામે તેણે સારી ઇનિંગ રમી અને પોતાની લય પાછી મેળવી લીધી, જેના માટે કોહલી જાણીતો છે. આવનારા દિવસોમાં પણ વર્લ્ડકપ 2024માં વિરાટ કોહલીના બેટથી ખૂબ જ શાનદાર પ્રદર્શન જોવા મળી શકે છે.