Changes From July 1: ટ્રેનનું ભાડુ વધશે, ATMમાંથી રૂપિયા ઉપાડવા પર લાગશે ચાર્જ, એક જૂલાઇથી બદલાશે આ નિયમો
Changes From July 1: આવનારો મહિનો તેની સાથે કેટલાક ફેરફારો પણ લાવી રહ્યો છે
Changes From July 1: નવો મહિનો એટલે કે જૂલાઈ ચાર દિવસ પછી શરૂ થશે. આવનારો મહિનો તેની સાથે કેટલાક ફેરફારો પણ લાવી રહ્યો છે. 1 જૂલાઈ, 2025થી કેટલાક એવા નિયમો લાગુ થવા જઈ રહ્યા છે, જેની સીધી અસર તમારા ખિસ્સા પર પડશે. આવી સ્થિતિમાં તમારા માટે એ જાણવું ખૂબ જ મહત્વપૂર્ણ છે કે 1 જૂલાઈથી કયા નવા નિયમો લાગુ થવા જઈ રહ્યા છે. આવતા મહિનાથી રેલ્વે ટિકિટ મોંઘી થશે, તો તત્કાલ ટિકિટ બુકિંગના નિયમો પણ બદલાશે. આ ઉપરાંત, PAN બનાવવાની પ્રક્રિયા બદલાશે અને કેટલીક બેન્કો ATM અને ક્રેડિટ કાર્ડ સંબંધિત નવા નિયમો પણ લાગુ કરશે.
1 જૂલાઈથી રેલવે ટિકિટના ભાવમાં વધારો થશે. હવે AC અને Non-AC બંને ટિકિટના ભાવમાં નજીવો વધારો કરવામાં આવ્યો છે. નોન-AC ક્લાસના ભાડામાં પ્રતિ કિલોમીટર 1 પૈસા અને AC ક્લાસના ભાડામાં પ્રતિ કિલોમીટર 2 પૈસાનો વધારો કરવામાં આવ્યો છે. આ ઉપરાંત, વેઇટિંગ ટિકિટની સંખ્યા પર પ્રતિબંધ મૂકવામાં આવ્યો છે. દરેક ક્લાસમાં કુલ બેઠકોની સંખ્યાના 25 ટકાથી વધુ વેઇટિંગ ટિકિટ જાહેર કરવામાં આવશે નહીં.
તત્કાલ ટિકિટ માટેના નિયમો બદલાશે
1, જૂલાઇથી તત્કાલ ટિકિટ બુક કરવા માટે IRCTC એકાઉન્ટને આધાર સાથે લિંક કરવું ફરજિયાત બનશે. 15 જૂલાઈથી ટિકિટ બુક કરતી વખતે આધાર સાથે લિંક કરેલા મોબાઇલ નંબર પર મળેલો OTP દાખલ કરવો જરૂરી રહેશે. જો OTP નહીં હોય તો ટિકિટ બુક થશે નહીં. એજન્ટો હવે તત્કાલ બુકિંગ શરૂ થાય તે પહેલાં 30 મિનિટ સુધી ટિકિટ બુક કરી શકશે નહીં.
પાન કાર્ડ બનાવવા માટે આધાર જરૂરી
1 જૂલાઈથી પાન કાર્ડ બનાવવા માટે આધાર કાર્ડ હોવું ફરજિયાત બનશે. આ સાથે પાન કાર્ડ અને આધાર કાર્ડને લિંક કરવાની છેલ્લી તારીખ 31 ડિસેમ્બર 2025 નક્કી કરવામાં આવી છે.
ક્રેડિટ કાર્ડ માટે નવા નિયમો
1 જૂલાઇથી HDFC બેન્કના ક્રેડિટ કાર્ડ સંબંધિત નિયમો પણ બદલાશે. થર્ડ પાર્ટી એપ દ્વારા HDFC ક્રેડિટ કાર્ડ દ્વારા ચુકવણી કરવા માટે લોકોએ 1 ટકા ચાર્જ ચૂકવવો પડશે. યુટિલિટી બિલ ચુકવણી પર પણ ચાર્જ વસૂલવામાં આવશે. જો યુઝર્સ ડ્રીમ11, રમી કલ્ચર, MPL અને જંગલી ગેમ્સ જેવા પ્લેટફોર્મ પર દર મહિને 10,000 રૂપિયાથી વધુ માટે આ કાર્ડનો ઉપયોગ કરે છે તો 1 ટકાનો ટેક્સ લાગુ કરવામાં આવશે. જો કોઈ વ્યક્તિ PayTM, Mobikwik, Freecharge અથવા Ola Money જેવા ડિજિટલ વોલેટ પર દર મહિને 10,000 રૂપિયાથી વધુ અપલોડ કરે છે તો તે વધારાની રકમ પર 1 ટકાનો વધારાનો ચાર્જ વસૂલવામાં આવશે.
ATM માંથી પૈસા ઉપાડવા મોંઘા થશે
1, જૂલાઇથી ICICI બેન્કના ATM સંબંધિત નિયમો પણ બદલાવા જઈ રહ્યા છે. હવે ગ્રાહકો માટે આ બેન્કના ATM નો ઉપયોગ કરવો મોંઘો થઈ શકે છે. નવા નિયમો અનુસાર, મર્યાદા કરતા વધુ રોકડ ઉપાડવા પર પ્રતિ ટ્રાન્ઝેક્શન 23 રૂપિયાનો ચાર્જ વસૂલવામાં આવશે. ATM માં 5 મફત વ્યવહારો ઉપલબ્ધ રહેશે. મેટ્રો શહેરોમાં આ મર્યાદા 3 ટ્રાન્જેક્શન હશે. જો તમે ફક્ત બેલેન્સ તપાસો છો અથવા બિન-નાણાકીય કાર્ય કરો છો તો તેના પર પ્રતિ ટ્રાન્ઝેક્શન 8.5 રૂપિયાનો ચાર્જ વસૂલવામાં આવશે.
Before You Go
Abp Asmita Impact: 'ભૂતિયા વિદ્યાર્થીઓ' વાળી શાળાઓ સામે હવે થશે કાર્યવાહી! શિક્ષણમંત્રીની મોટી ખાતરી
ટોપ સ્ટોરી
ટ્રેન્ડિંગ સમાચાર
