ચોથા નોરતે સૌરાષ્‍ટ્ર, ઉત્તર ગુજરાત, કચ્‍છમાં ભારે વરસાદ: ખેલૈયાઓ નિરાશ

પ્રાપ્ત માહિતી મુજબ સુરત સહિત સમગ્ર ગુજરાતમાં ભારેથી અતિ ભારે વરસાદની આગાહી કરવામાં આવી છે. સુરતમાં આજે જુદા જુદા ઝોનમાં ભારે વરસાદ થયો હતો. મધ્‍ય ઝોનમાં બે ઇંચથી વધુ વરસાદ થયો હતો. ઉકાઈની જળ સપાટી ૩૪૦.૦૭ ફૂટ રહી હતી. કાકરાપાર આઉટફ્‌લો ૨૮૦૦ ક્‍યુસેક હોવાની માહિતી પ્રાપ્ત થઇ છે.

અમદાવાદ શહેરમાં પણ વરસાદી ઝાપટાનો દોર જારી રહ્યો છે. ગઇકાલે ભારે વરસાદના કારણે નિચાણવાળા વિસ્‍તારો જળબંબાકાર બની ગયા હતા જેથી ગંદકીનું પ્રમાણ હજુ જોવા મળી રહ્યું છે. ગંદકીના કારણે રોગચાળો વધુ ધાતક સ્‍વરુપ લે તેવી શક્‍યતા છે. ખાસ કરીને નિચાણવાળા વિસ્‍તારોમાં હજુ પણ પાણી ભરાયેલા છે. તંત્ર દ્વારા પાણીનો નિકાલ લાવવા માટે પગલા લેવાઈ રહ્યા હોવા છતાં સ્‍થિતિમાં ધીમીગતિએ સુધારો થઇ રહ્યો છે. અમદાવાદ શહેરમાં પણ ઝાપટાની શક્‍યતા છે.

હવામાન વિભાગે આગાહી કરતા કહ્યું છે કે, દક્ષિણ ગુજરાત, સૌરાષ્‍ટ્રમાં હજુ વરસાદી માહોલ ચાલુ રહેશે. ૭મી તારીખ સુધી વરસાદી માહોલ રહેવાની આગાહી કરવામાં આવી છે. છત્તીસગઢથી મહારાષ્‍ટ્રના વિદર્ભ સુધીના વિસ્‍તારમાં અપરએર સાયક્‍લોનિક સરક્‍યુલેશનની સ્‍થિતિ જોવા મળી રહી છે જેના પરિણામે ગરબા ખેલૈયાઓને મુશ્‍કેલી પડી શકે છે.

બીજી બાજુ વંથલીમાં ચાર ઇંચથી વધુ વરસાદ નોંધાઈ ગયો હતો. અમરેલીના ખાંભામાં બે ઇંચથી વધુ વરસાદ થયો હતો. સાવરકુંડલામાં પણ સારો વરસાદ નોંધાયો હતો. ગાંધીધામમાં બે ઇંચથી વધુ વરસાદ નોંધાતા જનજીવન ખોરવાઇ ગયું હતું. કચ્‍છમાં પણ ત્રણ ઇંચથી વધુ વરસાદ નોંધાઈ ગયો હતો.

અમદાવાદ શહેરમાં પણ હળવા વરસાદી છાંટા પડવાનો દોર જારી રહ્યો હતો. પ્રાપ્ત માહિતી મુજબ વરસાદના કારણે સૌરાષ્‍ટ્રના જુદા જુદા ભાગોમાં પાણી ભરાઈ ગયા હતા. એકથી ચાર ઇંચ સુધીનો વરસાદ જુદા જુદા વિસ્‍તારોમાં થયો હતો. જુનાગઢમાં ત્રણ ઇંચથી પણ વધુ વરસાદ ખાબકી ગયો હતો જેથી સોનરત નદીમાં પુરની સ્‍થિતિ સર્જાઈ ગઈ હતી.

અમદાવાદ: ઉત્તર ગુજરાત અને સૌરાષ્‍ટ્રમાં આજે સતત ચોથા નોરતે ધોધમાર વરસાદ વરસ્યો છે. સૌરાષ્‍ટ્ર, કચ્‍છ સહિત ઉત્તર ગુજરાતમાં ભારે વરસાદ યથાવત રહેતા ગરબા ખેલૈયાઓમાં આજે પણ નિરાશા જોવા મળી હતી. બીજી બાજુ ગુજરાતમાં હજુ પણ ભારે વરસાદની આગાહી કરવામાં આવી છે.