Gujarat Rain : ગુજરાતમાં મેઘરાજાના મંડાણ, સુરતના કામરેજમાં 2.5 ઇંચ વરસાદ, ક્યાં કેટલો થયો વરસાદ?
ગઈ કાલે પણ રાજ્યમાં સારો વરસાદ પડ્યો હતો. રાજ્યના 61 તાલુકાઓમાં હળવાથી ભારે વરસાદ નોંધાયો હતો. જેમાં સૌથી વધુ સુરતના કામરેજ તાલુકામાં અઢી ઇંચ વરસાદ ખાબક્યો હતો.
અમદાવાદઃ ગુજરાતમાં વરસાદના મંડાણ થઈ ગયા છે. ગઈ કાલે પણ રાજ્યમાં સારો વરસાદ પડ્યો હતો. રાજ્યના 61 તાલુકાઓમાં હળવાથી ભારે વરસાદ નોંધાયો હતો. જેમાં સૌથી વધુ સુરતના કામરેજ તાલુકામાં અઢી ઇંચ વરસાદ ખાબક્યો હતો. આ પછી વલસાડના કપરાડા, વડોદરાના કરજણ, સુરતના પલસાણામાં દોઢથી બે ઇંચ જેટલો વરસાદ ખાબક્યો હતો.
જ્યારે બોટાદ, લીંબડી લિલિયા વડિયા, તારાપુર તાલુકામાં અડધાથી એક ઇંચ જેટલો વરસાદ ખાબક્યો હતો. જ્યારે બારોડલી, સુરતના મહુવા, સુરેન્દ્રનગરના વઢવાણ, નવસારી, વલસાડ અને ધારીમાં અડધા ઇંચ જેટલો વરસાદ ખાબક્યો હતો. આ સિવાયના તાલુકાઓમાં છૂટોછવાયો વરસાદ નોંધાયો હતો.
સૌરાષ્ટ્રના અમરેલી અને ભાવનગર, તો દક્ષિણ ગુજરાતના સુરત, વલસાડ અને નવસારીમાં આજે ધોધમાર વરસાદ પડશે. આ આગાહી કરી છે હવામાન વિભાગે. હવામાન વિભાગના અનુસાર આગામી 5 દિવસ ગુજરાતમાં વરસાદી માહોલ રહેશે. નૈઋત્યના ચોમાસાએ ઉત્તર અરેબિયન સમુદ્ર તેમજ ગુજરાતના અન્ય કેટલાક હિસ્સામાં આગેકૂચ કરી છે. જેને પગલે આજે સુરત, વલસાડ, દમણ, દાદરાનગર હવેલી, અમરેલી અને ભાવનગરમાં વરસાદ વરસી શકે છે.
તો આવતીકાલે જૂનાગઢ અને ગીર સોમનાથમાં ભારે વરસાદની હવામાન વિભાગે આગાહી કરી છે. આ સિવાય આજથી રવિવાર સુધી અમદાવાદ, આણંદ, ખેડા, ગાંધીનગર, બનાસકાંઠા, સાબરકાંઠા, પાટણ, મહેસાણા, ભરૂચ, સુરત, નવસારી અને વલસાડ તેમજ દક્ષિણ ગુજરાત અને સૌરાષ્ટ્રના મોટા ભાગના જિલ્લાઓમાં 30થી 40 કિલોમીટર પ્રતિ કલાકની ઝડપે પવન ફુંકાવવાની સાથે મધ્યમ વરસાદ વરસી શકે છે.
વલસાડમાં વરસાદ
મોડીરાત્રીના વલસાડના કેટલાક વિસ્તારમાં રાત્રીના સમયે વરસાદ શરૂ થયો હતો. વરસાદના હાલાર રોડ, તિથલ રોડ, એમજી રોડ, મોટા બજાર વિસ્તારમાં વરસાદ વરસ્યો હતો. વરસાદના પગલે અસહ્ય બફારા અને ઉકળાટથી ત્રસ્ત લોકોને ગરમીમાંથી રાહત મળી હતી.
અમરેલી જિલ્લામાં વરસાદ
અમરેલી જિલ્લામાં સતત થઈ રહી છે મેઘમહેર. આજે કુકાવાવ તાલુકામાં વરસ્યો મૂશળધાર વરસાદ પડ્યો હતો. ધોધમાર વરસાદથી મોટા ઉજળા ગામના પ્રવેશદ્વાર પાસે નદીની જેમ પાણી વહેતા થયા હતા. વરસાદી માહોલને લઈ અમરેલી જિલ્લાના ખેડૂતો ખુશખુશાલ છે. ધારી, ચલાલામાં સારો વરસાદ વરસ્યો હતો. તો જાફરાબાદ તાલુકામાં ધીમીધારે વરસાદ વરસ્યો હતો. જાફરાબાદના નાગેશ્રી, મીઠાપુર, બાલાની વાવ અને કાંથારિયા સહિતના ગામમાં વરસાદ વરસ્યો, તો વડીયા શહેર અને આસપાસના ગામોમાં પણ બપોર બાદ વરસાદ વરસ્યો હતો. મોરવાડા, બાટવા, દેવડી સહિતના ગામમાં વરસાદ વરસ્યો, રાજુલા પંથકમાં વરસાદી માહોલ રહ્યો, હિંડોરણા, કડીયાળી, છટડીયા સહિતના ગામોના ખેતરોમાં કાચું સોનું રુપી વરસાદ વરસતા ખેડૂતોમાં હર્ષની લાગણી ફેલાઈ છે.
ટ્રેન્ડિંગ સમાચાર
ટોપ સ્ટોરી
