સાઈના નેહવાલ અને પારૂપલ્લી કશ્યપ થયા અલગ, સાત વર્ષ અગાઉ થયા હતા લગ્ન
સાઇના નેહવાલે રવિવારે મોડી રાત્રે તેની ઇન્સ્ટાગ્રામ સ્ટોરીમાં એક ચોંકાવનારું નિવેદન જાહેર કર્યું હતું
સ્ટાર બેડમિન્ટન ખેલાડી સાઇના નેહવાલે રવિવારે તેના લાંબા સમયના સાથી પારૂપલ્લી કશ્યપથી અલગ થવાની જાહેરાત કરી હતી. સાઇનાએ તેના ઇન્સ્ટાગ્રામ હેન્ડલ પર એક નિવેદન જાહેર કરીને આ અંગે માહિતી આપી હતી. સાઇના અને પારૂપલ્લીના લગ્ન 7 વર્ષ પહેલા થયા હતા. બંને હૈદરાબાદની પુલેલા ગોપીચંદ બેડમિન્ટન એકેડેમીમાં ટ્રેનિંગ મેળવતા હતા. લાંબા સમય સુધી રિલેશનશીપમાં રહ્યા બાદ બંનેએ 2018માં લગ્ન કર્યા હતા.
View this post on Instagram
સાઇના નેહવાલે 2012માં લંડન ઓલિમ્પિકમાં બ્રોન્ઝ મેડલ જીત્યો હતો અને 2015માં વર્લ્ડ બેડમિન્ટન રેન્કિંગમાં પ્રથમ સ્થાને પહોંચીને ઇતિહાસ રચ્યો હતો. તે વિશ્વની નંબર વન શટલર બનનારી પ્રથમ ભારતીય મહિલા ખેલાડી હતી. સાઇના રમતગમતમાં ભારત માટે વર્લ્ડ આઇકોન રહી છે. પારૂપલ્લી કશ્યપે 2014માં ગ્લાસગો કોમનવેલ્થ ગેમ્સમાં ગોલ્ડ મેડલ જીત્યો હતો અને વર્લ્ડ રેન્કિંગમાં છઠ્ઠા સ્થાને પહોંચ્યો હતો. તેણે આંતરરાષ્ટ્રીય સ્તરે સતત સારા પ્રદર્શનથી પોતાની ઓળખ બનાવી હતી.
સાઇના નેહવાલે રવિવારે મોડી રાત્રે તેની ઇન્સ્ટાગ્રામ સ્ટોરીમાં એક ચોંકાવનારું નિવેદન જાહેર કર્યું હતું. તેણીએ લખ્યું હતું કે, 'જીવન ક્યારેક આપણને અલગ દિશામાં લઈ જાય છે. ઘણો વિચાર કર્યા પછી કશ્યપ પારુપલ્લી અને મેં અલગ થવાનો નિર્ણય લીધો છે. અમે અમારા માટે અને એકબીજા માટે શાંતિ, વિકાસ અને રાહત પસંદ કરી રહ્યા છીએ. હું યાદો માટે આભારી છું અને આગળ વધતાં ફક્ત શ્રેષ્ઠની ઇચ્છા રાખું છું. આ સમય દરમિયાન અમારી ગોપનીયતાને સમજવા અને આદર આપવા બદલ આભાર.' કશ્યપે હજુ સુધી કોઈ નિવેદન જાહેર કર્યું નથી.
પ્રકાશ પાદુકોણ અને પુલેલા ગોપીચંદ પછી કોઈ પણ ભારતીય ખેલાડી બેડમિન્ટનની રમતમાં વૈશ્વિક સ્તરે છાપ છોડી શક્યો નહીં. તે સાઈના નેહવાલ હતી જેણે 2008 બેઇજિંગ ઓલિમ્પિકમાં મહિલા સિંગલ્સની ક્વાર્ટર ફાઇનલમાં પહોંચીને ભારતમાં આ રમતને નવું જીવન આપ્યું. ચાર વર્ષ પછી તે 2012 લંડન ઓલિમ્પિકમાં બ્રોન્ઝ મેડલ જીતીને ઓલિમ્પિક પોડિયમ સુધી પહોંચનારી પ્રથમ ભારતીય બેડમિન્ટન ખેલાડી બની હતી. આ પછી અન્ય બેડમિન્ટન ખેલાડીઓ આ રમતમાં વિશ્વ સ્તરે દેશને ગૌરવ અપાવી રહ્યા છે.
કશ્યપે ભારતીય બેડમિન્ટનની ખોવાયેલી ઓળખ પાછી લાવી
પારુપલ્લી કશ્યપે 2010 દિલ્હી કોમનવેલ્થ ગેમ્સમાં બ્રોન્ઝ મેડલ જીતીને ચર્ચામાં આવ્યો હતો. તેણે 2012 લંડન ઓલિમ્પિકમાં નીલુકા કરુણારત્નેને હરાવીને ક્વાર્ટર ફાઇનલમાં પ્રવેશ કર્યો અને આમ કરનાર પ્રથમ ભારતીય પુરુષ બેડમિન્ટન ખેલાડી બન્યો હતો. તેમણે 2014 ગ્લાસગો કોમનવેલ્થ ગેમ્સમાં ગોલ્ડ મેડલ જીતીને ઇતિહાસ રચ્યો હતો. તે 32 વર્ષમાં આવું કરનાર પ્રથમ પુરુષ ભારતીય બેડમિન્ટન ખેલાડી હતા. સાઈના અને પારુપલ્લી 1997માં એક કેમ્પ દરમિયાન મળ્યા હતા.
બંને વચ્ચે નિકટતા હૈદરાબાદ એકેડેમીમાં વધી
જ્યારે 2004માં ગોપીચંદે હૈદરાબાદમાં પોતાની બેડમિન્ટન એકેડેમીની સ્થાપના કરી હતી ત્યારે બંનેએ તેમના હેઠળ તાલીમ લેવાનું શરૂ કર્યું અને અહીંથી તેમની વચ્ચે નિકટતા વધતી ગઈ. જોકે, 2018માં લગ્ન ન થયા ત્યાં સુધી દુનિયાને તેમના સંબંધ વિશે ખબર નહોતી. પારુપલ્લી કશ્યપે ESPN ને આપેલા ઇન્ટરવ્યૂમાં સાઈના સાથેના પોતાના સંબંધ વિશે કહ્યું હતું કે, 'તે એક સ્કૂલનો પ્રેમ હતો, નિર્દોષ હતો અને તમારા મિત્રોને કહેવા વિશે હતું કે તમારી એક ગર્લફ્રેન્ડ છે.'
ટોપ સ્ટોરી
ટ્રેન્ડિંગ સમાચાર
