Gujarat Rain: 2 દિવસ અત્યંત ભારે વરસાદની આગાહી, દક્ષિણ ગુજરાતમાં બારે મેઘ ખાંગાની સ્થિતિ સર્જાઈ શકે

રાજ્યમાં વરસાદને લઈ હવામાન વિભાગ દ્વારા આગાહી કરવામાં આવી છે.  આગામી 7 દિવસ રાજ્યમાં સાર્વત્રિક વરસાદની આગાહી હવામાન વિભાગે કરી છે.

પ્રતિકાત્મક તસવીર

Source : તસવીર- ABP અસ્મિતા

અમદાવાદ: રાજ્યમાં વરસાદને લઈ હવામાન વિભાગ દ્વારા આગાહી કરવામાં આવી છે.  આગામી 7 દિવસ રાજ્યમાં સાર્વત્રિક વરસાદની આગાહી હવામાન વિભાગે કરી છે.  આગામી 2 દિવસ ગુજરાતમાં ભારેથી અત્યંત ભારે વરસાદનું એલર્ટ હોવાનું હવામાન વિભાગનું માનવું છે.  ભારે વરસાદની આગાહીને પગલે આગામી 5 દિવસ દરિયો તોફાની બનશે. આ કારણે  માછીમારોને આગામી 1 ઓગસ્ટ સુધી દરિયો ન ખેડવા ચેતવણી આપવામાં આવી છે.  

હાલમાં 3 સિસ્ટમ સક્રિય થતા દક્ષિણ ગુજરાતમાં બારે મેઘ ખાંગાની સ્થિતિ સર્જાઈ શકે છે.  અમદાવાદમાં ગાજવીજ સાથે મધ્યમથી ભારે વરસાદની આગાહી હવામાન વિભાગે કરી છે.  હવામાન વિભાગના ડાયરેક્ટર ડૉ. એ. કે. દાસ દ્વારા આ માહિતી આપવામાં આવી હતી.  

 દક્ષિણ ગુજરાતમાં આજે ભારે વરસાદ વરસી શકે

આજે રાજ્યના મોટાભાગના વિસ્તારોમાં  ભારે વરસાદનું અનુમાન છે.  દક્ષિણ ગુજરાતમાં આજે ભારે વરસાદ વરસી શકે છે.  20થી વધારે જિલ્લાઓમાં આજે ભારેથી અતિભારે વરસાદનું એલર્ટ છે.  રાજ્યના અન્ય વિસ્તારોમાં સામાન્યથી ભારે વરસાદ વરસી શકે છે. આગામી ત્રણ દિવસ સુધી ગુજરાતમાં વરસાદી માહોલ રહેશે. જેમાં 30 થી 40 કિલોમીટર પ્રતિ કલાકની ઝડપે ફુંકાઈ પવન શકે છે.

માછીમારોને દરિયો ન ખેડવા સૂચના

ભારે વરસાદ અને સંભવિત દરિયાઈ તોફાની પવનોની આગાહીને ધ્યાનમાં રાખીને, આગામી પાંચ દિવસ સુધી માછીમારોને દરિયો ન ખેડવા માટે સ્પષ્ટ સૂચના આપવામાં આવી છે. આ સમયગાળા દરમિયાન દરિયામાં જવું જોખમી બની શકે છે.

અમદાવાદ શહેરના કેટલાક વિસ્તારમાં વરસાદ

અમદાવાદ શહેરના કેટલાક વિસ્તારમાં વરસાદની શરુઆત થઈ હતી. નરોડા, નિકોલ, બાપુનગરમાં ભારે વરસાદ વરસી રહ્યો છે. પકવાન, થલતેજ, એસજી હાઈવે સહિતના વિસ્તારમાં વરસાદ વરસી રહ્યો છે. અમદાવાદનો એસપી રિંગ રોડ જોખમી બન્યો હતો. બિસ્માર રસ્તાના કારણે વાહન ચાલકો પટકાયા હતા. વટવા, નિકોલ અને નારોલમાં જળબંબાકારની સ્થિતિ સર્જાઈ હતી.

અરવલ્લી જિલ્લાના જળાશયોમાં પાણીની આવક વધી છે. ઉપરવાસ અને કેચમેન્ટમાં વરસાદથી જળાશયોમાં પાણીની આવક થઈ રહી છે. પાણીની સતત આવકથી મેશ્વો ડેમ એલર્ટ પર છે. ભિલોડા, મોડાસા, ધનસુરાના 27 ગામને એલર્ટ કરાયા હતા.

21 જિલ્લાઓમાં વરસાદનું એલર્ટ 

આ ઉપરાંત, સૌરાષ્ટ્ર, ઉત્તર ગુજરાત, મધ્ય ગુજરાત અને દક્ષિણ ગુજરાતના કુલ 21 જિલ્લાઓ અને દમણ-દાદરાનગર હવેલી સહિતના કેન્દ્રશાસિત પ્રદેશો માટે યલો એલર્ટ જાહેર કરવામાં આવ્યું છે. આ વિસ્તારોમાં પણ હળવાથી મધ્યમ વરસાદની સંભાવના છે. નાગરિકોને સાવચેતી રાખવા અને તંત્રને પણ એલર્ટ રહેવા સૂચના અપાઈ છે. સામાન્ય વરસાદથી વધુ વરસાદની શક્યતા હોવાથી નાગરિકોને સાવચેત રહેવા જણાવાયું છે. ખાસ કરીને વાહનચાલકોને પાણી ભરાયેલા રસ્તાઓ પર કાળજીપૂર્વક વાહન ચલાવવાની સલાહ આપવામાં આવી છે.