અમદાવાદમાં માનવતા મરી પરવારી: કૃષ્ણનગરમાં નરાધમ સાવકા પિતાએ 6 વર્ષની માસૂમ દીકરીને પીંખવાનો પ્રયાસ કર્યો

ગાંધીનગર TCS માં નોકરી કરતા વિકૃત પિતાની કૃષ્ણનગર પોલીસે કરી ધરપકડ; માતાની સમયસૂચકતાથી બાળકી બચી ગઈ.

krishnanagar ahmedabad stepfather assault attempt minor case

Source : ABPLIVE AI

Show Quick Read

Key points generated by AI, verified by newsroom

• સાવકા પિતાએ 6 વર્ષની દીકરી પર દુષ્કર્મનો પ્રયાસ કર્યો.
• માતાએ સમયસર પહોંચી દીકરીને બચાવી, પોલીસ ફરિયાદ નોંધાવી.
• પોલીસે આરોપી સાવકા પિતાની તાત્કાલિક ધરપકડ કરી.
• TCS કંપનીમાં નોકરી કરતો હતો આરોપી, તપાસ ચાલુ.

અમદાવાદના કૃષ્ણનગર વિસ્તારમાંથી લોહીના સંબંધોને લજવતો અને હચમચાવી મૂકે એવો એક કિસ્સો સામે આવ્યો છે. અહીં એક વિકૃત માનસિકતા ધરાવતા સાવકા પિતાએ પોતાની જ 6 વર્ષ અને 10 મહિનાની માસૂમ દીકરી પર દુષ્કર્મ આચરવાનો પ્રયાસ કર્યો હતો. સદનસીબે, બાળકીની માતાએ સમયસર પહોંચી જઈને પોતાની દીકરીને આ નરાધમની ચુંગાલમાંથી બચાવી લીધી હતી. આ મામલે માતાએ હિંમત દાખવીને પોલીસમાં ફરિયાદ નોંધાવતા, કૃષ્ણનગર પોલીસે ગણતરીના કલાકોમાં જ આરોપી પિતાની ધરપકડ કરીને કાયદેસરની કાર્યવાહી હાથ ધરી છે.

માતા કપડાં સૂકવતી હતી અને અંદર રૂમમાં...

મળતી માહિતી મુજબ, આ ઘટના બની ત્યારે રાતનો સમય હતો. જમી પરવારીને બાળકીની માતા બેડરૂમની બહાર કપડાં સૂકવી રહી હતી. આ જ તકનો લાભ લઈને ઘરમાં રહેલા સાવકા પિતાની દાનત બગડી અને તેણે 6 વર્ષની માસૂમ બાળકીને પોતાની હવસનો શિકાર બનાવવાનો પ્રયાસ કર્યો. આરોપીએ જેવી બાળકી સાથે અડપલાં કરવાની શરૂઆત કરી કે તરત જ ગભરાયેલી દીકરીએ જોરથી ચીસાચીસ કરી મૂકી.

દીકરીનો અવાજ સાંભળી માતા દોડી આવી

બાળકીની બૂમો સાંભળીને માતા તરત જ દોડીને બેડરૂમમાં પહોંચી ગઈ. ત્યાં તેણે જોયું તો આરોપી અને માસૂમ બાળકી વાંધાજનક સ્થિતિમાં હતા. પોતાની દીકરીને આ હાલતમાં જોઈને માતાના પગ નીચેથી જમીન સરકી ગઈ હતી. જોકે, તેણે સહેજ પણ ડર્યા વગર તાત્કાલિક પોતાની દીકરીને આરોપીના હાથમાંથી આંચકી લીધી અને તેને બચાવી લીધી. આ પછી તરત જ તેણે કૃષ્ણનગર પોલીસ સ્ટેશન દોડી જઈને ફરિયાદ નોંધાવી હતી.

પરિવારની પૃષ્ઠભૂમિ અને આરોપીની પ્રોફાઈલ

આ પરિવારની વાત કરીએ તો, ભોગ બનનાર બાળકીની માતાના પહેલા લગ્ન વર્ષ 2019 માં થયા હતા અને વર્ષ 2020 માં છૂટાછેડા થયા હતા. આ માસૂમ દીકરી એ પહેલા પતિની જ સંતાન છે. ત્યારબાદ 28-08-2021 ના રોજ મહિલાએ આ આરોપી સાથે બીજા લગ્ન કર્યા હતા, જેનાથી તેમને એક દીકરો પણ છે.

આશ્ચર્યની વાત એ છે કે, આ જઘન્ય અપરાધ કરનાર આરોપી કોઈ અભણ કે અશિક્ષિત નથી. તેણે ધોરણ 10 પછી મિકેનિકલ ડિપ્લોમા કર્યું છે અને હાલ તે ગાંધીનગર સ્થિત જાણીતી આઇટી કંપની ટીસીએસ (TCS) માં નોકરી કરે છે.

પોલીસે તપાસનો ધમધમાટ શરૂ કર્યો

પોલીસે આરોપીની ધરપકડ કરી લીધી છે અને તેની સઘન પૂછપરછ શરૂ કરી છે. ભણેલો-ગણેલો અને સારી જગ્યાએ નોકરી કરતો માણસ 6 વર્ષની માસૂમ સાથે આવું કૃત્ય કઈ રીતે કરી શકે, તે તેની વિકૃત માનસિકતા પર મોટો સવાલ ઊભો કરે છે. પોલીસના જણાવ્યા અનુસાર, અગાઉ તેણે આવું કોઈ કૃત્ય કર્યું હોય તેવો કોઈ ગુનાહિત ઇતિહાસ અત્યાર સુધી સામે આવ્યો નથી, પરંતુ પોલીસ આ દિશામાં ઊંડાણપૂર્વક તપાસ કરી રહી છે.

આ પણ વાંચો

સુરતમાં આંતરધર્મીય પ્રેમલગ્નનો કરુણ અંજામ: ચારિત્ર્યની શંકામાં સરફરાઝે પત્ની પૂજાને ચપ્પુના ઘા ઝીંકી રહેંસી નાખી!