Cyber Fraud: સોશિયલ મીડિયાનો ઉપયોગ કરનારા સાવધાન, સરકારે આપી જાણકારી

Cyber Fraud: જો તમારા ફોનમાં WhatsApp, Telegram અને Instagram છે તો તમારે સાવધાન રહેવાની જરૂર છે

પ્રતિકાત્મક તસવીર

Source : Pixabay

Cyber Fraud: જો તમારા ફોનમાં WhatsApp, Telegram અને Instagram છે તો તમારે સાવધાન રહેવાની જરૂર છે. ગૃહ મંત્રાલયના એક રિપોર્ટમાં ખુલાસો થયો છે કે સાયબર ઠગ આ એપ્સ દ્વારા લોકોને સૌથી વધુ નિશાન બનાવી રહ્યા છે. વાસ્તવમાં આ ત્રણેય એપ્સના કરોડો યુઝર્સ છે અને મોટી સંખ્યામાં લોકો તેનો રોજ ઉપયોગ કરે છે. તેથી ઑનલાઇન છેતરપિંડી કરનારાઓ માટે અહીં તેમના શિકાર શોધવા સરળ બને છે.

સૌથી વધુ છેતરપિંડી વોટ્સએપ દ્વારા થઈ રહી છે

2024ના પ્રથમ ત્રણ મહિનામાં સરકારને WhatsApp દ્વારા સાયબર છેતરપિંડીની સૌથી વધુ 43,797 ફરિયાદો મળી હતી. આ પછી ટેલિગ્રામ દ્વારા છેતરપિંડીની 22,680 ફરિયાદો અને ઇન્સ્ટાગ્રામ દ્વારા છેતરપિંડીની 19,800 ફરિયાદો આવી હતી. રિપોર્ટમાં કહેવામાં આવ્યું છે કે સાયબર ઠગ્સ આવા ગુનાઓ શરૂ કરવા માટે ગૂગલ સર્વિસ પ્લેટફોર્મનો ઉપયોગ કરે છે. તેમની મદદથી તેઓ લોકોને નિશાન બનાવે છે.

આ લોકોને સૌથી વધુ નિશાન બનાવવામાં આવી રહ્યા છે

દેશમાં સાયબર ફ્રોડના વધતા જતા મામલાઓની વચ્ચે આવેલા ગૃહ મંત્રાલયના આ વાર્ષિક રિપોર્ટમાં કહેવામાં આવ્યું છે કે આ પ્રકારની છેતરપિંડી વિવિધ દેશોમાં થઈ રહી છે અને તેમાં મોટા પાયે મની લોન્ડરિંગ અને સાયબર ગુલામીનો પણ સમાવેશ થાય છે. બેરોજગાર યુવાનો, ગૃહિણીઓ, વિદ્યાર્થીઓ અને અન્ય જરૂરિયાતમંદ લોકો સાયબર ફ્રોડમાં સૌથી વધુ નિશાન બને છે, જેઓ મોટી રકમ ગુમાવી રહ્યા છે. આ પૈસામાં ઉછીના લીધેલા રૂપિયા પણ સામેલ છે

સરકાર ફેસબુક પર પણ નજર રાખી રહી છે

રિપોર્ટમાં કહેવામાં આવ્યું છે કે સાયબર ઠગ્સ ફેસબુક એડ મારફચે દેશમાં ગેરકાયદેસર લોન આપતી એપ પણ લોન્ચ કરી રહ્યા છે. તેમના પર પગલાં લેવા માટે સરકાર પહેલેથી જ આવી લિંક્સની ઓળખ કરી રહી છે. જો જરૂરી હોય તો આ લિંક્સને દૂર કરવા માટે ફેસબુકને નિર્દેશ પણ આપવામાં આવી રહ્યા છે.