WhatsAppની મોટી કાર્યવાહી, એક મહિનામાં બ્લોક કર્યા 84 લાખથી વધુ એકાઉન્ટસ

ઇન્સ્ટન્ટ મેસેજિંગ પ્લેટફોર્મ વોટ્સએપે છેતરપિંડીની ઘટનાઓને રોકવા માટે એક મોટું પગલું ભર્યું છે

પ્રતિકાત્મક તસવીર

Source : Unsplash/Mariia Shalabaieva

ઇન્સ્ટન્ટ મેસેજિંગ પ્લેટફોર્મ વોટ્સએપે છેતરપિંડીની ઘટનાઓને રોકવા માટે એક મોટું પગલું ભર્યું છે. વોટ્સએપની માલિકી ધરાવતી કંપની મેટાએ કહ્યું છે કે તેણે એક મહિનામાં 84 લાખ એકાઉન્ટ્સ પર પ્રતિબંધ મૂક્યો છે. કંપનીએ તેના તાજેતરના ટ્રાન્સપરન્ટ રિપોર્ટમાં જણાવ્યું હતું કે 1 ઓગસ્ટથી 31 ઓગસ્ટ વચ્ચે તેણે ભારતમાં 84.5 લાખ વોટ્સએપ પ્રોફાઇલ પર પ્રતિબંધ મૂક્યો હતો.

10 લાખથી વધુ એકાઉન્ટ તાત્કાલિક દૂર કરવામાં આવ્યા

રિપોર્ટમાં કહેવામાં આવ્યું છે કે કંપનીએ નિયમોના ગંભીર ઉલ્લંઘનને કારણે 16.6 લાખ એકાઉન્ટ્સને તાત્કાલિક દૂર કરી દીધા હતા, જ્યારે બાકીના એકાઉન્ટ્સ તપાસ બાદ હટાવવામાં આવ્યા હતા. આ ઉપરાંત, લગભગ 16 લાખ એકાઉન્ટ્સ એવા હતા જેને કંપનીએ કોઈપણ ફરિયાદ મળતા પહેલા જ ઓળખી કાઢ્યા હતા અને ડિલીટ કરી દીધા હતા. કંપનીએ જણાવ્યું હતું કે ઓગસ્ટ 2024માં તેને 10,707 યુઝર્સ તરફથી ફરિયાદો મળી હતી અને તેમાંથી 93 ટકા પર તાત્કાલિક કાર્યવાહી કરવામાં આવી હતી.

મેટા આ કારણોસર એકાઉન્ટ્સ ડિલીટ કરે છે

મેટા અનેક કારણોસર યુઝર્સના એકાઉન્ટ્સ ડિલીટ કરે છે. જો કોઈ યુઝર્સ બલ્ક મેસેજિંગ, સ્પામ, છેતરપિંડી કરતો અથવા ગેરમાર્ગે દોરનારી માહિતી ફેલાવતો જોવા મળે છે, તો તેને નિયમોનું ઉલ્લંઘન કરવા બદલ બ્લોક કરવામાં આવે છે. આ ઉપરાંત જો કોઈ કાયદા દ્વારા પ્રતિબંધિત કોઈપણ પ્રવૃત્તિ કરતું જોવા મળે છે તો તે એકાઉન્ટ પણ તાત્કાલિક દૂર કરવામાં આવે છે. આ સાથે જ્યારે કંપની યુઝર્સ તરફથી ફરિયાદો મળે છે ત્યારે તે એકાઉન્ટ્સ સામે કાર્યવાહી કરે છે. યુઝર્સની ફરિયાદો કંપની માટે એવા એકાઉન્ટ્સને ઓળખવાનું સરળ બનાવે છે જે નુકસાન પહોંચાડી રહ્યા છે.

ભારતમાં WhatsAppનો સૌથી મોટો યુઝર બેઝ છે

ભારત વિશ્વમાં WhatsApp માટેનું સૌથી મોટું બજાર છે. કંપનીના અહીં મહત્તમ યુઝર્સની સંખ્યા 53.5 કરોડ છે. વૈશ્વિક યુઝર્સની સરખામણીમાં ભારતીય યુઝર્સ WhatsApp પર વધુ સમય વિતાવે છે. ભારત પછી કંપનીના યુઝર્સની સંખ્યા બ્રાઝિલ અને અમેરિકામાં સૌથી વધુ છે.