CBSE 10th 12th Result 2025: CBSE બોર્ડ પરીક્ષાની કૉપી રી-ચેક કરાવવાનો બદલાયો નિયમ, જાણો નવી પ્રક્રિયા

સીબીએસઇ ટૂંક સમયમાં 10મા અને 12મા ધોરણની પરીક્ષાઓનું પરિણામ જાહેર કરવા જઈ રહ્યું છે

પ્રતિકાત્મક તસવીર

Source : CBSE HQ

CBSE 10th 12th Result 2025 :  સેન્ટ્રલ બોર્ડ ઓફ સેકન્ડરી એજ્યુકેશન (CBSE) બોર્ડ ટૂંક સમયમાં 10મા અને 12મા ધોરણની પરીક્ષાઓનું પરિણામ જાહેર કરવા જઈ રહ્યું છે. બોર્ડ પરિણામથી અસંતુષ્ટ વિદ્યાર્થીઓને તેમના ગુણ ચકાસવા અને ફરીથી મૂલ્યાંકન કરાવવાની તક આપશે. પરંતુ બોર્ડે આ પ્રક્રિયામાં કેટલાક ફેરફારો કર્યા છે. હવે વિદ્યાર્થીઓએ પહેલા તેમની ઉત્તરવહીઓની ફોટોકોપી લેવાની રહેશે અને પછી તેઓ તેમના ગુણની પુનઃ ચકાસણી અને પુનઃમૂલ્યાંકન માટે અરજી કરી શકશે.

પહેલાની પ્રક્રિયામાં વિદ્યાર્થીઓએ પહેલા ગુણ ચકાસણી માટે અરજી કરવાની હતી. પછી ઉત્તરવહીઓની ફોટોકોપી માંગવી પડતી હતી અને અંતે પુનઃમૂલ્યાંકન થવાનું હતું. હવે નવી પ્રક્રિયામાં આ ક્રમ બદલાઈ ગયો છે, હવે વિદ્યાર્થીઓને પહેલા ઉત્તરવહીઓની ફોટોકોપી મળશે, જેથી તેઓ પહેલા પોતાનું પેપર અને પરીક્ષકની ટિપ્પણીઓ જોઈ શકે. આ પછી તેઓ નક્કી કરી શકે છે કે તેઓ ગુણ ચકાસણી, પુનઃમૂલ્યાંકન, અથવા બંને માટે અરજી કરવા માંગે છે.

પ્રક્રિયા કેમ બદલવામાં આવી?

સીબીએસઈએ જણાવ્યું હતું કે આ ફેરફારનો ઉદ્દેશ્ય વિદ્યાર્થીઓને તેમની ઉત્તરવહીઓ વિશે વધુ સારી માહિતી આપવાનો છે જેથી તેઓ વધુ સારા નિર્ણયો લઈ શકે. બોર્ડ પરીક્ષાના પરિણામો જાહેર થયા પછી વિગતવાર માર્ગદર્શિકા અને સમયપત્રક જાહેર કરવામાં આવશે. ધોરણ 10ની પરીક્ષાઓ 15 ફેબ્રુઆરીથી 1 માર્ચ અને ધોરણ 12ની પરીક્ષાઓ 15 ફેબ્રુઆરીથી 4 એપ્રિલ દરમિયાન યોજાઈ હતી. આ વર્ષે 42 લાખથી વધુ વિદ્યાર્થીઓએ પરીક્ષા આપી હતી.

નવી સિસ્ટમનો ઉદ્દેશ્ય વિદ્યાર્થીઓને પહેલા તેમની મૂલ્યાંકન કરાયેલી ઉત્તરવહીઓ જોવાની તક આપવાનો છે, જેથી તેઓને આપવામાં આવેલા ગુણ, પરીક્ષકની ટિપ્પણીઓ અને સંભવિત ભૂલો વિશે સ્પષ્ટતા મળી શકે. ફોટોકોપી મેળવ્યા પછી વિદ્યાર્થીઓ તેમની ઉત્તરવહી ચકાસી શકે છે અને પછી નિર્ધારિત પ્રક્રિયા મુજબ ગુણની પુનઃ ચકાસણી, ચોક્કસ પ્રશ્નનું પુનઃ મૂલ્યાંકન અથવા બંને માટે અરજી કરી શકે છે.