Biporjoy: બિપરજોયના કારણે રાજસ્થાના આ જિલ્લાઓમાં વરસાદે જોર પકડ્યુ, ડેમ તુટતા ઘરોમાં ઘૂસ્યા પાણી
બાડમેર અને સિરોહીમાં પણ છેલ્લા 36 કલાકથી પડી રહેલા વરસાદને કારણે શહેરોમાં નદીઓની જેમ પાણી વહી રહ્યા છે. જાલોર, સિરોહી, બાડમેરમાં રવિવારે સવારે પણ વરસાદ પડી રહ્યો છે.
Biporjoy Latest News: ગુજરાતમાં તબાહી મચાવ્યા બાદ હવે રાજસ્થાનમાં બિપરજૉય વાવાઝોડું કેર વર્તાવવા માટે આગળ વધી રહ્યું છે. ચક્રવાત બિપરજૉયના કારણે રાજસ્થાનમાં અત્યારે ઠેર ઠેર ભારે વરસાદ વરસી રહ્યો છે, અને પૂર જેવી સ્થિતિ સર્જાઈ છે. ભારે વરસાદને કારણે જાલોર જિલ્લાના સાંચોરમાં ડેમ તૂટવાના કારણે અનેક વિસ્તારો પાણીમાં ગરકાવ થઇ ગયા છે. ડેમ તૂટવાના કારણે નર્મદા લિફ્ટ કેનાલમાં પાણીની આવક સતત વધી રહી છે. જેના કારણે કેનાલ પણ તૂટી ગઈ હતી. હવે સૌથી વધુ ખતરો સાંચોર શહેર પર મંડરાયો છે. શનિવારે રાત્રે ડેમ તૂટવાની માહિતી મળતા જ સમગ્ર શહેરને ખાલી કરાવવાના પ્રયાસો હાથ ધરવામાં આવ્યા છે. હવામાન વિભાગે આજે પણ અનેક જિલ્લાઓમાં ભારે વરસાદનું એલર્ટ જાહેર કર્યું છે.
બાડમેર અને સિરોહીમાં વરસાદનો કેર -
બાડમેર અને સિરોહીમાં પણ છેલ્લા 36 કલાકથી પડી રહેલા વરસાદને કારણે શહેરોમાં નદીઓની જેમ પાણી વહી રહ્યા છે. જાલોર, સિરોહી, બાડમેરમાં રવિવારે સવારે પણ વરસાદ પડી રહ્યો છે. આ જિલ્લાઓના કેટલાક વિસ્તારોમાં અત્યાર સુધીમાં 10 થી 13 ઇંચ (એક ફૂટ) વરસાદ નોંધાયો છે. બિપરજૉય વાવાઝોડાને કારણે સાંચોર સહિત આસપાસના વિસ્તારોમાં અવિરત વરસાદ પડી રહ્યો છે.ગુજરાત બાજુથી અહીં બનેલા સુરવા ડેમમાં પાણી સતત આવી રહ્યું હતું. શનિવારની મોડી રાત્રે વધુ પાણી ભરાતા ડેમ તૂટી ગયો હતો.
ડેમનું પાણી સાંચોર તરફ આગળ વધી રહ્યું છે. શહેરમાં અચાનક પાણી આવવાની માહિતી મળતાં લોકોએ બપોરે 2 વાગ્યાથી બજારમાં પોતાની દુકાનો ખાલી કરવાનું શરૂ કરી દીધું હતું. નીચાણવાળા વિસ્તારોના લોકોને પણ સલામત સ્થળે ખસી જવા માટે કહેવામાં આવ્યું છે. સુરવાથી હડેતર થઈને પાણી જાજુસણ પહોંચ્યું હતું. ત્યારબાદ આગળ બની રહેલો ભારતમાલા એક્સપ્રેસ વે રાત્રે 4 વાગે સાંચોર તરફ આગળ વધ્યો હતો. નર્મદા કેનાલની સાંચોર લિફ્ટ કેનાલ પણ વધુ પાણી આવતાં તૂટી ગઈ છે.
બાડમેર પર વધ્યો ખતરો -
જાલોર ઉપરાંત સિરોહી અને બાડમેર પણ પૂરનો ખતરો છે. અહીં અનેક વિસ્તારોમાં 4-5 ફૂટ સુધી પાણી ભરાઈ ગયું છે. આ પછી લોકોને NDRF-SDRFની મદદથી બચાવવું પડ્યું.
હવામાનશાસ્ત્રીઓ આ ચક્રવાતને વર્ષ 2021માં આવેલા તૌ-તે વાવાઝોડા અને 1998માં આવેલા ચક્રવાત કરતાં પણ વધુ ખતરનાક માને છે. કારણ કે તે સમયે રાજસ્થાનમાં આટલો વરસાદ થયો ન હતો. ત્યારથી ભારે વરસાદને લઈને એલર્ટ જારી કરવામાં આવ્યું છે. રાજસ્થાનના જોધપુર, અજમેર અને જયપુર વિભાગના જિલ્લાઓમાં ભારે વરસાદ પડશે.
ટ્રેન્ડિંગ સમાચાર
ટોપ સ્ટોરી
