Crime News: પ્રેમની આડમાં ખેલાયો ખૂની ખેલ, પુત્રવધૂના પ્રેમમાં પાગલ થયેલા સસરાએ પુત્રને જ પતાવી દીધો
4 મહિનાની તપાસ બાદ થયો ખુલાસો, પિતાએ જ પુત્રની હત્યા કરી આત્મહત્યાનો વેશ રચ્યો હતો.
Agra Crime News: ઉત્તર પ્રદેશના આગ્રામાં એક ચોંકાવનારી ઘટના સામે આવી છે, જ્યાં એક સસરા પુત્રવધૂ પ્રત્યેના પોતાના એકતરફી પ્રેમમાં આંધળા બનીને પોતાના જ પુત્રના હત્યારા બન્યા છે. કળિયુગના આ કમકમાટીભર્યા કિસ્સામાં, પિતાએ પહેલા પુત્રને લોખંડના સળિયાથી ઘાતક હુમલો કર્યો અને ત્યારબાદ પોલીસને ગેરમાર્ગે દોરવા માટે તેને આત્મહત્યામાં ખપાવવાનો પ્રયાસ કર્યો.
આ ઘટના આગ્રાના જગદીશપુરા પોલીસ સ્ટેશન વિસ્તારના લાડમાડા ગામની છે. ગામના રહેવાસી ચરણ સિંહ પોતાના પુત્ર પુષ્પેન્દ્ર સિંહ સાથે રહેતા હતા. પુષ્પેન્દ્રના લગ્ન પછી, તેના પિતા ચરણ સિંહને પોતાની પુત્રવધૂ પ્રત્યે અણછાજતી લાગણી જાગી. જ્યારે પુષ્પેન્દ્રને આ વાતની જાણ થઈ, ત્યારે તેણે સખત વિરોધ કર્યો.
હોળીના દિવસે ખૂની ખેલ
પિતાના વર્તનથી કંટાળીને પુષ્પેન્દ્ર પોતાની પત્ની સાથે મથુરા રહેવા જતો રહ્યો હતો. 14 માર્ચ, હોળીના તહેવારના દિવસે, પુષ્પેન્દ્ર પોતાની પત્ની સાથે ઘરે આવ્યો. જોકે, હોળી રમવા આવેલા પુત્રની હાજરીમાં પણ પિતા ચરણ સિંહે ફરીથી પુત્રવધૂ સાથે દુર્વ્યવહાર કરતા પિતા-પુત્ર વચ્ચે ઉગ્ર ઝઘડો થયો. આ ઝઘડા દરમિયાન, ગુસ્સે ભરાયેલા ચરણ સિંહે લોખંડના સળિયા વડે પુષ્પેન્દ્રની છાતીમાં જીવલેણ હુમલો કર્યો. આ તીક્ષ્ણ હુમલાને કારણે પુષ્પેન્દ્રનું ઘટનાસ્થળે જ મૃત્યુ થયું.
પોલીસને ગેરમાર્ગે દોરવાનું કાવતરું
પુત્રની હત્યા કર્યા બાદ, આરોપી પિતા ચરણ સિંહે પોલીસથી બચવા માટે એક ઘૃણાસ્પદ કાવતરું ઘડ્યું. તેણે એક કારતૂસ (ગોળી) કાઢીને પુત્રની છાતી પર મૂકી દીધી અને પોલીસને જણાવ્યું કે પુષ્પેન્દ્રએ પોતે ગોળી મારીને આત્મહત્યા કરી લીધી છે. આ ઘટના બાદ પોલીસ આ હત્યાના રહસ્યને ઉકેલવામાં લાગી હતી.
4 મહિનાની તપાસ બાદ સત્યનો થયો પર્દાફાશ
લગભગ 4 મહિનાની ઝીણવટભરી તપાસ બાદ, જે સત્ય સામે આવ્યું તે જાણીને પોલીસ પણ સ્તબ્ધ થઈ ગઈ. પોલીસ તપાસમાં અને ફોરેન્સિક પુરાવાના આધારે બહાર આવ્યું કે પિતા ચરણ સિંહે જ પોતાના પુત્ર પુષ્પેન્દ્ર સિંહની હત્યા કરી હતી. એસીપી મયંક તિવારીએ જણાવ્યું કે શરૂઆતમાં પરિવારે આત્મહત્યાની વાત કહી હતી, પરંતુ કઠોર પૂછપરછ અને વૈજ્ઞાનિક તપાસ બાદ સમગ્ર સત્ય બહાર આવ્યું. પુત્રવધૂને લઈને પિતા અને પુત્ર વચ્ચેનો વિવાદ જ આ હત્યાનું મુખ્ય કારણ હતો.
લગભગ 4 મહિનાના સમયગાળા બાદ, પોલીસે હત્યાનો ભેદ ઉકેલીને આરોપી પિતા ચરણ સિંહની ધરપકડ કરી લીધી છે અને તેમને જેલમાં મોકલી દેવામાં આવ્યા છે. આ ઘટનાએ સંબંધોની પવિત્રતા પર પ્રશ્નાર્થ ઊભો કર્યો છે અને સમાજમાં એક ગંભીર ચર્ચા જગાવી છે.
ટોપ સ્ટોરી
ટ્રેન્ડિંગ સમાચાર
