IPL ફાઇનલ ૨૦૨૫: વરસાદ આવે તો પણ મેચ રદ નહીં થાય! જાણો કટ-ઓફ સમય, રિઝર્વ ડે અને નવા નિયમો
RCB vs PBKS વચ્ચેની ટાઇટલ મેચ ૩ જૂને અમદાવાદમાં, BCCI એ મેચ પૂર્ણ કરવા ૧૨૦ મિનિટનો વધારાનો સમય અને ૪ જૂનનો રિઝર્વ ડે રાખ્યો.
IPL 2025 final rain rules: આઈપીએલ ૨૦૨૫ ની ફાઇનલ મેચ ૩ જૂને અમદાવાદના નરેન્દ્ર મોદી સ્ટેડિયમ ખાતે રમાવાની છે, જેમાં રોયલ ચેલેન્જર્સ બેંગ્લોર (RCB) અને પંજાબ કિંગ્સ (PBKS) ટાઈટલ માટે ટકરાશે. આ બંને એવી ટીમો છે જેમણે અત્યાર સુધી એક પણ આઈપીએલ ખિતાબ જીત્યો નથી. ક્વોલિફાયર-૨ મેચ દરમિયાન વરસાદને કારણે મેચ ૨ કલાક મોડી શરૂ થઈ હતી, જેને ધ્યાનમાં રાખીને BCCI એ ફાઇનલ માટે વરસાદ સંબંધિત નવા નિયમો બનાવ્યા છે.
ઇન્ડિયન પ્રીમિયર લીગ (IPL) ૨૦૨૫ ની ફાઇનલ મેચને આડે હવે ૨૪ કલાકથી પણ ઓછો સમય બાકી છે. ૩ જૂને અમદાવાદના નરેન્દ્ર મોદી સ્ટેડિયમ ખાતે રોયલ ચેલેન્જર્સ બેંગ્લોર (RCB) અને પંજાબ કિંગ્સ (PBKS) વચ્ચે ટાઇટલ માટે જંગ ખેલાશે. આ બંને ટીમો અત્યાર સુધી IPL નો ખિતાબ જીતવામાં સફળ રહી નથી.
તાજેતરમાં, ક્વોલિફાયર-૨ મેચ પણ આ જ મેદાન પર રમાઈ હતી, જેમાં ભારે વરસાદને કારણે મેચ લગભગ ૨ કલાક મોડી શરૂ થઈ હતી. આ પરિસ્થિતિને ટાળવા માટે, BCCI એ પ્લેઓફ સ્ટેજ શરૂ થાય તે પહેલાં જ કેટલાક નવા નિયમો બનાવ્યા છે, ખાસ કરીને વરસાદની સ્થિતિને ધ્યાનમાં રાખીને.
વરસાદ માટેના IPL ફાઇનલ નિયમો
BCCI દ્વારા મેચ વરસાદને કારણે રદ ન થાય તે સુનિશ્ચિત કરવા માટે ૧૨૦ મિનિટનો વધારાનો સમય ઉમેરવામાં આવ્યો છે. સામાન્ય રીતે, સાંજની મેચ સાંજે ૭:૩૦ વાગ્યે શરૂ થાય છે. નવા નિયમો અનુસાર, જો મેચ રાત્રે ૯:૩૦ વાગ્યે શરૂ થાય તો પણ ઓવરમાં કોઈ ઘટાડો કરવામાં આવશે નહીં. મુંબઈ-પંજાબ વચ્ચેની બીજી ક્વોલિફાયર મેચ રાત્રે ૯:૪૫ વાગ્યે શરૂ થઈ હોવા છતાં, ૨૦ ઓવરની સંપૂર્ણ મેચ રમાઈ હતી.
કટ-ઓફ સમય અને પરિણામ
કટ-ઓફ સમય એ સમયગાળો છે જ્યાં સુધી મેચ રદ જાહેર કરી શકાતી નથી. પહેલા મેચ રદ જાહેર કરવાનો કટ-ઓફ સમય ૧૦:૫૬ હતો, પરંતુ નવા નિયમો પછી, જો રાત્રે ૧૧:૫૬ વાગ્યા સુધી એક પણ બોલ ન રમાય, તો જ મેચ રદ જાહેર કરવામાં આવશે. મેચનું પરિણામ લાવવા માટે, બંને ટીમોએ ઓછામાં ઓછી પાંચ-પાંચ ઓવર રમવી જરૂરી છે.
ક્વોલિફાયર-૨ મેચનું ઉદાહરણ લઈએ તો, મેચ રાત્રે ૯:૪૫ વાગ્યે શરૂ થઈ હતી અને લગભગ ૧:૩૦ વાગ્યે સમાપ્ત થઈ હતી, જે દર્શાવે છે કે મેચ રાત્રિના ૧૨ વાગ્યા પછી પણ રમી શકાય છે.
ફાઇનલ માટે રિઝર્વ ડે
ફાઇનલ માટે ૩ જૂનની તારીખ નક્કી કરવામાં આવી છે, પરંતુ જો વરસાદને કારણે મેચ રાત્રે ૧૧:૫૬ વાગ્યા સુધી પણ શરૂ ન થઈ શકે, તો આવી પરિસ્થિતિ માટે ૪ જૂનનો રિઝર્વ ડે રાખવામાં આવ્યો છે. આનો અર્થ એ થયો કે જો મેચ ૩ જૂને પૂર્ણ ન થાય, તો મેચ ૪ જૂને યોજાશે. આ નિર્ણયથી ચાહકોને આશા છે કે ફાઇનલ મેચ પૂરી રમાઈ શકશે અને વિજેતા ટીમ નક્કી થઈ શકશે.
ટોપ સ્ટોરી
ટ્રેન્ડિંગ સમાચાર
