સ્મિથને પછાડીને ફરી નંબર વન ટેસ્ટ બેટ્સમેન બન્યો વિરાટ કોહલી

નવી દિલ્હીઃ ઇગ્લેન્ડ સામેની ત્રીજી ટેસ્ટ મેચમાં શાનદાર પ્રદર્શન કરનાર ટીમ ઇન્ડિયાનો કેપ્ટન વિરાટ કોહલી આઇસીસી ટેસ્ટ રેન્કિંગમાં વિશ્વનો નંબર વન બેટ્સમેન બની ગયો છે. કોહલીએ ફરીવાર ઓસ્ટ્રેલિયન બેટ્સમેન સ્ટીવ સ્મિથને પાછળ છોડી દીધો છે. કોહલીએ ત્રીજી ટેસ્ટમાં એક ઇનિંગમાં 97 અને બીજી ઇનિંગમાં 103 રન ફટકાર્યા હતા.

વિરાટ કોહલી ટેસ્ટ રેન્કિંગમાં સૌથી વધારે રેટિંગ પોઈન્ટ હાંસલ કરનારો ભારતીય બેટ્સમેન બની ગયો છે. તેણે ભારતના પૂર્વ કેપ્ટન સુનીલ ગાવસ્કરનો રેકોર્ડ તોડી નાંખ્યો છે. સુનીલ ગાવસ્કરે 1979માં 916 રેટિંગ પોઈન્ટ હાંસલ કર્યા હતા. જેને અત્યાર સુધી કોઈ ભારતીય બેટ્સમેન તોડી શક્યું નહોતું.

બોલ ટેમ્પરિંગમાં 1 વર્ષના પ્રતિબંધનો સામનો કરી રહેલો ઓસ્ટ્રેલિયાનો સ્ટીવ સ્મિથ 929 પોઇન્ટ સાથે બીજા નંબર પર છે.જ્યારે ન્યૂઝિલેન્ડનો કેન વિલિયમસન 847 પોઈન્ટ સાથે ત્રીજા નંબર પર છે. ઈંગ્લેન્ડનો ટેસ્ટ કેપ્ટન જો રૂટ ખરાબ પ્રદર્શનને કારણે 818 પોઇન્ટ સાથે પાંચમા નંબર પર પહોંચી ગયો છે.

આ અગાઉ પ્રથમ બે ટેસ્ટમાં ખરાબ પ્રદર્શનને કારણે કોહલીએ પ્રથમ નંબરનું સ્થાન ગુમાવ્યું હતું. કોહલીએ 937 પોઇન્ટ મેળવ્યા છે જે ભારતના ઇતિહાસમાં અત્યાર સુધી કોઇ પણ બેટ્સમેને મેળવ્યા નથી.