નીતિન પટેલે કોંગ્રેસના ક્યા ધારાસભ્યને કહ્યું, બહાર જાઓ નહિંતર ઓવૈસીને બોલાવું છું..........ધારાસભ્યે શું આપ્યો જોરદાર જવાબ ?

હાજરજવાબીપણું બતાવીને  જવાબ આપ્યો હતો કે, ગુજરાતમાં તમે લોકોએ જ ઓવૈસીને બોલાવ્યા છે.

ફાઈલ તસવીર

ગાંધીનગરઃ ગુજરાત વિધાનસભામાં ગુરૂવારે ગૃહ વિભાગના બજેટની ચર્ચા દરમિયાન વિપક્ષી સભ્યોએ ભારે હોબાળો કર્યો હતો. આ હોબાળો કર્યા બાદ કોંગ્રેસના સભ્યોએ સુત્રોચ્ચાર કરતાં કરતાં વોકઆઉટ કર્ય હતો.

કોંગ્રેસના ધારાસભ્યો કરી રહ્યા હતા તેમાં જમાલપુર-ખાડિયાના ધારાસભ્ય ઇમરાન ખેડાવાલા છેલ્લા હતા. રાજ્યના નાયબ મુખ્યમંત્રી  નીતિન પટેલે હસતાં હસતાં કહ્યું કે, ખેડાવાલા બહાર જાવ નહીં તો ઓવૈસીને બોલાવું છું.

નીતિન પટેલે  વિધાનસભાના સ્પીકર રાજેન્દ્ર ત્રિવેદીને સંબોધીને આ વાત કરીને કહ્યું હતું કે, મેં ખેડાવાલાને કહ્યું છે કે તમે ગૃહની  બહાર જાવ નહીં તો હું ઓવૈસીને બોલાવું છું એટલે તરત જ બહાર ભાગ્યા.

આ સાંભળીને ઈમરાન ખેડાવાલા તરત જ પાછા ફર્યા હતા. તેમણે હાજરજવાબીપણું બતાવીને  જવાબ આપ્યો હતો કે, ગુજરાતમાં તમે લોકોએ જ ઓવૈસીને બોલાવ્યા છે.

ખેડાવાલાનો જવાબ સાંભળીને સૌ હસી પડ્યા હતા. ગુજરાતમાં સ્થાનિક સ્વરાજની ચૂંટણીમાં અમદાવાદ મ્યુનિસિપલ કોર્પોરેશનની ચૂંટણીમાં જમાલપુર-ખાડિયા વોર્ડમાં ઓવૈસીની પાર્ટીના કારણે કોંગ્રેસની હાર થઈ એ સંદર્ભમાં નીતિન પટેલે કટાક્ષ કર્યો હતો.