Mamata Banerjee Warning: જો બંગાળને છેડશો તો દેશભરમાં ભાજપના પાયા હચમચાવી નાખીશ, મમતાનો કેન્દ્ર સરકાર સામે હુંકાર
ચૂંટણી પંચ પર 'ભાજપ કમિશન' હોવાનો આરોપ: બિહાર ચૂંટણીના પરિણામોને SIR સાથે જોડીને મમતાએ ઉઠાવ્યા ગંભીર સવાલો.
Mamata Banerjee vs BJP: પશ્ચિમ બંગાળના મુખ્યમંત્રી મમતા બેનર્જીએ મતદાર યાદી સુધારણા કાર્યક્રમ (SIR - Special Intensive Revision) ને લઈને કેન્દ્ર સરકાર અને ચૂંટણી પંચ વિરુદ્ધ મોરચો માંડ્યો છે. કોલકાતામાં એક જનસભાને સંબોધતા તેમણે ભાજપને ખુલ્લી ચેતવણી આપી છે કે જો તેઓ બંગાળમાં ટીએમસીને નુકસાન પહોંચાડવાનો પ્રયાસ કરશે, તો તેઓ સમગ્ર દેશમાં ભાજપના પાયા હચમચાવી નાખશે. મમતા બેનર્જીએ બિહાર વિધાનસભા ચૂંટણીના પરિણામોને પણ SIR પ્રક્રિયા સાથે જોડીને આક્ષેપ કર્યો હતો કે વિપક્ષ આ રમત સમજવામાં નિષ્ફળ રહ્યો હતો. તેમણે ઉત્તર પ્રદેશ અને મધ્યપ્રદેશમાં SIR પ્રક્રિયા હાથ ધરવા પર પણ તાર્કિક સવાલો ઉઠાવ્યા છે.
"હું ભારતમાં તમારા પાયા હલાવી દઈશ": મમતાનો આક્રોશ
બંગાળના મુખ્યમંત્રીએ આક્રમક તેવર બતાવતા ભાજપને સીધો પડકાર ફેંક્યો છે. તેમણે કહ્યું કે ભાજપ રાજકીય રીતે તેમનો સામનો કરવામાં કે તેમને હરાવવામાં સક્ષમ નથી, તેથી તેઓ હવે વહીવટી તંત્રનો દુરુપયોગ કરી રહ્યા છે. મમતાએ કહ્યું, "બિહાર ચૂંટણીનું જે પરિણામ આવ્યું છે, તે વાસ્તવમાં SIR (મતદાર યાદી સુધારણા) નું પરિણામ છે. ત્યાંનો વિપક્ષ ભાજપની આ ગુપ્ત યુક્તિઓને પકડી શક્યો નહીં." તેમણે સ્પષ્ટ કર્યું કે જો આગામી 2 થી 3 વર્ષમાં બંગાળમાં SIR પ્રક્રિયા હાથ ધરાશે, તો તેઓ પોતાની તમામ તાકાત અને સંસાધનો સાથે તેનો મુકાબલો કરશે.
ચૂંટણી પંચની વિશ્વસનીયતા પર સવાલ
SIR વિરોધી રેલીમાં મમતા બેનર્જીએ ચૂંટણી પંચ પર ગંભીર આક્ષેપો કર્યા હતા. તેમણે કહ્યું, "દુર્ભાગ્યવશ, ચૂંટણી પંચ હવે નિષ્પક્ષ સંસ્થા રહ્યું નથી; તે હવે 'ભાજપ કમિશન' બની ગયું છે." મમતાએ દાવો કર્યો કે જ્યારે SIR પ્રક્રિયા પૂર્ણ થયા બાદ ડ્રાફ્ટ મતદાર યાદી જાહેર થશે, ત્યારે લોકોને ખ્યાલ આવશે કે ચૂંટણી પંચ અને ભાજપે મળીને કેવી મોટી મુસીબત ઉભી કરી છે.
"UP અને MP માં તપાસ કેમ?"
મમતા બેનર્જીએ કેન્દ્ર સરકારના ઈરાદાઓ પર શંકા વ્યક્ત કરતા પૂછ્યું કે, "જો SIR નો મુખ્ય હેતુ કથિત બાંગ્લાદેશી નાગરિકોને મતદાર યાદીમાંથી દૂર કરવાનો છે, તો પછી મધ્યપ્રદેશ અને ઉત્તર પ્રદેશ જેવા રાજ્યોમાં આ પ્રક્રિયા કેમ કરવામાં આવી રહી છે?" તેમણે કટાક્ષ કરતા કહ્યું કે શું ભાજપ શાસિત રાજ્યોમાં SIR કરાવવાનો અર્થ એ છે કે કેન્દ્ર સરકાર ત્યાં પણ ઘૂસણખોરોની હાજરી સ્વીકારી રહી છે? પોતાની બંગાળી ઓળખ પર ગર્વ કરતા તેમણે કહ્યું, "સારું છે કે મારો જન્મ બીરભૂમમાં થયો હતો, નહીંતર મને પણ બાંગ્લાદેશી ગણાવી દેવામાં આવત."
ઘૂસણખોરી માટે કેન્દ્ર સરકાર જ જવાબદાર
સરહદ પારથી થતી ઘૂસણખોરીના મુદ્દે મમતાએ કેન્દ્ર સરકારને આડે હાથ લીધી હતી. તેમણે તર્ક આપ્યો કે, "જો રોહિંગ્યાઓ દેશમાં ઘૂસી રહ્યા છે, તો તેઓ ક્યાંથી આવે છે? સરહદોની સુરક્ષા કોણ કરે છે? BSF, કસ્ટમ્સ અને એરપોર્ટ પર CISF નું નિયંત્રણ કેન્દ્ર સરકાર પાસે છે. નેપાળ બોર્ડર પણ કેન્દ્ર સંભાળે છે." મમતાએ કહ્યું કે ઘૂસણખોરી રોકવામાં નિષ્ફળતા કેન્દ્રની છે, રાજ્યની નહીં. તેમણે ભવિષ્યવાણી કરી કે બંગાળને કબજે કરવાની લાયમાં ભાજપ આગામી ચૂંટણીમાં ગુજરાત પણ ગુમાવી બેસશે. મિઝોરમ કે મણિપુરમાં SIR નથી થઈ રહ્યું, માત્ર બંગાળને જ ટાર્ગેટ કરવામાં આવી રહ્યું છે કારણ કે તેમને બંગાળ પર કબજો કરવો છે, જે અંગ્રેજો પણ કરી શક્યા ન હતા.
ટોપ સ્ટોરી
ટ્રેન્ડિંગ સમાચાર
