Gujarat: બેરોજગારી અને મોંઘવારી મુદ્દે કૉંગ્રેસ એક્શનમાં, આ તારીખે ગુજરાત બંધની કરી જાહેરાત

ગુજરાતમાં આગામી વિધાનસભાની ચૂંટણીને લઈ કૉંગ્રેસ એક્શનમાં આવી ગઇ છે

પ્રતિકાત્મક તસવીર

ગાંધીનગરઃ ગુજરાતમાં આગામી વિધાનસભાની ચૂંટણીને લઈ કૉંગ્રેસ એક્શનમાં આવી ગઇ છે. મોંઘવારી, બેરોજગારી, કાયદો વ્યવસ્થા, અર્થતંત્ર, ડ્રગ્સ સહિતના મુદ્દાઓને લઈ કોંગ્રેસે 10 સપ્ટેમ્બરે ગુજરાત બંધની જાહેરાત કરી છે. ગુજરાત કોંગ્રેસે જાહેર કરેલા સ્વૈચ્છિક બંધમા લોકોને જોડાવા અપીલ કરવામાં આવી છે. 10 સપ્ટેમ્બરે સવારે ૮થી ૧૨ વાગ્યા સુધી બંધ રાખવા અપીલ કરવામાં આવી છે. જો કે ગુજરાત સાંકેતિક બંધમાં કાર્યકરોને કાળજી રાખવા ખાસ સૂચનાઓ અપાઈ છે.

કૉંગ્રેસે ઈમરજન્સી સેવાઓને ક્યાંય પણ અડચણ ન થાય તે માટે કાર્યકરો અને આગેવાનો સૂચના આપી હતી. હોસ્પિટલ, એમ્બ્યુલન્સ, દવાખાના, દવાની દુકાનોને સંપૂર્ણ પણે કોંગ્રેસ આગેવાનો અને સ્થાનિક કાર્યકર્તાઓએ મદદકર્તા બનવાનુ પણ કહેવામાં આવ્યું છે. નાના લારી ગલ્લા, પાથરણાવાળા, ફેરિયાઓ, રોજીંદુ કમાતા લોકોને સમજાવટથી પ્રતિકાત્મક બંધમાં જોડાવા વિનંતી કરવી તેવી પણ સૂચના અપાઈ છે. પગપાળા સંઘ, પંડાલ અને ધાર્મિક પ્રવૃત્તિઓને કોઈપણ પ્રકારની તકલીફ ન પડે તેનું વિશેષ ધ્યાન રાખવા પણ પ્રદેશ કૉંગ્રેસ પ્રમુખે અપીલ કરી છે.

Surat: રેવડી કલ્ચર મુદ્દે સીઆર પાટીલના કેજરીવાલ પર પ્રહાર, ઇસુદાન ગઢવીએ શું આપ્યો વળતો જવાબ?

સુરતઃ રેવડી કલ્ચર મુદ્દે ગુજરાત રાજકારણમાં ફરી ગરમાવો આવ્યો છે. ભાજપના પ્રદેશ અધ્યક્ષ સી.આર.પાટીલે કેજરીવાલ પર પ્રહાર કરતા કહ્યું હતું કે રેવડીવાળા વચન આપે છે પરંતુ પુરા કરશે કે નહી તે વિચારતા નથી. મફતની રેવડીના કારણે દેશનો વિકાસ થંભી જાય છે.

સીઆર પાટીલ પર આપ પાર્ટીએ વળતો પ્રહાર કર્યો હતો. ઇસુદાન ગઢવીએ કહ્યું હતું કે તમે બીન ગુજરાતી છો, એટલે તમારી માનસિકતા ગુજરાત વિરોધી છે. ફ્રી રેવડી ફ્રી રેવડી કરીને ગુજરાતની પ્રજાની મજાક કરો છો. ગુજરાતની પ્રજાને 300 યુનિટ ફ્રી વીજળી મળે તેમાં તમને કેમ પેટમાં દુઃખે છે. દિલ્હીમાં તમામ સેવા ફ્રીમાં હોવા છતાં દિલ્હી સરકાર પ્લસમાં છે. ગુજરાતમાં એક પણ સેવા ફ્રી નથી છતાં ગુજરાત સરકાર પર દેવું છે.

દરમિયાન કાર્યક્રમને સંબોધતા પાટીલે કહ્યું કે દરેક બેઠક 50 હજાર ની લીડ સાથે જીતવી છે. ગુજરાત દેશનું મોડલ છે. કોંગ્રેસ સરકાર બનાવવા તડજોડ કરે છે. પહેલા સરદાર પટેલના સ્થાને નહેરુને પ્રધાનમંત્રી બનાવ્યા હતા. કોરોનામાં વડાપ્રધાન મોદીએ કામ કર્યું. વેક્સિન મફતમાં આપવામાં આવી. તેઓએ રેવડી વેચી નથી પરંતુ વેક્સિન આપીને લોકોના જીવ બચાવ્યા છે.

 આવા લોકો રાજ્યને ડિસ્ટર્બ કરવાનો પ્રયત્ન કરે છે. કચ્છ સુધી પાણી પહોંચાડવાનું હતુ ત્યારે મેધા પાટકર કામ રોકતા હતા. જે ગુજરાતને આગળ જતા રોકતા હતા તે મેધા પાટકરને આપ આગળ લાવે છે. આજે ઓલપાડ માં 1 લાખ લોકો છે અને પેલા ભાઈ ભીડવાળી જગ્યામાં જઈ સભા કરે છે.

દરમિયાન સુરતમાં આર્ટ્સ એન્ડ કોમર્સ કોલેજ કેમ્પસ ખાતે મેગા મેડીકલ કેમ્પ યોજાયો હતો. વડાપ્રધાન નરેન્દ્ર મોદી વર્ચ્યુઅલી કાર્યક્રમમાં જોડાયા હતા. સરકારી યોજનાઓના લાભ અંગે લાભાર્થીઓ સાથે પ્રધાનમંત્રીએ વાત કરી હતી.

પ્રધાનમંત્રીએ ગુજરાત અને કેન્દ્રની સરકારને ગણાવી ડબલ એન્જીનની સરકાર ગણાવી હતી. તેમણે  આરોગ્ય કેમ્પને જનતા માટે આશિર્વાદ સમાન ગણાવ્યા હતા. સાથે જ સેવાભાવ શું હોય છે તે સુરતના લાકો સારી રીતે જાણતા હોવાની વાત કરી હતી. પ્રધાનમંત્રીએ સરકારી યોજનાઓથી અન્ય લોકોને જાગૃત કરવાનું લાભાર્થીઓને સૂચન કર્યું હતું. તેઓએ કહ્યું કે નરેન્દ્ર હોય કે ભૂપેન્દ્ર જનતા જ અમારા માટે ભગવાન છે.