ઘરની બહાર નીકળતા પહેલા સાવધાન, આગામી ત્રણ કલાકમાં તૂટી પડશે વરસાદ, હવામાન વિભાગની મોટી આગાહી

Rain Forecast: હવામાન વિભાગે નાગરિકોને સાવચેત રહેવાની અને જરૂરી સલામતીના પગલાં લેવાની સલાહ આપી છે. ખાસ કરીને ભારે વરસાદની આગાહીવાળા વિસ્તારોમાં લોકોને ઘરની બહાર નીકળતા સાવચેતી રાખવા જણાવ્યું છે.

ગુજરાતમાં ભારે વરસાદની આગાહી

Source : abp asmita

Gujarat Rain Alert: ગુજરાત હવામાન વિભાગે આજે રાજ્યના વિવિધ ભાગોમાં આગામી ત્રણ કલાક દરમિયાન વરસાદની આગાહી કરી છે. આ આગાહી મુજબ:

ભારે વરસાદની સંભાવના:

• દ્વારકા, જામનગર, પોરબંદર, ગીર સોમનાથ, દીવ, વલસાડ, દમણ અને દાદરા નગર હવેલીમાં ગાજવીજ સાથે ભારે વરસાદની શક્યતા છે.

મધ્યમ વરસાદની આગાહી:

• બોટાદ, સુરેન્દ્રનગર, અમરેલી, ભાવનગર, જૂનાગઢ, મોરબી, રાજકોટ, સુરત, ડાંગ અને નવસારીમાં ગાજવીજ સાથે મધ્યમ વરસાદ પડી શકે છે.

હળવો વરસાદ:

• બનાસકાંઠા, પાટણ, મહેસાણા, સાબરકાંઠા, અરવલ્લી, મહીસાગર, દાહોદ, પંચમહાલ, ખેડા, ગાંધીનગર, અમદાવાદ, આણંદ, વડોદરા, છોટાઉદેપુર અને ભરૂચમાં સામાન્યથી હળવો વરસાદ થઈ શકે છે.

પોરબંદરમાં ભારે વરસાદ

ગુરુવારથી શરૂ થયેલા ભારે વરસાદે પોરબંદર શહેર અને જિલ્લામાં જળપ્રલય જેવી સ્થિતિ સર્જી છે. છેલ્લા 24 કલાકમાં લગભગ 18 ઇંચ (457 મિમી) વરસાદ નોંધાયો છે, જેના કારણે શહેર અને આસપાસના વિસ્તારોમાં વ્યાપક જળબંબાકારની સ્થિતિ સર્જાઈ છે.

• સ્થાનિક રહેવાસીઓના જણાવ્યા મુજબ, 1983 પછી આ પ્રકારનો જળપ્રલય પ્રથમ વખત જોવા મળ્યો છે.
• શહેરના પ્રખ્યાત એમ.જી. રોડ, છાયાચોકી રોડ, અને સુદામાચોક સહિતના વિસ્તારોમાં ઘૂંટણસમા પાણી ભરાયા છે.
• અનેક વાહનો પાણીમાં ડૂબી ગયા છે અને કેટલાક પશુઓ પણ તણાઈ ગયાના અહેવાલો છે.
• ઘરો અને દુકાનોમાં પાણી ઘૂસી જતાં લોકોને ભારે નુકસાન થયું છે.
• બરડા વિસ્તારમાં પણ 10થી 12 ઇંચ વરસાદ નોંધાયો છે, જેના કારણે ખેતરો અને વાડીઓ જળબંબાકાર થઈ ગયા છે.

દ્વારકામાં ભારે વરસાદ

દ્વારકા જિલ્લામાં ગત રાત્રિથી સાર્વત્રિક અને ભારે વરસાદ નોંધાયો છે. ગાજવીજ સાથે શરૂ થયેલો આ વરસાદ હજુ પણ સમગ્ર જિલ્લાને ભીંજવી રહ્યો છે.

• કલ્યાણપુર પંથકમાં સૌથી વધુ 14 ઇંચ વરસાદ નોંધાયો, જેમાંથી 6 ઇંચ માત્ર 2 કલાકમાં પડ્યો.
• ખંભાળિયા પંથકમાં 7 ઇંચ, દ્વારકા અને ભાણવડ પંથકમાં 5-6 ઇંચ વરસાદ પડ્યો.
• કલ્યાણપુરના રાવલ ગામમાં આભ ફાટ્યા જેવી સ્થિતિ સર્જાઈ.
• અનેક માર્ગો પર પાણી ફરી વળતાં વાહનવ્યવહાર ખોરવાયો.
• ખંભાળિયા તાલુકામાં સિંહણ ડેમ અને ભાણવડમાં સતસાગર ડેમ ઓવરફ્લો થયા.
• સલાયા અને ખંભાળિયા ગામના નીચાણવાળા વિસ્તારોમાં પાણી ભરાયાં.
• ભાણવડ અને ભાટિયાની બજારોમાં પૂર જેવી સ્થિતિ સર્જાઈ.
• મોટાભાગના ખેતરોમાં પાણી ભરાવાથી પાક નુકસાનની ભીતિ.

જિલ્લા કલેક્ટરે લોકોને નીચાણવાળા વિસ્તારોમાંથી સુરક્ષિત સ્થળે ખસી જવા અપીલ કરી છે. તેમણે ડેમ કે અન્ય જોખમી સ્થળોએ પાણીના પ્રવાહની નજીક ન જવા પણ સૂચના આપી છે.

સ્થાનિક વહીવટી તંત્ર દ્વારા પરિસ્થિતિ પર સતત નજર રાખવામાં આવી રહી છે અને જરૂરી બચાવ અને રાહત કાર્યો હાથ ધરવામાં આવી રહ્યા છે. હવામાન વિભાગ દ્વારા આગામી કલાકોમાં પણ વરસાદ ચાલુ રહેવાની આગાહી કરવામાં આવી છે, જેથી લોકોને સાવધાન રહેવા અને સત્તાવાળાઓની સૂચનાઓનું પાલન કરવા જણાવવામાં આવ્યું છે.