૮મું પગાર પંચ: ₹૧૮,૦૦૦ થી સીધો ₹૭૯,૦૦૦ સુધી પગાર થઈ જશે! આ રીતે ગણતરી સમજો
8th pay commission: કેન્દ્રીય કર્મચારીઓ અને પેન્શનરોની આશા: DAને મૂળ પગારમાં મર્જ કરી ફિટમેન્ટ ફેક્ટર લાગુ થવાની શક્યતા, જાણો સંપૂર્ણ ગણતરી.
8th pay commission 2025: કેન્દ્રીય સરકારના એક કરોડથી વધુ કર્મચારીઓ અને પેન્શનરો આતુરતાપૂર્વક ૮મા પગારપંચની રાહ જોઈ રહ્યા છે, જે વર્તમાન ૭મા પગારપંચનું સ્થાન લેશે. આ વર્ષે જાન્યુઆરીમાં ૮મા પગારપંચની રચનાની જાહેરાત કરવામાં આવી હતી, જોકે પેનલની રચના અંગે હજુ સુધી કોઈ સત્તાવાર નિમણૂક કરવામાં આવી નથી. આ દરમિયાન, સરકારી કર્મચારીઓ અને પેન્શનરો માટે મોંઘવારી ભથ્થા (DA)ને મૂળ પગાર સાથે મર્જ કરવાની સંભાવનાનો મુદ્દો ચર્ચાનો મુખ્ય વિષય બન્યો છે. તાજેતરમાં જ સરકારે ડીએમાં ૨ ટકાનો વધારો કર્યો હતો, જે બાદ હવે ડીએ વધીને ૫૫ ટકા થઈ ગયો છે.
અગાઉના પગારપંચો હેઠળ ફિટમેન્ટ ફેક્ટર લાગુ કરતાં પહેલાં મૂળ પગારને ડીએ સાથે મર્જ કરવામાં આવતો હતો. એવી અપેક્ષા રાખવામાં આવે છે કે ૮મા પગારપંચમાં પણ આ જ પદ્ધતિ અપનાવવામાં આવશે. જોકે, મીડિયા રિપોર્ટ્સ અનુસાર, જો DAને મૂળભૂત પગારમાં ઉમેર્યા બાદ ફિટમેન્ટ ફેક્ટર લાગુ કરવામાં આવે તો ફિટમેન્ટ ફેક્ટરની ટકાવારી ઘટાડવામાં આવી શકે છે.
જાણો કેવી રીતે થઈ શકે છે પગારની ગણતરી અને કેટલો વધારો શક્ય?
હાલમાં ૭મા પગારપંચ હેઠળ લેવલ ૧ પર કાર્યરત સરકારી કર્મચારીનો લઘુત્તમ બેઝિક પગાર ₹૧૮,૦૦૦ છે. જો આ બેઝિક સેલરીમાં વર્તમાન ૫૫ ટકા ડીએ ઉમેરવામાં આવે તો તે ₹૨૭,૯૦૦ થાય છે (₹૧૮,૦૦૦ + ₹૯,૯૦૦).
જો ૮મા પગારપંચમાં અગાઉની પદ્ધતિ મુજબ ફિટમેન્ટ ફેક્ટર ₹૧૮,૦૦૦ના મૂળ પગારને બદલે આ મર્જ થયેલી રકમ ₹૨૭,૯૦૦ પર લાગુ કરવામાં આવે, તો સરકારી કર્મચારીઓના પગારમાં મોટો વધારો થઈ શકે છે.
મીડિયા રિપોર્ટ્સ સૂચવે છે કે ૮મું પગારપંચ ૧.૯૨ થી ૨.૮૬ વચ્ચે ફિટમેન્ટ ફેક્ટરની ભલામણ કરી શકે છે. ગણતરીને સરળતાથી સમજવા માટે, જો અગાઉનું ફિટમેન્ટ ફેક્ટર ૨.૫૭ જ જાળવી રાખવામાં આવે અને તેને મર્જ થયેલા ₹૨૭,૯૦૦ પર લાગુ કરવામાં આવે, તો તમારો ન્યૂનતમ પગાર વધીને ₹૭૧,૭૦૩ (૨૭૯૦૦ * ૨.૫૭) થઈ શકે છે. જો ફિટમેન્ટ ફેક્ટર ૨.૮૬ (મીડિયા રિપોર્ટ્સ મુજબ ઉચ્ચતમ રેન્જ) હોય, તો ન્યૂનતમ પગાર ₹૭૯,૭૯૪ (૨૭૯૦૦ * ૨.૮૬) સુધી પહોંચી શકે છે.
આ ગણતરી મુજબ, જો DAને મૂળ પગારમાં મર્જ કરવાની પદ્ધતિ અપનાવવામાં આવે તો લેવલ ૧ના કર્મચારીનો લઘુત્તમ મૂળ પગાર સીધો ₹૧૮,૦૦૦ થી વધીને ₹૭૧ હજારથી ₹૭૯ હજારની રેન્જમાં પહોંચી શકે છે, જે કર્મચારીઓ માટે ખૂબ જ ફાયદાકારક સાબિત થશે. જોકે, ૮મા પગારપંચની સત્તાવાર રચના અને ભલામણો જાહેર થયા બાદ જ વાસ્તવિક ચિત્ર સ્પષ્ટ થશે.
ટોપ સ્ટોરી
ટ્રેન્ડિંગ સમાચાર
