BLO duty workload: BLO ની કામગીરી જીવલેણ બની? જામનગરમાં મહિલા શિક્ષિકા ચાલુ ફરજે ઢળી પડ્યા, સીધા ICU માં!
BLO duty workload: સત્યમ કોલોનીમાં SIR ની કામગીરી દરમિયાન હાઈપર ટેન્શનનો હુમલો, તંત્રએ હીરલબેન ત્રિવેદીને તાત્કાલિક અસરથી કામગીરીમાંથી મુક્તિ આપી.
BLO duty workload: રાજ્યભરમાં ચાલી રહેલી મતદાર યાદી સુધારણા (SIR) ની કામગીરી દરમિયાન BLO (બૂથ લેવલ ઓફિસર) પર કામના ભારણને લઈને અનેક ચર્ચાઓ ચાલી રહી છે. આ દરમિયાન જામનગરમાં રવિવારે યોજાયેલા ખાસ કેમ્પમાં એક મહિલા BLO ની તબિયત અચાનક લથડી હતી. સત્યમ કોલોની વિસ્તારમાં ફરજ બજાવતા શિક્ષિકા હીરલબેન ત્રિવેદી કામગીરી દરમિયાન અચાનક ખુરશીમાંથી ઢળી પડ્યા હતા. તેમને તાત્કાલિક સારવાર અર્થે જી.જી. હોસ્પિટલના ICU માં ખસેડવામાં આવ્યા હતા. ઘટનાની ગંભીરતાને ધ્યાનમાં લઈને તંત્ર દ્વારા તેમને BLO ની કામગીરીમાંથી મુક્તિ આપવામાં આવી છે. હાલ તેમની તબિયત સુધારા પર હોવાનું જાણવા મળ્યું છે.
ચાલુ કામગીરીએ શિક્ષિકા બેભાન થયા
જામનગરના સત્યમ કોલોની વિસ્તારમાં આવેલી આહિર સમાજની વાડી ખાતે રવિવારે મતદાર યાદી સુધારણા કાર્યક્રમ અંતર્ગત એક ખાસ કેમ્પનું આયોજન કરવામાં આવ્યું હતું. અહીં BLO તરીકે ફરજ બજાવતા શિક્ષિકા હીરલબેન અલ્પેશભાઈ ત્રિવેદી પોતાની કામગીરી કરી રહ્યા હતા. સવારના સમયે કામગીરી ચાલી રહી હતી ત્યારે અચાનક હીરલબેન ખુરશીમાં બેઠા બેઠા જ ઢળી પડ્યા હતા. આ ઘટનાને પગલે સ્થળ પર દોડધામ મચી ગઈ હતી અને અન્ય કર્મચારીઓ મદદે આવી ગયા હતા.
ICU માં સારવાર અને હાઈપર ટેન્શનનું નિદાન
તબિયત લથડતાની સાથે જ મહિલા BLO ને તાત્કાલિક અસરથી જામનગરની સરકારી જી.જી. હોસ્પિટલમાં ખસેડવામાં આવ્યા હતા. ત્યાં ફરજ પરના તબીબોએ તેમની સ્થિતિ જોઈને તેમને ICU માં દાખલ કરીને સઘન સારવાર શરૂ કરી હતી. શિક્ષિકાના પતિના જણાવ્યા અનુસાર, ડૉક્ટરોએ તપાસ બાદ જણાવ્યું હતું કે કામના તણાવ અથવા અન્ય કારણોસર તેમને 'હાઈપર ટેન્શન' (Hypertension) થઈ ગયું હતું, જેના કારણે આ ઘટના બની હતી. જોકે, સમયસર સારવાર મળવાને કારણે હાલ તેમની તબિયત સ્થિર છે અને કોઈ ગંભીર ચિંતાનું કારણ નથી.
કામગીરીમાંથી તાત્કાલિક મુક્તિ
રાજ્યમાં હાલ BLO ની કામગીરીને લઈને કર્મચારીઓમાં રોષ અને દબાણની ચર્ચાઓ ચાલી રહી છે. આ ઘટના બન્યા બાદ સ્થાનિક વહીવટી તંત્ર અને ચૂંટણી શાખા તાત્કાલિક એક્શનમાં આવ્યું હતું. માનવતાના ધોરણે અને હીરલબેનની નાદુરસ્ત તબિયતને ધ્યાનમાં રાખીને, અધિકારીઓ દ્વારા તેમને BLO તરીકેની કામગીરીમાંથી મુક્તિ આપી દેવામાં આવી છે. આ નિર્ણયથી શિક્ષિકા અને તેમના પરિવારને મોટી રાહત મળી છે.
રાજ્યભરમાં BLO પર કામનું ભારણ?
ઉલ્લેખનીય છે કે, છેલ્લા થોડા દિવસોમાં રાજ્યના અલગ અલગ વિસ્તારોમાંથી BLO ની તબિયત બગડવાના કે કામના ભારણ હેઠળ દબાયા હોવાના બનાવો સામે આવી રહ્યા છે. રવિવારની રજાના દિવસે પણ ખાસ કેમ્પ યોજીને કામગીરી કરવામાં આવી રહી હતી, તે દરમિયાન જામનગરમાં બનેલી આ ઘટનાએ ફરી એકવાર ચૂંટણી કામગીરીના વ્યવસ્થાપન સામે સવાલો ઉભા કર્યા છે. જોકે, તંત્ર દ્વારા દાવો કરવામાં આવી રહ્યો છે કે કર્મચારીઓની સુવિધાનું ધ્યાન રાખવામાં આવે છે.
Before You Go
Gujarat Government: રાજ્યના ખેડૂતો માટે સરકારનો મહત્વનો નિર્ણય
ટોપ સ્ટોરી
ટ્રેન્ડિંગ સમાચાર
