ગુજરાતમાં અહીં 1000 કરોડના ખર્ચે બનશે ઉમિયા માતાનું સૌથી ઊંચું મંદિર, જુઓ તસવીરો

વિશ્વ ઉમિયા ફાઉન્ડેશન દ્વારા અમદાવાદમાં જાસપુર ખાતે 100 વિઘા જમીન પર 1000 કરોડના ખર્ચે મા ઉમિયાનું મંદિર બનાવવામાં આવશે

અમદાવાદના એસ.જી.હાઈવે પર આવેલા વૈષ્ણોદેવી સર્કલ નજીક જાસપુરની હદમાં જગત જનની મા ઉમિયાનું વિશાળ મંદિર તૈયાર કરવામાં આવશે. આ મંદિરનું નિર્માણકાર્ય માટે 28-29 ફેબ્રુઆરીએ શિલાન્યાસ કરવામાં આવશે. જેમાં દેશભરમાંથી સંતો, મહંતો અને રાજકીય આગેવાનો ઉપસ્થિત રહેશે. આ મંદિર કેવું હશે તેનો એક વીડિયો સામે આવ્યો જે સોશિયલ મીડિયામાં બહુ જ વાયરલ થયો છે. વિશ્વ ઉમિયા ફાઉન્ડેશન દ્વારા અમદાવાદમાં જાસપુર ખાતે 100 વિઘા જમીન પર 1000 કરોડના ખર્ચે મા ઉમિયાનું મંદિર બનાવવામાં આવશે. બે દિવસના આ શિલાન્યાસ કાર્યક્રમમાં લાખો લોકો હાજરી આપશે. આ મંદિરને પ્રવાસન સ્થળ બને તે માટે સરકાર દ્વારા પણ મદદ કરવામાં આવશે. મંદિરની બાજુમાં ટ્રી મ્યુઝિયમ બનાવવામાં આવશે. જેમાં 3000થી વધારે લુપ્ત થતાં વૃક્ષોનું વાવેતર કરવામાં આવશે. સ્વિત્ઝરલેન્ડ બાદ આ વિશ્વનું બીજું ટ્રી મ્યુઝીયમ હશે. ઉમિયા માતાના આ મંદિરની ઉંચાઈ 431 ફૂટ એટલે 131 મીટર હશે. આ મંદિરની ડિઝાઈન જર્મન આર્કિટેક અને ઈન્ડિયન આર્કિટેક દ્વારા તૈયાર કરાઈ છે. મંદિરના શિખરની વ્યુ ગેલરીમાંથી અમદાવાદ શહેરનો નજારો જોઈ શકાશે. મંદિરમાં 10 ફૂટ ઊંચી માતાજીની મૂર્તિ સ્થાપિત કરવામાં આવશે. આ મંદિરની સાથે સ્કીલ યુનિવર્સિટી, પ્રિ એન્ડ પોસ્ટ મેડીકલ કેર યુનિટ, રોજગાર ભવન, સ્પર્ધાત્મક પરીક્ષા ટ્રેનિંગ સેન્ટર, સ્પોર્ટસ એન્ડ કલ્ચર કોમ્પ્લેક્ષ તેમજ NRI ભવનનું નિર્માણ કરવામાં આવશે.