અમેરિકા-ઈરાન યુદ્ધ વચ્ચે ટ્રમ્પને મોટો ફટકો: આતંકવાદ વિરોધી વિભાગના વડા જો કેન્ટે આપ્યું રાજીનામું!

ઈઝરાયલના દબાણ હેઠળ શરૂ થયેલા યુદ્ધને ગણાવ્યું અમેરિકનોના હિતની વિરુદ્ધ; એક દિવસ પહેલાં જ વ્હાઇટ હાઉસના સલાહકાર સમીરા મુનશીએ પણ છોડી હતી ખુરશી.

US-Israel Iran War, Trump Faces Setback As Joe Kent Resigns

Source : IANS

Show Quick Read

Key points generated by AI, verified by newsroom

• આતંકવાદ વિરોધી વિભાગના વડાએ યુદ્ધને ખોટું ગણાવી રાજીનામું આપ્યું.
• ઈરાન હાલ અમેરિકા માટે કોઈ તાત્કાલિક ખતરો નથી - જો કેન્ટ.
• ઈઝરાયલ અને અમેરિકન સમર્થકોના દબાણ હેઠળ યુદ્ધ શરૂ થયું.
• ધાર્મિક સ્વતંત્રતા આયોગના સલાહકારે પણ ગેરકાયદેસર યુદ્ધ સામે રાજીનામું આપ્યું.

ઈરાન અને અમેરિકા-ઈઝરાયલ વચ્ચે ચાલી રહેલા ભયંકર યુદ્ધને લઈને હવે ખુદ અમેરિકામાં જ વિરોધના સૂર ઉઠવા લાગ્યા છે. રાષ્ટ્રપતિ ડોનાલ્ડ ટ્રમ્પને એક પછી એક મોટા ફટકા પડી રહ્યા છે. યુએસ કાઉન્ટર ટેરરિઝમ સેન્ટર (આતંકવાદ વિરોધી વિભાગ) ના વડા જો કેન્ટે મંગળવારે (17 માર્ચ) પોતાના પદ પરથી રાજીનામું આપી દીધું છે. તેમણે સ્પષ્ટ શબ્દોમાં આ યુદ્ધને ખોટું ગણાવ્યું છે અને કહ્યું છે કે તેઓ પોતાના અંતરાત્માની વિરુદ્ધ જઈને આ યુદ્ધને બિલકુલ સમર્થન આપી શકે તેમ નથી. ખાસ વાત એ છે કે આના બરાબર એક દિવસ પહેલાં જ, 16 માર્ચે વ્હાઇટ હાઉસ ધાર્મિક સ્વતંત્રતા આયોગના સલાહકાર સમીરા મુનશીએ પણ આવા જ કારણોસર પોતાનું રાજીનામું ધરી દીધું હતું.

"યુદ્ધને સમર્થન ન આપી શકું" - જો કેન્ટનો ટ્રમ્પને પત્ર

પોતાના રાજીનામા પાછળનું કારણ જણાવતા જો કેન્ટે કહ્યું કે, તેમણે ઘણો વિચાર-વિમર્શ કર્યા પછી આ મોટો નિર્ણય લીધો છે. તેમણે રાષ્ટ્રપતિ ડોનાલ્ડ ટ્રમ્પને સીધો પત્ર લખીને આ યુદ્ધ અંગે ભારે નિરાશા વ્યક્ત કરી હતી. પત્રમાં તેમણે રોકડા શબ્દોમાં જણાવ્યું છે કે, "હું ઈરાન સાથે ચાલી રહેલા આ યુદ્ધને કોઈપણ સંજોગોમાં સમર્થન આપી શકું તેમ નથી. ઈરાન અત્યારે આપણા દેશ (અમેરિકા) માટે કોઈ જ તાત્કાલિક ખતરો નથી."

ઈઝરાયલના દબાણનો આક્ષેપ અને ટ્રમ્પના કટ્ટર સમર્થક

કેન્ટે આ યુદ્ધ ફાટી નીકળવા પાછળનું મુખ્ય કારણ ઈઝરાયલ અને તેના શક્તિશાળી અમેરિકન સમર્થકોનું દબાણ હોવાનું જણાવ્યું છે. તેમના મતે આ યુદ્ધ અમેરિકન જનતા માટે કોઈ જ રીતે ફાયદાકારક નથી. અહી એ નોંધવું ખૂબ જ રસપ્રદ છે કે એક સમયે આ જ જો કેન્ટ ડોનાલ્ડ ટ્રમ્પના અત્યંત કટ્ટર સમર્થક ગણાતા હતા. રાષ્ટ્રપતિની ચૂંટણી વખતે તેમણે ટ્રમ્પ અને તેમની વિદેશ નીતિઓના ખુલ્લા દિલે વખાણ પણ કર્યા હતા.

સમીરા મુનશીએ પણ આપ્યું રાજીનામું

જો કેન્ટના રાજીનામા પહેલાં, અમેરિકન પ્રમુખની ધાર્મિક સ્વતંત્રતા સમિતિમાં સેવા આપનાર એકમાત્ર મુસ્લિમ મહિલા સલાહકાર સમીરા મુનશીએ પણ રાજીનામું આપી દીધું હતું. તેમણે સોશિયલ મીડિયા પ્લેટફોર્મ 'X' પર પોસ્ટ કરીને આ યુદ્ધને તદ્દન ગેરકાયદેસર ગણાવ્યું હતું. તેમની દલીલ હતી કે આ યુદ્ધ અમેરિકાના બંધારણ કે સંસદની સ્પષ્ટ મંજૂરી વગર જ શરૂ કરી દેવામાં આવ્યું છે.

ઝાયોનિસ્ટ એજન્ડાનો આરોપ

સમીરા મુનશીએ બહુ મોટો દાવો કરતા કહ્યું હતું કે, માત્ર એક 'ઝાયોનિસ્ટ' રાજકીય એજન્ડાને આગળ ધપાવવા માટે પેલેસ્ટાઇન વિશેની ઊંડી માન્યતાઓ ધરાવતા ધાર્મિક લોકોને બોલવાની આઝાદી (અભિવ્યક્તિની સ્વતંત્રતા) થી વંચિત રાખવામાં આવી રહ્યા છે. એટલું જ નહીં, આ રાજકીય ખેલમાં લોકોના જીવ પણ જોખમમાં મુકાઈ રહ્યા છે.

આ પણ વાંચો

એશિયામાં વધુ એક યુદ્ધના ભણકારા: પાકિસ્તાને અફઘાનિસ્તાન પર કર્યો ભયાનક હવાઈ હુમલો, કાબુલમાં 5 મોટા ધડાકા