હવે દીવના કિલ્લાને જોવાના પણ રૂપિયા લાગશે! પ્રવાસીઓ માટે ખર્ચો વધ્યો! એપ્રિલથી નવો નિયમ લાગુ
400 વર્ષ જૂના ઐતિહાસિક કિલ્લામાં ફરવા માટે બાળકો માટે ₹75, વયસ્કો માટે ₹100 અને વિદેશીઓ માટે ₹200 ચાર્જ લાગશે.
Diu Fort entry fee: સુપ્રસિદ્ધ પ્રવાસન સ્થળ દીવનો કિલ્લો, જે અત્યાર સુધી પ્રવાસીઓ માટે નિઃશુલ્ક હતો, હવેથી ફરવા માટે ચાર્જ ચૂકવવો પડશે. દીવ પ્રશાસને આ અંગે નિર્ણય લીધો છે અને આ નિયમ એપ્રિલ મહિનાના પહેલા સોમવારથી લાગુ કરવામાં આવશે. આ સમાચારથી પ્રવાસીઓમાં થોડી નિરાશા જોવા મળી રહી છે, પરંતુ કિલ્લાની જાળવણી માટે આ પગલું જરૂરી માનવામાં આવી રહ્યું છે.
દીવનો ઐતિહાસિક કિલ્લો લગભગ 400 વર્ષ પહેલાં પોર્ટુગીઝ શાસન દરમિયાન બાંધવામાં આવ્યો હતો અને તે પુરાતત્વ વિભાગ હેઠળ આવે છે. આ કિલ્લો પોતાની ભવ્યતા અને દરિયા કિનારાના સુંદર દ્રશ્યોના કારણે દેશ-વિદેશના પ્રવાસીઓ માટે આકર્ષણનું કેન્દ્ર રહ્યો છે. અત્યાર સુધી પ્રવાસીઓ કોઈપણ પ્રકારનો ચાર્જ ચૂકવ્યા વિના આ કિલ્લાની મુલાકાત લઈ શકતા હતા, પરંતુ હવેથી તેમણે પ્રવેશ માટે નિયત કરેલો ચાર્જ ચૂકવવો પડશે.
દીવ પ્રશાસન દ્વારા જાહેર કરવામાં આવેલા નવા નિયમો અનુસાર, 15 વર્ષથી નીચેના બાળકો માટે કિલ્લામાં પ્રવેશ ફી ₹75 રહેશે. જ્યારે, 15 વર્ષથી ઉપરના તમામ વયસ્કો માટે પ્રવેશ ફી ₹100 નક્કી કરવામાં આવી છે. આ ઉપરાંત, વિદેશથી આવતા પ્રવાસીઓ માટે પ્રવેશ ફી ₹200 રહેશે. આ ફેરફાર એપ્રિલ મહિનાના પહેલા સોમવારથી અમલમાં આવશે, તેથી જે પણ પ્રવાસીઓ ત્યારબાદ દીવના કિલ્લાની મુલાકાત લેવાનું આયોજન કરી રહ્યા હોય તેમણે આ અંગે ધ્યાન રાખવું પડશે.
દીવના કિલ્લા પર પ્રવેશ ફી લાગુ કરવા પાછળનું કારણ કિલ્લાની જાળવણી અને વિકાસ જણાવવામાં આવી રહ્યું છે. 400 વર્ષ જૂનો આ કિલ્લો એક ઐતિહાસિક ધરોહર છે અને તેની યોગ્ય દેખરેખ રાખવી ખૂબ જ જરૂરી છે. પ્રવેશ ફી દ્વારા એકત્રિત થતી રકમનો ઉપયોગ કિલ્લાની સાફસફાઈ, સમારકામ અને અન્ય સુવિધાઓ માટે કરવામાં આવશે, જેથી તેની ભવ્યતા જળવાઈ રહે અને પ્રવાસીઓને સારો અનુભવ મળી શકે.
જો કે, કેટલાક પ્રવાસીઓનું માનવું છે કે આ ફી લાગુ કરવાથી પ્રવાસન પર થોડી અસર પડી શકે છે, ખાસ કરીને જેઓ ઓછા બજેટમાં મુસાફરી કરવાનું પસંદ કરે છે. તેમ છતાં, મોટાભાગના લોકો કિલ્લાની જાળવણી માટે આ નિર્ણયને યોગ્ય ગણાવી રહ્યા છે. હવે જોવાનું એ રહેશે કે એપ્રિલ પછી પ્રવાસીઓની સંખ્યા પર આ ફેરફારની કેટલી અસર પડે છે. દીવનો કિલ્લો આજે પણ તેની ઐતિહાસિક મહત્વતા અને કુદરતી સૌંદર્યના કારણે પ્રવાસીઓ માટે એક અવિસ્મરણીય સ્થળ છે અને રહેશે.
ટોપ સ્ટોરી
ટ્રેન્ડિંગ સમાચાર
