આજે રાજ્યસભાની બે બેઠકો માટે ચૂંટણીઃ કયા ત્રણ ધારાસભ્યો કરી શકે છે ક્રોસ વોટિંગ? જાણો વિગત

કોંગ્રેસના રાધનપુરના ધારાસભ્ય અલ્પેશ ઠાકોર અને બાયડના ધારાસભ્ય ધવલસિંહ ઝાલા ક્રોસ વોટિંગ કરી શકે છે. આ ઉપરાંત એનસીપીના ધારાસભ્ય કાંધલ જાડેજા ભાજપની બેઠકમાં હાજર રહેતા એવી શક્યતાઓ વ્યક્ત કરવામાં આવી રહી છે કે, તેઓ પણ ભાજપના ઉમેદવારને મત આપશે.

ગાંધીનગરઃ આજે ગુજરાતમાં ખાલી પડેલી બે રાજ્યસભાની બેઠકો માટેની ચૂંટણી થવાની છે, ત્યારે કોંગ્રેસ ક્રોસ વોટિંગના ડરથી પોતાના ધારાસભ્યોને આબુ પાલનપુર રોડ પર આવેલા બાલારામ રિસોર્ટ લઈ ગઈ છે અને આજે તેઓ વોટિંગના સમયે ગાંધીનગર પરત ફરવાના છે. જોકે, અલ્પેશ ઠાકોર અને ધવલસિંહ ઝાલા આ ટૂરમાં સામેલ થયા નહોતા. એટલું જ નહીં, કોંગ્રેસના નેતાઓ છેલ્લી ઘડીએ તેમને વ્હીપ દેવા માટે તેમના ધારાસભ્ય નિવાસ સ્થાને ગયા હતા, પરંતુ અલ્પેશ ઠાકોર હાજર ન હોવાથી ઘર બહાર વ્હીપ લગાવ્યો હતો. મીડિયામાં એવી અટકળો ચાલી રહી છે કે, કોંગ્રેસના રાધનપુરના ધારાસભ્ય અલ્પેશ ઠાકોર અને બાયડના ધારાસભ્ય ધવલસિંહ ઝાલા ક્રોસ વોટિંગ કરી શકે છે. આ ઉપરાંત એનસીપીના ધારાસભ્ય કાંધલ જાડેજા ભાજપની બેઠકમાં હાજર રહેતા એવી શક્યતાઓ વ્યક્ત કરવામાં આવી રહી છે કે, તેઓ પણ ભાજપના ઉમેદવારને મત આપશે.

નોંધનીય છે કે, ભાજપ તરફથી વિદેશમંત્રી એસ. જયશંકર અને જુગલજી ઠાકોરને ઉમેદવાર બનાવાયા છે, જ્યારે કોંગ્રેસમાંથી ચંદ્રીકા ચુડાસમા અને ગૌરવ પંડ્યાને ઉમેદવાર બનાવાયા છે. ત્યારે હવે જોવાનું એ રહે છે કે, કોંગ્રેસના ધારાસભ્યો ક્રોસ વોટિંગ કરે છે કે નહીં. આ વખતે અલગ અલગ ચૂંટણી થવાની હોવાથી ભાજપની જીત લગભગ નિશ્ચિત માનવામાં આવી રહી છે.