Vodafone-Ideaના યૂઝર્સને લાગી શકે છે મોટો ઝાટકો, કંપનીએ રેટમાં આટલા ગણા વધારાની માગ કરી છે

હાઈકોર્ટના આદેશ અનુસાર વોડાફોન આઈડિયા ઉપર 53 હજાર કરોડ રૂપિયાના AGR બાકી છે. કંપનીએ અત્યાર સુધીમાં માત્ર 3500 કરોડ રૂપિયા જ ચૂકવ્યા છે.

નવી દિલ્હીઃ ટેલીકોમ કંપની વોડાફોન આઈડિયાએ મોબાઈલ ડેટા માટે રેટ વધારીને ઓછામાં ઓછા 35 રૂપિયા પ્રતિ જીબી નક્કી કરવાની માગ કરી છે. આ હાલના  રેટ કરતાં અંદાજે સાતથી આઠ ગણા છે. ઉપરાંત કંપનીએ એક નક્કી માસિક ફી સાથે કોલ સેવાઓ માટે છ પૈસા પ્રતિ મિનિટ રેટ નક્કી કરવાની માગ કરી છે. હાલમાં મોબાઈલ ડેટાનો રેટ ચાર-પાંચ રૂપિયા પ્રતિ જીબી છે. કંપનીએ કહ્યું કે, તેને એજીઆરની બાકી રકમ ચૂકવવામાં સક્ષમ બનવા તથા તેના કારોબારનું ઓપરેશન યોગ્ય રીતે કરવા માટે એક એપ્રિલથી આ નવા દર લાગુ કરવા જોઈએ. સત્તાવાર સૂત્રો અનુસાર, કંપનીએ એજીઆરની ચૂકવણી માટે 18 વર્ષની સમયમર્યાદાની માગ કરી છે. તેની સાથે જ કંપનીએ કહ્યું કે, તેને વ્યાજ અને દંડની  ચૂકવણીમાં પણ ત્રણ વર્ષની છૂટ મળવી જોઈએ. હાઈકોર્ટના આદેશ અનુસાર વોડાફોન આઈડિયા ઉપર 53 હજાર કરોડ રૂપિયાના AGR બાકી છે. કંપનીએ અત્યાર સુધીમાં માત્ર 3500 કરોડ રૂપિયા જ ચૂકવ્યા છે. એક અધિકારીએ નામ નહીં આપવાની શરતે કહ્યું કે, ‘વોડાફોન આઈડિયાએ માર્કેટમાં રહેવા માટે સરકાર સામે અનેક માંગણીઓ મૂકી છે. કંપની ઈચ્છે છે કે એક એપ્રિલ 2020થી મોબાઈલ ડેટા ચાર્જ ન્યૂનતમ 35 રૂપિયા પ્રતિ જીબી તથા ન્યૂનતમ 50 રૂપિયા માસિક કનેક્શન ચાર્જ નક્કી કરે. આ માંગણીઓ સરકાર માન્ય રાખે તેની શક્યતા ઓછી છે.’ સૂત્રોના જણાવ્યા અનુસાર કોલ સેવા માટે લઘુતમ છ પૈસા પ્રતિ મિનિટ ચાર્જ નક્કી કરવા જોઈએ. કંપની આ માંગણી એવા સમયે કરી છે જ્યારે તેઓ છેલ્લા 3 મહિનાની અંદર મોબાઈલ સેવાના દરોમાં 50 ટકાનો વધારો કરી ચૂકી છે. સૂત્રોનું કહેવું છે, ‘મોબાઈલ કોલ અને ડેટાના ચાર્જ વધારવાતથી કંપનીની આવકમાં વધારો થશે.’