Gujarat Rain: આગામી 3 કલાકમાં રાજ્યભરમાં ભારે પવન અને વીજળીના કડાકા સાથે વરસાદ તૂટી પડશે, જાણો લેટેસ્ટ આગાહી

રાજ્યમાં 3 વરસાદી અને 2 સાયક્લોનિક સિસ્ટમ સક્રિય; હવામાન વિભાગે જાહેર કર્યું 3 કલાકનું ખાસ વેધર બુલેટિન, અનેક જિલ્લાઓમાં યલો એલર્ટ.

gujarat weather forecast unseasonal rain

Source : ai

Show Quick Read

Key points generated by AI, verified by newsroom

• હવામાન વિભાગે ગાજવીજ, આંધી સાથે કમોસમી વરસાદની આગાહી કરી છે.
• ત્રણ વરસાદી સિસ્ટમ અને બે સાયક્લોનિક સર્ક્યુલેશન સક્રિય છે.
• સૌરાષ્ટ્ર, કચ્છ, ઉત્તર, મધ્ય અને દક્ષિણ ગુજરાતમાં વરસાદની શક્યતા.
• ખેડૂતોને પાક નુકસાન અને લોકોને સાવચેતી રાખવાની અપીલ.

gujarat weather update: ગુજરાતના હવામાનમાં અચાનક મોટો પલટો આવ્યો છે. હવામાન વિભાગે આગામી 3 કલાક માટે એટલે કે આજે બપોરે 2 વાગ્યાથી સાંજના 5 વાગ્યા સુધી રાજ્યના મોટાભાગના વિસ્તારોમાં ગાજવીજ, આંધી તોફાન અને ભારે પવન સાથે કમોસમી વરસાદ (માવઠા)ની આગાહી કરી છે. એકસાથે 3 વરસાદી સિસ્ટમ અને 2 સાયક્લોનિક સર્ક્યુલેશન સક્રિય થવાને કારણે રાજ્ય પર માવઠાનું આ સંકટ તોળાઈ રહ્યું છે. હવામાન વિભાગે કેટલાક જિલ્લાઓમાં યલો એલર્ટ પણ જાહેર કર્યું છે, જેના કારણે ખેડૂતો અને સામાન્ય નાગરિકોની ચિંતામાં વધારો થયો છે.

હવામાન વિભાગ દ્વારા બહાર પાડવામાં આવેલા 3 કલાકના ખાસ વેધર બુલેટિન મુજબ, વાતાવરણમાં થયેલા આ ફેરફાર પાછળ 3 અલગ અલગ વરસાદી સિસ્ટમ અને 2 સાયક્લોનિક સર્ક્યુલેશન સિસ્ટમ જવાબદાર છે. આ સિસ્ટમ્સની સીધી અસર ગુજરાત પર જોવા મળશે. જેને પગલે બપોરે 2 થી 5 વાગ્યાના સમયગાળા દરમિયાન રાજ્યભરમાં વાતાવરણ ડહોળાશે અને ભારે પવન તથા વીજળીના કડાકા ભડાકા સાથે વરસાદ તૂટી પડી શકે છે.

કયા કયા જિલ્લાઓમાં છે વરસાદની આગાહી?

હવામાન વિભાગના અનુમાન મુજબ, રાજ્યના લગભગ તમામ ઝોનમાં છુટાછવાયા કમોસમી વરસાદની શક્યતા છે:

સૌરાષ્ટ્ર અને કચ્છ: મોરબી, કચ્છ, બોટાદ, અમરેલી, ભાવનગર, રાજકોટ, સુરેન્દ્રનગર, દ્વારકા, જામનગર અને ગીર સોમનાથમાં માવઠું પડવાની પૂરેપૂરી સંભાવના છે.

ઉત્તર અને મધ્ય ગુજરાત: અમદાવાદ, ગાંધીનગર, પાટણ, મહેસાણા, બનાસકાંઠા, સાબરકાંઠા, અરવલ્લી, આણંદ, ખેડા, પંચમહાલ, દાહોદ, મહીસાગર, વડોદરા અને છોટાઉદેપુરમાં પણ આંધી તોફાન સાથે વરસાદની આગાહી કરવામાં આવી છે.

દક્ષિણ ગુજરાત: ભરૂચ, નર્મદા અને સુરત જિલ્લામાં પણ વાતાવરણમાં પલટો જોવા મળશે અને ગાજવીજ સાથે છાંટા પડી શકે છે.

હાલમાં ખેતરોમાં પાક તૈયાર હોવાથી કે કાપણી પર હોવાથી આ કમોસમી વરસાદ ખેડૂતો માટે નુકસાનકારક સાબિત થઈ શકે છે. તંત્ર દ્વારા લોકોને બપોરના સમયે કામ વગર ઘરની બહાર ન નીકળવા અને સુરક્ષિત સ્થળે રહેવા અપીલ કરવામાં આવી છે.

મહેસાણામાં માવઠાની શરૂઆત, ખેડૂતોમાં ફફડાટ

હવામાન વિભાગની આગાહી જાણે સાચી ઠરી રહી હોય તેમ મહેસાણા જિલ્લામાં વાતાવરણમાં અચાનક પલટો આવ્યો છે. સવારથી છવાયેલા વાદળછાયા વાતાવરણ વચ્ચે મહેસાણાની મોઢેરા ચોકડી અને દેડિયાસણ વિસ્તારમાં વરસાદી છાંટા પડવાના શરૂ થઈ ગયા છે. વિસનગર શહેર અને તેના આસપાસના ગ્રામ્ય વિસ્તારોમાં પણ વરસાદી ઝાપટાં વરસ્યા હોવાના અહેવાલ છે.

સૌથી વધુ ખરાબ સ્થિતિ બહુચરાજી તાલુકાની છે. બહુચરાજી અને સાંપાવાડા સહિતના ગ્રામ્ય વિસ્તારોમાં ભારે પવન અને કરા સાથે કમોસમી વરસાદ ખાબક્યો છે. અત્યારે ખેતરોમાં રવિ પાક તૈયાર ઊભો છે અને કાપણીની સીઝન ચાલી રહી છે, ત્યારે અચાનક પડેલા આ વરસાદ અને કરાના કારણે પાકને ભારે નુકસાન જવાની ભીતિ સેવાઈ રહી છે, જેના લીધે ખેડૂતોના જીવ તાળવે ચોંટી ગયા છે.

આ પણ વાંચો

ઉનાળાના આકરા તાપ વચ્ચે ચોથા માવઠાનું સંકટ! આવતીકાલે રાજ્યના 18 જિલ્લામાં વરસાદની આગાહી